ހުޅުމާލޭގައި ޖަގަހަ ހުޅުވަން، އަވަށްޓެރިންގެ ޕެޓިޝަނެއް ގެންނަން އެޗްޑީސީން އެންގި: އިދިކޮޅު ކޯލިޝަން

ހުޅުމާލޭގައި އިދިކޮޅު ކޯލިޝަނުން ޖަގަހައެއް ހުޅުވުމުގެ ހުއްދައަށް އެދުމުން، އެތަނުގެ ވަށައިގެން ހުރި ގެތަކުގެ މީހުންގެ ޕެޓިޝަނެއް ހުށަހަޅަން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން އެންގި ކަމަށް އިދިކޮޅު ކޯލިޝަނުން މިރޭ ބުނެފި އެވެ.

ރިޔާސީ އިންތިހާބަށް ކެމްޕޭން ކުރުމަށް، އިދިކޮޅު ކޯލިޝަނުން މިރޭ ވަނީ ހުޅުމާލޭގައި އާ ޖަގަހައެއް ހުޅުވާފަ އެވެ. ކުރިން އެ އަވަށުގައި ހުރި، ކޯލިޝަންގެ ޖަގަހަތައް އެޗްޑީސީން ވަނީ ބަންދުކޮށްފަ އެވެ.

ހުޅުމާލޭގެ 57 ވަނަ ފްލެޓް ކުރިމަތީގައި، "އިއްތިހާދު ހަރުގެ" ނަމުގައި މިރޭ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އެމްޑީޕީގެ ޗެއާޕާސަންގެ ނައިބު އަލީ ނިޔާޒް ވިދާޅުވީ، ޖަގަހަ ހެދުމުގެ ހުއްދައަށް އެދުމުން، އެތަނުގެ ސަބަބުން ކައިރި އަވަށްޓެރިންނަށް އުނދަގޫ ނުވާނެ ކަމަށް އަވަށްޓެރިން އެއްބަސްވާ ޕެޓިޝަނެއް ހުށަހެޅުމަށް (ޖަގަހަ ހުރި) ގޭގެ ވެރިފަރާތަށް އެޗްޑީސީން އެންގި ކަމަށެވެ.

"މި މިންވަރަށް ކަންތައްތައް ދިޔުމަކީ ވަރަށް ހެއްވާ ކަމެއް. ހަގީގަތުގައި އެޗްޑީސީގެ ކިބައިން އަޅުގަނޑުމެން އެއްވެސް ހުއްދައެއް ނަގާކަށް ނުޖެހޭނެ. އަޅުގަނޑުމެންނަށް ލިބިފައިވާ ހުއްދަ އަކީ ކެންޑިޑޭޓް ނަމްބަރު ދޭއް،" ގިނަ އަދަދެއްގެ ބަޔަކު ބައިވެރިވި އެ ރަސްމިއްޔާތުގައި ނިޔާޒް ވިދާޅުވި އެވެ.

އޭނާ ވިދާޅުވީ ރާއްޖޭގެ ހުރިހާ ހިސާބެއްގައި ވެސް އެ ކެންޑިޑޭޓަށް ކެމްޕޭން ކުރުމުގެ ހުއްދަ، އިންތިހާބާ ބެހޭ ގާނޫނުތަކުގެ ދަށުން ލިބިދޭ ކަމަށާއި އެޗްޑީސީ ކިޔާ ކުންފުންޏަކަށް އެކަން ނުހުއްޓުވޭނެ ކަމަށެވެ. އަދި އެގޮތަށް އަމަލު ކުރާނަމަ، އެތަން "ހަމަބިމަށް ތިރިކުރަން ޖެހޭ" ކަމަށް ވިދާޅުވި އެވެ.

