ގާނޫނީ ބަސްތަކުގެ ރަދީފެއް ނެރެފި

ކުރީގެ ބަންޑާރަ ނައިބު ހުސްނުއްސުއޫދު ލިޔުއްވާފައިވާ "ގާނޫނީ ރަދީފު" ފޮތް ނެރެ އެ ފޮތުގެ އެންޑްރޮއިޑް އެޕްލިކޭޝަން މިއަދު ލޯންޗްކޮށްފި އެވެ.

މޯލްޑިވްސް ލޯ އިންސްޓިޓިއުޓްގައި މިއަދު ބޭއްވި ހަފުލާއެއްގައި އެ ފޮތް ނެރެދެއްވީ ބ. އޭދަފުށީގެ ކުރީގެ ކަތީބު އަލީ ޔަހްޔާ އެވެ. އެ ހަފުލާގައި ކުރީގެ ޕްރޮސިކިއުޓާ ޖެނެރަލް އަހުމަދު މުއިއްޒާއި ކުރީގެ ޑެޕިއުޓީ ޕްރޮސިކިއުޓާ ޖެނެރަލް ހުސައިން ޝަމީމް ބައިވެރިވެ ވަޑައިގަތެވެ.

އެ ފޮތުގައި ގާނޫނީ ބަސްތަކުގެ މާނަ ތަފްސީލާއެކު ހިމަނާފައިވެ އެވެ. އިނގިރޭސީން ބޭނުންކުރާ ބަސްތަކާ އެކު އެފޮތުގައި 1200 އަށްވުރެ ގިނަ ބަސް ހިމެނެ އެވެ.

ފޮތުގެ އެންޑްރޮއިޑް އެޕްލިކޭޝަން މިހާރު ހިލޭ ޑައުންލޯޑް ކުރެވޭނެ އެވެ. އަދި އައިއޯއެސް އެޕްލިކޭޝަން ވެސް މާ ލަސްތަކެއް ނުވެ ލޯންޗްކުރަން ވަނީ ނިންމައިފަ އެވެ.

އެ ފޮތާ ގުޅޭގޮތުން ސުއޫދު ވިދާޅުވީ މޯލްޑިވްސް ލޯ އިންސްޓިޓިއުޓްގެ ފަރާތުން އެ މަސައްކަތް ކުރަން އޭނާ ނިންމެވީ ދިވެހި ބަހުގެ އެކަޑަމީން ބަހުގެ ރަދީފް ހެދުމަށް އެކަށީގެންވާ މަސައްކަތް ނުކުރާތީ ކަމަށެވެ. އޭނާގެ މަގުސަދަކީ ރާއްޖެ އާއި ރާއްޖެއިން ބޭރުން ގާނޫނީ ގޮތުން ތައުލީމް ހާސިލްކުރާ މީހުންނަށް ގާނޫނީ ބަސްތަކުގެ މާނަ ފަސޭހައިން އެނގޭނެ ގޮތެއް ހަމަޖެއްސުން ކަމަށް ވިދާޅުވި އެވެ.

"މި ފޮތުގައި މާނަ އާއި ޑެފިނީޝަން ހިމަނާފައި ވާނެ. އަދި އެ ބަހަށް އިނގިރޭސި ބަހުން ބޭނުންކުރާ ބަސް ވެސް ލިޔެފަ ވާނެ،" ސުއޫދު ވިދާޅުވި އެވެ.

އެފޮތުގައި ގާނޫނީ ދާއިރާގެ ބަސްތަކުގެ އިތުރުން މާލީ ދާއިރާ އާއި ބެންކިން ދާއިރާގައި ބޭނުންކުރާ ބަސްތައް ވެސް ހިމެނޭ ކަމަށް ސުއޫދު ވިދާޅުވި އެވެ.

އެ ފޮތް ބުކްޝޮޕްތަކުން 200ރ. އަށް ވިއްކާއިރު ގިނަ ފޮތްތަކެއް ހިލޭ ބެހުމަށް ވެސް މޯލްޑިވްސް ލޯ އިންސްޓިޓިއުޓުން ވަނީ ނިންމައިފަ އެވެ.

ސުއޫދު އާއި ވަކީލް މުހައްމަދު ޝަހުދީ އަންވަރު، އުފައްދާފައިވާ މޯލްޑިވްސް ލޯ އިންސްޓިޓިއުޓްގެ ފަރާތުން މީގެ ކުރިން ވަނީ ބިމާ ބެހޭ ގާނޫނީ ފޮތަކާއި ވަޒީފާއާ ބެހޭ ގާނޫނީ ފޮތެއް ވެސް ނެރެފަ އެވެ.