އެއްވުން ރޫޅާލަން ފުލުހުން ހާލަތާ ނުބައްދަލު ބާރުގެ ބޭނުންކުރޭ: އެޗްއާރުސީއެމް

ސިޔާސީ އިދިކޮޅު ލީޑަރުން ހިމެނޭ ގޮތަށް ނުވަ ގައިދީއަކު ދޫކޮށްލުމަށް ސުޕްރީމް ކޯޓުން މިދިޔަ މަހުގެ 1 ގައި ނެރުނު އަމުރު ތަންފީޒު ކުރުމަށް ގޮވާލައި އިދިކޮޅު ފަރާތްތަކުން ކުރަމުން އަންނަ މުޒާހަރާތައް ރޫޅާލުމަށް ފުލުހުން ބައެއް ފަހަރު ހާލަތާ ނުބައްދަލު ބާރުގެ ބޭނުން ކުރާ ކަމަށް އެޗްއާރުސީއެމުން މިއަދު ބުނެފި އެވެ.

އިދިކޮޅު ފަރާތްތަކުން މާލެ އާއި ރަށްރަށުގައި ކުރަމުން އަންނަ މުޒާހަރާތައް މޮނިޓާ ކުރުމަށް ފަހު، ނެރުނު ބަޔާނެއްގައި ބުނީ ބައެއް ފުލުހުންގެ އަމަލުތަކުގެ ސަބަބުން އާންމުންގެ ތެރެއިން ބައެއް މީހުންނަށާއި ނޫސްވެރިންނަށް އަނިޔާވެފައިވާކަން ފާހަގަކުރެވިފައިވާ ކަމަށެވެ.

އެކަމަކު، ފަހަކަށް އައިސް، ގިނަ އެއްވުންތައް ސުލްހަވެރިކަމާއެކު ކުރިއަށް ގެންގޮސްފައިވާ ކަމަށާއި އެއްވުންތައް ރޫޅާލުމުގައި ފުލުހުން ހާލަތާ ނުބައްދަލު ބާރުގެ ބޭނުންކޮށްފައިނުވާ ކަމަށް ބަޔާނުގައިވެ އެވެ.

މީގެ އިތުރުން އެޗްއާރުސީއެމުން ފާހަގަ ކުރި ކަންކަމުގެ ތެރޭގައި ހަތިޔާރު ބޭނުން ކުރުމާ ބެހޭ ގަވައިދުގައި ބަޔާންކޮށްފައިވާ ގޮތާ ހިލާފަށް ބައެއް ހާލަތްތަކުގައި ފުލުހުން ވަނީ ޕެޕާ ސްޕްރޭ ބޭނުންކޮށްފަ އެވެ.

މީގެއިތުރުން މުއާމަލާތް ކުރުމުގައި ފުލުހުންނާއި އާންމުން ބައެއް ފަހަރު، އެންމެ އެކަށީގެންވާ ބަސް މަގު ބޭނުންކޮށްފައި ނުވާ ކަމަށް ވެސް އެޗްއާރުސީއެމްގެ ބަޔާނުގައި ބުންޏެވެ.

އެޗްއާރުސީއެމުން ބަޔާނުގައި ފާހަގަ ކުރި ކަންކަން:

- ބައެއް މީހުން ފުލުހުންގެ އަމުރަށް ނުކިޔަމަންތެރިވި

- އެއްވުންތަކަށް ކުޑަކުދިން ގެންގޮސްފައިވާކަން

- ރޭގަނޑު 12 ގެ ފަހުން ތަންތަނަށް އެއްވެ އަޑުގަދަކުރުން

- ސައިކަލްތަކުގައި ނިކުމެ، މީހުންނަށް އުނދަގޫވާ ގޮތަށް ބަރުގަނު އެޅުވުން

އެޗްއާރުސީއެމުން ބުނީ އެއްވުންތައް ރޫޅާލުމުގެ ތެރޭގައި ފުލުހުން ހައްޔަރުކުރި މީހުންނަށް އަނިޔާކޮށްފައިވާ ކަމަށް ތުހުމަތުކުރެވޭ ހަ މައްސަލައެއް އެޗްއާރުސީއެމުން ބަލަމުންދާ ކަމަށެވެ. މީގެތެރެއިން ތިން މައްސަލައަކީ ކޮމިޝަންގެ އިސް ނެގުމަކަށް ބަލަމުން އަންނަ މައްސަލަތަކެއް ކަމަށް އެ ބަޔާނުގައިވެ އެވެ.