މުސްލިމުންނަށް ދިމާވެފައިވާ ގޮންޖެހުންތަކުން އަރައިގަތުމަށް އެއްބައިވަންތަ ވާންޖެހޭ: ރައީސް ޔާމީން

ދުނިޔޭގެ ކަންކޮޅުތަކުގައި މުސްލިމުންނަށް ކުރިމަތިކޮށްފައިވާ ހިތްދަތި ހާލަތުން އަރައިގަންނަން މުޅި އިސްލާމީ އުއްމަތް އެއްބައިވަންތަ ވާންޖެހޭ ކަމަށް ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އިސްލާމްދީން ކުރިއަރުވަން އެމަނިކުފާނު ކުރައްވާ މަސައްކަތްޕުޅުގެ އަގު ވަޒަންކޮށް އިންޓަނޭޝަނަލް މޮޑެރޭޝަން ފޯރަމް އިން އެރުވި އެވޯޑާ ހަވާލުވެވަޑައިގަތުމަށް ފަހު ވާހަކަފުޅު ދައްކަވަމުންނެވެ.

އިންޓަނޭޝަނަލް މޮޑެރޭޝަން ފޯރަމް އުފެއްދި ފަހުން، ތިން ވަނަ ބޭފުޅެއްގެ ގޮތުގައި ރައީސް ޔާމީނަށް އެވޯޑު ލިބިވަޑައިގަތީ، އިސްލާމް ދީނުގެ އަސާސްތަކާއި މެދުމިނުގެ އުސޫލްތައް ކުރިއަރުވައި ސައްހަ މައުލޫމާތު ފެތުރުމާއި ދީނީ ގޮތުން ހައްދު ފަހަނައަޅައިދިއުމާއި ޓެރަރިޒަމާ ދެކޮޅަށް ކުރައްވާ މަސައްކަތްޕުޅުގެ އަގު ވަޒަންކުރުމުގެ ގޮތުންނެވެ.

ރައީސް އޮފީހުގައި ބޭއްވި ރަސްމިއްޔާތުގައި އެވޯޑާ ހަވާލުވެވަޑައިގަތުމަށް ފަހު ރައީސް ޔާމީން ވިދާޅުވީ މީގެ ކުރިން ދެ ރައީސުން ހޯއްދަވާފައިވާ އެ އެވޯޑު އެމަނިކުފާނަށް އެރުވުމަކީ ލިބިވަޑައިގަންނަވާ ވަރަށް ބޮޑު ފަހުރެއް ކަމަށެވެ. އަދި އެއީ، ހައްދުފަހަނަޅައި ދިއުމާއި ޓެރަރިޒަމާ ދެކޮޅަށް މި ސަރުކާރުން ކުރާ މަސައްކަތަށް ލިބުނު އިތުރު ހިތްވަރެއް ކަމަށް ރައީސް ވިދާޅުވި އެވެ.

އިސްލާމްދީނުގެ މެދު މިނުގެ އުސޫލްތައް ކުރިއަރުވައި ޓެރަރިޒަމާއި ހައްދުފަހަނަޅައި ދިއުމާ ދެކޮޅަށް ރާއްޖެ އިން ކާމިޔާބު މަސައްކަތްތަކެއް ކުރަމުން އަންނަ ކަން ރައީސް ފާހަގަކުރެއްވި އެވެ. އޭގެ ތެރޭގައި، 2016 ގައި އުފެއްދި ނެޝަނަލް ކައުންޓަ ޓެރަރިޒަމް ސެންޓަރު (އެންސީޓީ) ހިމެނޭ ކަމަށް ރައީސް ވިދާޅުވި އެވެ.

