އެސްޓީއޯގެ ފައިދާ އިން ހިއްސާއަކަށް 55ރ. ބަހަނީ

އެސްޓީއޯގެ މިދިޔަ އަހަރުގެ ފައިދާ އިން ހިއްސާއަކަށް 55ރ. ބަހަން އެ ކުންފުނީގެ ޑިރެކްޓަރުންގެ ބޯޑުން އިއްޔެ ނިންމައިފި އެވެ.

ތެލާއި ގޭހައި ބޭސް އަދި ކާޑުގެ ބާވަތްތައް އެންމެ ފުޅާ ދާއިރާއެއްގައި އެތެރެ ކޮށް ވިއްކާ ކުންފުނިން މިދިޔަ އަހަރުގެ ފައިދާ އިން ހިއްސާއަކަށް 55ރ. ބަހަން ނިންމި އިރު، އެ ކުންފުނީގެ އަހަރީ ރިޕޯޓު އަދި ހާމައެއް ނުކުރެ އެވެ.

އެ ކުންފުނިން މިދިޔަ އަހަރު ހިއްސާގެ ފައިދާގެ ގޮތުގައި ބަހާފައި ވަނީ ހިއްސާއަކަށް 51ރ. އެވެ. އެ ކުންފުންޏަށް 2016 ވަނަ އަހަރު ފައިދާގެ ގޮތުގައި 288 މިލިއަން ރުފިޔާ ލިބިފައިވާ ކަމަށް ތަފާސްހިސާބުތަކުން ދައްކަ އެވެ.

އެސްޓީއޯ އަށް މިދިޔަ އަހަރު ސާފު ފައިދާގެ ގޮތުގައި ލިބުނު މިންވަރު ސާފު ވާނީ އެ ކުންފުނީގެ އަހަރީ ރިޕޯޓާއެކު މާލީ ހިސާބުތައް ވެސް އާއްމު ކުރުމުންނެވެ.