ފުލުހުންގެ ޔުނިފޯމްގައި ތިބި ބައެއްގެ އިންޒާރުގެ ވީޑިއޯއެއް އަނެއްކާވެސް ނެރެފި

އިދިކޮޅު ފަރާތްތަކުން މާލޭގައި މިއަދު ބާއްވާ ބޮޑު މުޒާހަރާއާ ގުޅޭނެ ކަމަށް ބުނެ، ފުލުހުންގެ އޮޕަރޭޝަނަލް ޔުނިފޯމްގައި ތިބި ބަޔަކު ސަރުކާރަށް އަނެއްކާވެސް އިންޒާރު ދީފި އެވެ.

ގާނޫނާ ޚިލާފަށް ސަރުކާރުން ކުރަމުންދާ ކަންކަން ހުއްޓާލަން، ސްޕެޝަލިސްޓް އޮޕަރޭޝަން (އެސްއޯ) ފުލުހުންގެ ޔުނިފޯމްގައި ތިބި ބަޔަކު އިންޒާރު ދީ ވީޑިއޯއެއް އާންމުކުރިތާ 48 ގަޑިއިރު ނުވަނީސް ނެރުނު މި ވީޑިއޯގައި ބުނަނީ މިއީ "ފަހުގެ މެސެޖް" ކަމަށެވެ.

ސޯޝަލް މީޑިއާގައި އާންމުކޮށްފައިވާ މި ވީޑިއޯގައި ތިން މީހަކު ފުލުހުންގެ ޔުނިފޯމްގައި ތިބެ އެވެ. އެމީހުންނަކީ އޮޕަރޭޝަނަލް ޓީމުކަން ހާމަކޮށް، އޭގެ ތެރެއިން އެކަކު ވަނީ މިއަދު ކުރުމަށް ހަމަޖެހިފައިވާ މުޒާހަރާގައި ވީހާވެސް ގިނަ ބަޔަކު ބައިވެރިވުމަށް ގޮވާލައިފަ އެވެ.

ވަކި ހިސާބަކުން، މުޒާހަރާގެ ބައިވެރިންނާ ގުޅޭނެ ކަމަށާއި އޮޕަރޭޝަނަލް ޓީމުން ތިބޭނީ އެސްއޯ ފުލުހުންނާއެކުގައި ކަމަށް ވެސް ބުނެ އެވެ.

"އަޅުގަނޑުމެން އޮޕަރޭޝަނަލް ޓީމުން، މުޅި އެސްއޯ ޓީމާއެކު، މާތް ﷲ ގަންދީ ހުވާކޮށް ތިޔަބޭފުޅުންނާ އެކީގައި ބައިވެރިވާނަން،" ވީޑިއޯގައި ބުނެ އެވެ.

ނަމަވެސް މި ވީޑިއޯގައި ތިބީ ފުލުހުންކަން ކަށަވަރެއް ނުވެ އެވެ. އަދި މިކަމާ ގުޅިގެން ފުލުހުންގެ ބަހެއް ވެސް ވަނީ ލިބޭ ގޮތެއް ނުވި އެވެ.

ފުލުހުންގެ ނަމުގައި، ޔޫޓިއުބްގައި އެސްއޯ ފުލުހުން ކަމަށް ބުނެ، ނެރުނު ވީޑިއޯގައި ވާހަކަ ދައްކަމުން ބުނީ އެ މުއައްސަސާއަކީ ޕީޕީއެމްގެ ޖަގަހައެއް ކަމަށް ހީވާ ދަރަޖަ އަށް ކަންކަން ހިނގައްޖެ ކަމަށެވެ. ފުލުހުންނަށް ޣައިރު ގާނޫނީ އަމަލުކުރުން މާޗް މަހުގެ ނިޔަލަށް ހުއްޓާލުމަށް އެ ވީޑިއޯގައި ސަރުކާރަށް އިންޒާރު ދީފައިވެ އެވެ. އަދި ރައްޔިތުންނަށް އަނިޔާކުރަން ފުލުހުންނަށް ކުރަމުންދާ އަމުރުތައް ހުއްޓާލުމަށް ވެސް އެ ވީޑިއޯގައި ވާހަކަ ދައްކާ މީހާ އިންޒާރު ދިނެވެ.

މި ވީޑިއޯއާ ގުޅިގެން ފުލުހުން ކުރިން ބުނީ ޔުނިފޯމުގައި ތިބި ނަމަވެސް މިހާތަނަށް އެއީ ފުލުހުން ކަމެއް ޔަގީން ނުވާ ކަމަށެވެ. ޔޫޓިއުބްގައި އަޕްލޯޑުކޮށްފައިވާ އެ ވީޑިއޯގައި އިންޒާރު ދިނީ، ފުލުހުންތޯ އެ މުއައްސަސާއިން ތަހުގީގު ކުރަމުން އަންނަ ކަމަށް ވެސް ފުލުހުން ބުންޏެވެ.

އިސްކަންދަރު ކޮށީގައި އިއްޔެ ބޭއްވި ނޫސްވެރިންގެ ބައްދަލުވުމުގައި ސުޕްރިޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ ފުލުހުންގެ ތެރޭގައި ބައިބައިވުން އުފައްދަން ބަޔަކު މަސައްކަތް ކުރަމުންދާ ކަމަށެވެ.

ފުލުހުންގެ ނަމުގައި، ސަރުކާރަށް އިންޒާރުދީ ޔޫޓިއުބުގައި އަޕްލޯޑްކުރި ވީޑިއޯ އަށް އިޝާރާތް ކުރައްވައި ވިދާޅުވީ، އެފަދަ ވީޑިއޯތަކާއި ސޯޝަލް މީޑިއާގައި ތަފާތު ވާހަކަތައް ފެތުރި ނަމަވެސް ފުލުހުންނަށް އެއްވެސް އަސަރެއް ނުކުރާނެ ކަމަށެވެ. އެފަދަ އެއްވެސް ދަންތޫރައެއްގައި ފުލުހުން ނުޖެހޭނެ ކަމަށާއި ފުލުހުންގެ ސަފުތައް އެއަށްވުރެން މާ ބަދަހި ކަމަށް ވެސް ޝިފާން ވިދާޅުވި އެވެ.