ވަޒީފާގައި ވަގުތީ ގޮތުން އުޅުނަސް ތަޖުރިބާ ހުރި ކަމަށް ބެލެވޭނެ: ހައި ކޯޓް

ސިވިލް ސާވިސްގެ ވަޒީފާތަކަށް މީހުން އައްޔަން ކުރުމުގައި ރޭންކްތަކުގެ މަަސައްކަތުގެ ތަޖުރިބާ ހުރިތޯ ބެލުމުގައި، އެ ރޭންކްތަކުގައި ވަގުތީ ގޮތުން މަސައްކަތް ކުރާ ކުރުން ވެސް ހިމެނޭނެ ކަމަށް ހައި ކޯޓުން ހުކުމްކޮށްފި އެވެ.

އެ ކޯޓުން މިދިޔަ ބުރާސްފަތި ދުވަހު އެގޮތަށް ކަނޑައެޅީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ޑެޕިއުޓީ ޑިރެކްޓަ ޖެނެރަލްގެ ވަޒީފާ އަށް ކުރިމަތިލި މީހަކަށް ވަޒީފާ ހަމަޖެހުނު ކަން އެންގުމަށް ފަހު، އޭނާ މަގާމަށް ޝަރުތު ހަމަނުވާ ކަމަށް ކަނޑައެޅި މައްސަލައެއްގަ އެވެ.

އެ މަގާމަށް އެ މީހާ ޝަރުތު ހަމަނުވާ ކަމަށް އެންގީ އެ މަގާމުގެ ޝަރުތެއް ކަމަށްވާ އީ އެކްސް ރޭންކް 1 އިން ފެށިގެން މަތީ ރޭންކެއްގައި ދެ އަހަރުގެ ތަޖްރިބާ ލިބިފައިވާ ނެތުމުންނެވެ. އެ މީހާއަކީ އެ ރޭންކުގެ މަގާމެއްގައި ވަގުތީ ގޮތުން މަސައްކަތްކުރި މީހެއް ކަމަށް ވިޔަސް، ސިވިލް ސާވިސް ކޮމިޝަން (ސީއެސްސީ) އިން ބެލީ ވަގުތީ ގޮތުން މަސައްކަތް ކުރާ ކުރުމަކީ މަސައްކަތުގެ ތަޖްރިބާ ހުރުން ކަމަށް ނުބެލެވޭނެތީ އޭނާ އެ މަގާމަށް ޝަރުތު ހަމަނުވާ ކަމަށެވެ.

އެ މައްސަލާގައި ވަޒީފާއާ ބެހޭ ޓްރައިބިއުނަލުން ނިންމީ އެ މީހާ މަގާމަށް ޝަރުތު ހަމަވާ ކަމަށާއި އެހެންވެ އެ ވަޒީފާ އަށް އެ މީހާ އައްޔަން ކުރުމަށެވެ. އެ މައްސަލަ ސީއެސްސީން ހައި ކޯޓުގައި އިސްތިއުނާފްކުރީ ވަގުތީ ގޮތުން ވަކި ރޭންކެއްގައި މަސައްކަތް ކުރާ ކުރުމަކީ އެ ރޭންކެއްގެ މަސައްކަތުގެ ތަޖުރިބާ ހުރުން ކަމަށް ނުބެލެވޭނެ ކަމަށް ބުނެ އެވެ.

ޓްރައިބިއުނަލްގެ ނިންމުމަށް ތާއީދުކޮށް ހައި ކޯޓުން ކުރި ހުކުމުގައިވަނީ ސިވިލް ސާވިސްގެ ވަޒީފާތަކަށް މީހުން ހޮވުމާއި އައްޔަން ކުރުމުގެ އުސޫލަށް ބަލާއިރު، ވަކި ރޭންކެއްގެ މަސައްކަތުގެ ތަޖްރިބާ ހުރިކަމުގައި ބެލެވޭނީ ދާއިމީ ގޮތެއްގައި އެ ރޭންކެއްގައި މަސައްކަތް ކުރާ މުވައްޒަފުން އެކަނި ކަން އެ އުސޫލުން އެނގެން ނެތް ކަމަށެވެ. އެހެންވެ، މަގާމު ދާއިމީކޮށް ހަމަޖެހިފައި ނުވިޔަސް، އެ މަގާމެއްގެ މަސައްކަތް މުވައްޒަފަކާ ހަވާލު ކޮށްފައިވާ ނަމަ، އެ ރޭންކެއްގެ މަސައްކަތުގެ ތަޖްރިބާ މުވައްޒަފުގެ ކިބައިގައި ހުރީ ކަމަށް ބަލަންޖެހޭ ކަމަށް އެ ހުކުމުގައިވެ އެވެ.

އެ ހުކުމުގައިވާ ގޮތުން މަސައްކަތުގެ ތަޖްރިބާ ހުރިތޯ ބެލުމުގެ މައިގަނޑު މަގްސަދަކީ އެ މީހަކީ ވަކި ރޭންކެއްގައި ދާއިމީކޮށް މަސައްކަތް ކުރި މުވައްޒަފެއްތޯ ކަށަވަރު ކުރުމެއް ނޫނެވެ. އޭގެ ބޭނުމަކީ އިއުލާން ކުރެވިފައިވާ ވަޒީފާއާ ގުޅޭ މަސައްކަތެއް ކަނޑައެޅިފައިވާ ރޭންކެއްގައި ތަޖްރިބާ ލިބިފައިވޭތޯ ކަށަވަރު ކުރުން ކަމަށާއި އެކަން ސިވިލް ސާވިސްގެ އުސޫލުން ވެސް އެނގޭ ކަމަށް އެ ހުކުމުގައިވެ އެވެ.

ވަގުތީ ގޮތުން ވަކި ރޭންކެއްގައި މަސައްކަތް ކުރުމަކީ އެ ރޭންކެއްގެ މަސައްކަތުގެ ތަޖްރިބާ ހުރުން ކަމަށް ނުބެލެވޭނެ ކަމަށް ދައުލަތުން ބުނެފައިވާއިރު، ސީއެސްސީން ކުރިން އަމަލު ކުރަމުން އައީ އެގޮތަށް ކަން އެނގޭނެ ނިންމުމެއް ނުވަތަ ލިޔުމެއް ހުށަހަޅަން ދައުލަތަށް ފުރުސަތު ދިން ކަމަށާއި އެކަމަކު އެފަދަ ލިޔުމެއް ހުށަހެޅިފައިނުވާ ކަމަށް ވެސް ތިން ފަނޑިޔާރުންގެ އިއްތިފާގުން ކުރި އެ ހުކުމުގައިވެ އެވެ.

މީގެ އިތުރުން މައްސަލާގައި މަގާމަށް ކުރިމަތިލި މީހާ ވަޒީފާއަށް ހޮވުނު ކަން ހެލްތް މިނިސްޓްރީން އަންގާފައި އޮތުމުން އެކަމުން ވެސް އެނގެނީ ވަގުތީ ގޮތުން މަސައްކަތް ކޮށްފައިވާ ނަމަ އެ ރޭންކެއްގެ މަސައްކަތުގެ ތަޖްރިބާ ހުރީ ކަމަށް ހެލްތު މިނިސްޓްރީން ވެސް ގަބޫލު ކުރާކަން ކަމަށް އެ ހުކުމުގައިވެ އެވެ.