އުއްޗު އާއި ދެ މިނިސްޓަރަކު ހެނބަދު އަށް ވަޑައިގެންނެވި ސީޕްލޭންގެ ކަނދެއްގައި ނަގިއްޔަކުން ޖެހި ގެއްލުން ވެއްޖެ

ބައެއް މިނިސްޓަރުންނާއި މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) މިއަދު ނ. ހެނބަދު އަށް ވަޑައިގެންނެވި ޓްރާންސް މޯލްޑިވިއަން އެއާވޭސް (ޓީއެމްއޭ)ގެ ސީޕްލޭނެއްގެ ކަނދެއްގައި ނަގިއްޔަކުން ޖެހި ގެއްލުން ވެއްޖެ އެވެ.

ޓީއެމްއޭގެ އޮފިޝަލަކު ވެސް އެކަން ޔަގީންކޮށްދެއްވި އެވެ. އެކަމަކު، އިތުރު ތަފްސީލެއް ނުދެއްވަ އެވެ.

އުއްޗުއާ އެކު އެ ދަތުރުގައި ޓޫރިޒަމް މިނިސްޓަރު މޫސާ ޒަމީރާއި ހެލްތު މިނިސްޓަރު އަބްދުﷲ ނާޒިމް އަދި ރާއްޖޭގައި ހުންނަވާ އިންޑިއާގެ ސަފީރު އަކިލޭޝް މިޝްރާ ވެސް ބައިވެރިވެވަޑައިގަތެވެ.

ހެނބަދޫ ކައުންސިލް މެމްބަރަކު "މިހާރު" އަށް މިރޭ ވިދާޅުވީ ސީޕްލޭން އެ ރަށަށް ކައިރިކޮށް، ދަތުރުކުރި ފަސިންޖަރުން ފޭބި ފަހުން، ބޯޓުގެ ކަނދެއްގައި ނަގިއްޔަކުން ޖެހި ގެއްލުންތަކެއް ލިބުނު ކަމަށް މައުލޫމާތު ލިބިފައިވާ ކަމަށެވެ. އަދި އެ ވަގުތު ރަށުގެ ރައްޔިތުން ބޯޓުގައި ވާޖަހައި ދަމާ ގޮނޑުދޮށަށް އެހެލި ކަމަށް ވެސް އޭނާ ވިދާޅުވި އެވެ.

"އަދިވެސް ބޯޓު އެބައޮތް މި ރަށުގެ ގޮނޑުދޮށުގައި،" ކައުންސިލަރު ވިދާޅުވި އެވެ.

"މިހާރު" އަށް ލިބިފައިވާ ބައެއް ފޮޓޯތަކުން ފެންނަ ގޮތުގައި ބޯޓުގެ ދެ ފަރާތުގައި ވާ ޖަހައިގެން އެއްގަމަށް އެހެލިއިރު ގިނަ އަދަދެއްގެ މީހުން އެ ސަރަހައްދަށް ޖަމާވެފައި އޮތެވެ.

ކައުންސިލް މެމްބަރު ވިދާޅުވީ އުއްޗު ކޮންމެ އަހަރަކު އެއް ފަހަރު ހެނބަދު އަށް ވަޑައިގެން ގިނަ އަދަދެއްގެ ބަޔަކަށް ރޭގަނޑުގެ ކެއުން ދެއްވުމުގެ އިތުރުން މިއުޒިކް ޝޯއެއް ވެސް ބާއްވާ ކަމަށެވެ. އަދި މިރޭ އެ ރަށުގައި ހަވާ އެރުވުން ވެސް އެބައޮތް ކަމަށް އޭނާ ވިދާޅުވި އެވެ.

މިއީ އުއްޗު ހެނބަދު އަށް ވަޑައިގެން، އެ ހަރަކާތްތައް ކުރިއަށް ގެންދަވާ ހަތަރު ވަނަ އަހަރު ކަމަށް ވެ އެވެ.