ނިޔާޒު ވިދާޅުވީ ހުޅުމާލޭގައި އިދިކޮޅު ފަރާތްތަކުން ކެމްޕޭން ކުރުމުގެ ފުރުސަތު އެޗްޑީސީން ނުދޭތީ، އެކަން އޭނާ އަމިއްލަ ގޮތުން ވެސް އިލެކްޝަންސް ކޮމިޝަނަށް ހުށަހަޅާފައިވާ ކަމަށެވެ. އަދި ކެމްޕޭންތަކަށް ހުރަސް އެޅުން ހުއްޓާލުމަށް، އެމްޑީޕީގެ ފަރާތުން އެޗްޑީސީއަށް ހުށަހަޅާފައިވާ ކަމަށް ވެސް ވިދާޅުވި އެވެ.

"ހުޅުމާލެއަކީ މާލެ ސިޓީގެ އަވަށެއް. އެތަނުގެ މޭޔަރު ހުންނެވި އިރު، މިއީ އެތަނުގެ އިހްތިސޯސްގެ ތެރޭގައި ހިމެނޭ ތަނެއް. މި ތަނަށް ކުންފުންޏެއްގެ ބާރެއް ނުހިނގާނެ. އެ ކުންފުނީގެ ބާރު ހިނގަނީ ކީއްވެތޯ ބަލައި، އެކަން ނެތިކޮށްލުމަށް ފަހު، އިންތިހާބާ ބެހޭ ގާނޫނުގެ ދަށުން ލިބިފައިވާ ކެމްޕޭން ކުރުމުގެ ބާރު ހުޅުވައިދިނުމަށް އަޅުގަނޑުމެން ފުލުހުން ގާތު ވާނީ އެދިފައި،" އެ ގާނޫނާ ހިލާފަށް، ކެމްޕޭނަށް ހުރަސް އެޅުމަކީ ކުށެއް ކަމަށް ސިފަ ކުރައްވަމުން ނިޔާޒް ވިދާޅުވި އެވެ.

ހުޅުމާލޭގައި އިދިކޮޅު ކޯލިޝަނުން ހިންގި ދެ ޖަގަހައިގެ ތެރެއިން އެއް ތަން، އެޗްޑީސީން ބަންދު ކުރީ 10،000 ރުފިޔާ އަށް ޖޫރިމަނާ ކުރުމަށް ފަހު އެވެ. ނިރޮޅުމަގުގައި ހުރި އަމިއްލަ މީހެއްގެ އެ އިމާރާތް، ޖޫރިމަނާ ކުރީ، އެ ކުންފުނިން ނަގަން ޖެހޭ ''އިމާރާތް ބޭނުން ކުރުމުގެ ހުއްދަ'' ނުނަގާ ކަމަށް ބުނެ އެވެ.

އަދި އަނެއް ތަން ވެސް، ބަންދު ކުރީ ޖޫރިމަނާ ކުރާނެ ކަމުގެ އިންޒާރާއެކުގަ އެވެ.

އެޗްޑީސީން އޭރު ބުނިގޮތުގައި ހުޅުމާލޭގައި ހުންނަ ބިންތަކަށް ވަންނަ ނަމަ، އެޗްޑީސީގެ ގަވައިދާ އެއްގޮތަށް ހުއްދަ ނަގަން ޖެހޭނެ އެވެ. އެކަމަކު އަމިއްލަ ބައެއްގެ ބިންތަކެއްގައި އިދިކޮޅު ކޯލިޝަންގެ ޖަގަހަތައް ހެދީ އެ ހުއްދަ ނެތި ކަމަށާއި ހުއްދަ ނުހޯދައި އެއްވެސް ފަރާތަކުން ޖަގަހައެއް ހިންގާ ނަމަ، އެ ކުންފުންޏަށް އެޅެން އޮތް ހުރިހާ ފިޔަވަޅެއް އަޅާނެ ކަމަށް އެތަނުން ބުނެފައި ވެ އެވެ.

އިދިކޮޅު ފަރާތްތަކުން ތުހުމަތުކުރާ ގޮތުގައި ހުޅުމާލޭގައި ޕީޕީއެމްގެ ޖަގަހަތައް ހިންގަނީ ވެސް އެޗްޑީސީގެ ހުއްދަ ހޯދުމަކާ ނުލަ އެވެ. އެކަމަކު އެޗްޑީސީން އެކަން ދޮގު ކުރެ އެވެ.