ކުންނާރު އޮށެއް ކަރުގައި ތާށިވެގެން ކުއްޖަކު މަރުވެއްޖެ

ނ. ކެނދިކުޅުދޫގައި އުމުރުން ހަ އަހަރުގެ ކުއްޖަކު ކެއި ކުންނާރު އޮށެއް ކަރު ތެރޭގައި ތާށިވެގެން އެ ކުއްޖާ މިރޭ މަރުވެއްޖެ އެވެ.

މި ހާދިސާގައި މަރުވެފައި ވަނީ އެ ރަށު ގޮނޑުމަތީގެއާގޭ، އައިޝަތު އާލާ އަންވަރެވެ،

ކެނދިކުޅުދޫ ކައުންސިލްގެ މެމްބަރަކު "މިހާރު" އަށް ވިދާޅުވީ މިރޭ 7:00 ހާއިރު އާލާ މަރުވީ ކަރު ތެރޭގައި ކުންނާރު އޮށް ތާށިވެ، ނޭވާލާން ވަރަށް ބޮޑަށް އުނދަގޫވެގެން ކަމަށެވެ.

"ސިއްހީ މަރުކަޒަށް ގެނައިއިރު ވެސް އާލާ ނޭވާލަމުން ދިޔައީ ވަރަށް ކުޑަކޮށް. މަރުކަޒަށް ގެންދިޔަ ތަނާހެން ނޭވާލުން އެއްކޮށްހެން ހުއްޓުނު،" ކައުންސިލް މެމްބަރު ވިދާޅުވި އެވެ.

އޭނާ ވިދާޅުވި ގޮތުގައި އާލާ އަށް ދެވެން އޮތް އެންމެ ރަނގަޅު ފަރުވާއެއް ކެނދިކުޅުދޫ ސިއްހީ މަރުކަޒުން ދިނެވެ. އެކަމަކު ފުރާނަ ސަލާމަތް ކުރެވޭ ގޮތް ނުވީ ކަމަށް ކައުންސިލް މެމްބަރު ވިދާޅުވި އެވެ.

އާލާ ކުންނާރު ކެއީ، ގޭދޮށުގައި ކުޅެން އުޅުނު ކުދިންތަކަކާ އެކު ހަވީރު ކުޅެން އުޅެފައި ކަމަށް ކައުންސިލް މެމްބަރު ވިދާޅުވި އެވެ. ކުންނާރު އޮށް ކަރު ތެރޭގައި ތާށިވެގެން ފުރަތަމަ ދިޔައީ އާލާގެ މަންމަ ކައިރި އަށް ކަމަށް ވެސް އޭނާ ވިދާޅުވި އެވެ.