މުޒާހަރާގެ ތެރެއަށް ކަރުނަ ގޭސް ޖަހައިފި، އެކަމަކު މުޒާހަރާ ކުރިއަށް!

އިދިކޮޅު ފަރާތްތަކުން މިރޭ ކުރިއަށް ގެންދާ "ހުއްޓުވާ" މުޒާހަރާ މަޖީދީމަގުގައި ފެށުމާ އެކު، ފުލުހުން އިންޒާރު ދީ ބަޔަކު ހައްޔަރުކޮށްފި އެވެ.

ސަރުކާރުގެ ޣައިރު ގާނޫނީ އަމަލުތައް ހުއްޓުވުމުގެ ނަމުގައި ކުރާ މުޒާހަރާއަށް، މަޖީދީމަގާއި ޗާންދަނީ މަގު ގުޅޭ ކަންމައްޗަށް މީހުން އެއްވާން ފެށުމާ އެކު ގިނަ އަދަދެއްގެ ފުލުހުން އެ ސަރަހައްދަށް ޝީލްޑާ އެކު ގޮސް މުޒާހަރާގެ ބައިވެރިންނަށް ވަނީ ހުރަސްއަޅައިފަ އެވެ. މުޒާހަރާ ކުރިއަށް ނުގެންދިއުމަށާއި ފުލުހުންގެ އެންގުމަށް ތަބާނުވެ އެ ތަނުގައި ތިބޭ ނަމަ ބާރުގެ ބޭނުންކޮށްގެން މުޒާހަރާ ރޫޅާލާނެ ކަމަށް ފުލުހުން ތަކުރާރުކޮށް އިންޒާރު ދިނެވެ.