އެމަނިކުފާނު ވިދާޅުވީ ދުނިޔޭގެ އެކި ކަންކޮޅުތަކުގައި، ވަރަށް ނިކަމެތި ހާލަތުގައި މުސްލިމުން އުޅޭ ކަމަށާއި އޭގެ ތެރޭގައި ފަލަސްތީނާއި ސީރިއާ އާއި ޔަމަން އާއި ރޮހިންޖާ ފަދަ ގައުމުތަކުގެ މުސްލިމުން ހިމެނޭ ކަމަށެވެ. އެ ހާލަތުގައި ތިބި އަޚުންނާއި އުޚުތުންނަށް އެހީވުމަކީ މުސްލިމުންގެ ޒިންމާއެއް ކަމަށް ރައީސް ވިދާޅުވި އެވެ.

ރައީސް ޔާމީން ވިދާޅުވީ މުސްލިމް އުއްމަތުގެ ބަޔަކު ހިތްދަތި ކަމުގައި ހޭދަކުރުމަކީ އެހެން ހުރިހާ މުސްލިމުންނަށް ވެސް އޮތް ހިތްދަތި ކަމެއް ކަމަށާއި މުސްލިމުން ބަލިކުރަން ގިނަ މަސައްކަތްތަކެއް ކުރަމުން އަންނަ ކަމަށެވެ.

މީގެކުރިން ނުހިނގާ ފަދަ ކަންކަން އިސްލާމްދީނާ ދެކޮޅަށް ކުރަމުން އަންނަ ކަން ފާހަގަކުރައްވައި ރައީސް ޔާމީން ވިދާޅުވީ އެ މަސައްކަތް ހުއްޓުވައި ކާމިޔާބު ހޯދޭނީ އެންމެން އެއްބައިވަންތަވެގެންނެވެ. އެގޮތުގައި އެ މަސައްކަތްކުރަން ޖެހޭ ސަބަބުތަކެއް ހުރި ކަން ވެސް ރައީސް ފާހަގަކުރެއްވި އެވެ.

އެމަނިކުފާނު ވިދާޅުވި ގޮތުގައި އިސްލާމްދީނަކީ އިންސާފާއި ހަމަހަމަކަމާއި އަމާންކަމުގެ ދީނެވެ. އެ މަގަށް މުސްލިމް އުއްމަތް މިސްރާބު ޖަހަން ޖެހޭ ކަން ރައީސް ފާހަގަކުރެއްވި އެވެ.

އިންޓަނޭޝަނަލް މޮޑެރޭޝަން ފޯރަމަކީ އިސްލާމް ދީނާއި އެހެން ދީންތައް ވެސް ހިމެނޭ ގޮތަށް 2002 ގައި އުފެއްދި ހަރަކާތެވެ. އެ ހަރަކާތް ހިންގަނީ ޖޯޑަންގެ ރަސްގެފާނު އަބްދުﷲ ބިން ހުސައިންގެ ބެއްލެވުމުގެ ދަށުންނެވެ. ދުނިޔޭގެ ވަރަށް ގިނަ ގައުމުތަކުގެ ޔުނިވަސިޓީތަކާ އެކު ދުނިޔޭގެ އެކި ކަންކޮޅުތަކުގެ ގިނަ އިލްމުވެރިން ބައިވެރިވެވަޑައިގަންނަވަ އެވެ.

މި ހަރަކާތް އުފެއްދި ފަހުން މި އެވޯޑު މިހާތަނަށް ލިބިފައި ވަނީ ދެ ބޭފުޅަކަށެވެ. އެއީ މޮރިޓޭނިއާގެ ކުރީގެ ރައީސް މުހައްމަދު ބިން އަބްދުލްއަޒީޒާއި ސައޫދީ އަރަބިއްޔާގެ ކުރީގެ ރަސްގެފާނު އަބްދުﷲ ބިން އަބްދުލް އަޒީޒް އެވެ. މި ދެ ބޭފުޅުންނަށް ފަހު، ރައީސް ޔާމީނަށް މި އެވޯޑު ލިބިވަޑައިގަތީ، ޓެރަރިޒަމާއި ހައްދުފަހަނާޅައިދިއުން ހުއްޓުވައި އިސްލާމް ދީން ކުރިއަރުވަން ކުރައްވާ މަސައްކަތްޕުޅަށެވެ.