މެޑިކަލް އިންޓާންޝިޕަށް އައިޖީއެމްއެޗުން ފުރުސަތު ހުޅުވާލައިފި

އައިޖީއެމްއެޗްގެ މެޑިކަލް އިންޓާންޝިޕް ޕްރޮގްރާމުގައި ބައިވެރިވާން ބޭނުންވާ މީހުން އެކަމަށް އެދި ހުށަހެޅުމުގެ ފުރުސަތު މިއަދު ހުޅުވާލައިފި އެވެ.

އެ ހޮސްޕިޓަލުން ކުރި އިއުލާނުގައި ބުނީ، މެޑިކަލް އިންޓާންޝިޕްގެ ދެ ވަނަ ބުރަށް ފަސް ޖާގަ ކަނޑައަޅާފައިވާ ކަމަށެވެ. އަންނަ މަހު ތިނެއްގެ ކުރިން އެކަމަށް އެދި ހުށަހަޅަން ޖެހޭނެ ކަމަށް ވެސް އިއުލާނުގައި ވެ އެވެ.

ޑޮކްޓަރުކަން ކިޔަވާ ދަރިވަރުން ތަމްރީނު ކުރުމުގެ ޕްރޮގްރާމް ނުވަތަ މެޑިކަލް އިންޓާންޝިޕް އައިޖީއެމްއެޗްގައި ފެށީ މިދިޔަ ޖެނުއަރީ މަހެވެ. އިންޓާންޝިޕްގެ ފުރަތަމަ ބުރުގައި ހަ ދަރިވަރަކު ބައިވެރިވި އެވެ. އޭގެ ތެރޭގައި ނައިޖީރިޔާގެ ދަރިވަރަކު ވެސް ހިމެނެ އެވެ.

ޑޮކްޓަރުކަން ކިޔަވާ ދަރިވަރުންނަށް ޑޮކްޓަރު ކަމުގެ ފާސް ލިބޭނީ މެޑިކަލް އިންޓާންޝިޕް ފުރިހަމަ ކުރުމުންނެވެ. އެއީ ފަހެއް ނުވަތަ ހަ އަހަރު ޑޮކްޓަރުކަން ކިޔެވުމަށް ފަހު ތަމްރީނު ހޯދުމުގެ އެއް އަހަރުގެ ޕްރޮގްރާމެކެވެ.

ސަރުކާރުގެ މައި ހޮސްޕިޓަލް، އައިޖީއެމްއެޗްގައި މެޑިކަލް އިންޓާންޝިޕް ފެށި އިރު، ރާއްޖޭގައި ޑޮކްޓަރުން ތަމްރީނުކުރުމުގެ ކޯސް ފެށުމަށް ވެސް އަންނަނީ ތައްޔާރުވަމުންނެވެ.

މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) އިން ހިންގާ ޑޮކްޓަރުން ތަމްރީނުކުރުމުގެ ކޯސް އަންނަ މަހު ފަށާނެ އެވެ. އެ ކޯހަށް ބޮޑު ތަރުހީބެއް ލިބެމުން އަންނަ ކަމަށް ވެސް އެ ޔުނިވާސިޓީން ބުންޏެވެ.