މާލޭގައި މީހުން ދިރިއުޅޭ ނިކަމެތި ހާލު ރައީސް ޔާމީނަށް އެނގިވަޑައެއް ނުގަންނަވާ: ޝާހިދު

މާލޭގައި މީހުން ދިރިއުޅޭ ނިކަމެތި ހާލު ކުޑަކޮށް ވެސް ރައީސް އަބްދުﷲ ޔާމީނަށް އެނގިވަޑައިނުގަންނަވާ ކަމަށް ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު މިއަދު ވިދާޅުވެއްޖެ އެވެ.

މާލޭގައި ބިން ފުރި، ތޮއްޖެހިފައިވާ ކަމަށް ގަބޫލުފުޅު ނުކުރައްވާ ކަމަށާއި އެތައް އިމާރާތްތަކެއް ކުރިއަށް އޮތް ތަނުގައި ވެސް ފެންނާނެ ކަމަށް ރައީސް ޔާމީން އިއްޔެ ވިދާޅުވުމުން އޭގެ ރައްދުގައި ޝާހިދު ކުރެއްވި ޓުވީޓެއްގައި އެދިވަޑައިގަތީ މާލޭގައި ދިރިއުޅޭ މީހުންގެ ގާތަށް ވަޑައިގެން ހާލަތު އޮޅުން ފިލުއްވުމަށެވެ. އެކަން ނުކުރައްވައި ދައްކަވާ ވާހަކަފުޅުތަކުން، މާލޭގައި ރައްޔިތުން ދިރިއުޅޭ ގޮތް ރައީސް ޔާމީނަށް އެނގިވަޑައިނުގަންނަވާ ކަން ފަޅާއަރާފައިވާ ކަމަށް ޝާހިދު ވިދާޅުވި އެވެ.

"ރުހުމެއް ހުރިއްޔާ، ރައްޔިތުންގެ ގާތަށް ވަޑައިގެން ބައްލަވާ،" އޭނާ ވިދާޅުވި އެވެ.

"ގިނަ މީހުން ނިދަނީ ދަންފަޅި ބަހައިގެން. މުޅި ރަށް ގޮނޑަކަށް ވެއްޖެ. ފިތިބާރުވެ ނޭވޭލަނީ އެކަކު އަނެކަކުގެ މޫނަށް. މުޅި ރަށުގައި ރޯގާ."

މި ސަރުކާރުގެ ހަތަރު އަހަރުގެ ތެރޭގައި ހިންގާފައިވާ މަޝްރޫއުތަކާ ގުޅޭ ގޮތުން ރައީސް އޮފީހުން ތައްޔާރު ކޮށްފައިވާ "ރަށްވެހި ތަރައްގީ ފޮތް" އިފުތިތާހު ކޮށްދެއްވައި ރައީސް ޔާމީން ވިދާޅުވީ މާލެ އަކީ ބިން ފުރިފައިވާ ރަށެއް ކަމަށް ވެސް ގަބޫލުފުޅު ނުކުރައްވާ ކަމަށެވެ.

"މާލެ އަކީ ފުރިބާރުވެފައި އޮތް ތަނެއް ކަމަށް އަޅުގަނޑުމެން ގަބޫލު ކުރިން. މާލެ އަކީ އޭގެ ޒާތުގައި އުއްމީދެއް ދިރުމެއް ނެތް ތަނެއް ކަމަށް އަޅުގަނޑުމެން ގަބޫލު ކުރިން. އެހެން ނަމަވެސް މާލެ އަށް ބަދަލުތައް އަންނަ އައުމަކީ ތަސައްވުރަކާ އެކުގައި އައުމުން އަޅުގަނޑުމެންނަށް ކުރަން މަޖުބޫރުވި ކަމެއް. މާލޭގެ ކުނިގަނޑު މިއަދު އެބައޮތްތޯ؟ މާލޭގައި ބިން ނެތިގެން މިއަދު އެބައުޅެންތޯ؟" ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި ސަރުކާރުން ހުޅުވާލި އެ ހުއްދައާ އެކު މާލޭގައި 25 ބުރީގެ އެތައް އިމާރާތްތަކެއް ހަދާ މަންޒަރު ފެންނާނެ އެވެ. އެ އިމާރާތްތަކަށް ޖާގަ އެބައޮތް ކަމަށް ވެސް ވިދާޅުވި އެވެ.