ހުޅުމާލެ ލިންކް ރޯޑުގައި އަނެއްކާ ވެސް ދެ ސައިކަލް ޖެހި އެކްސިޑެންޓެއް ހިނގައިފި

ލިންކް ރޯޑުގައި މިއަދު މެންދުރު ދެ ސައިކަލް ޖެހި އަނެއްކާވެސް އެކްސިޑެންޓެއް ހިނގައިފި އެވެ.

އެ އެކްސިޑެންޓްގައި ދެ ސައިކަލް ޖެހި އެއްވެސް މީހަކަށް އަނިޔާވި ކަމެއް ސާފުވާ ގޮތެއް ނުވި އެވެ. ނަމަވެސް ދެ ސައިކަލަށް ވެސް ބޮޑެތި ގެއްލުންތަކެއް ލިބިފައިވާކަން ސޯޝަލް މީޑިއާގައި ދައުރުވަމުންދާ ފޮޓޯތަކުން އެނގެ އެވެ.

އެ އެކްސިޑެންޓް ހިނގިއިރު އެއް ސައިކަލް ދުއްވަން ހުރި މީހެއްގެ ހެލްމެޓް ވެސް ބިންމަތީގައި އޮތެވެ. އަދި އޭގެ ތެރެއިން ސައިކަލަކުން ގެންދިޔަ ބޯވަ ގޯންޏެއް ވެސް މަގުމައްޗަށް ވެއްޓިފައި އޮތެވެ.

މި އެކްސިޑެންޓާ ބެހޭ ގޮތުން ފުލުހުންނާއި ހުޅުމާލޭ ހޮސްޕިޓަލުގެ ބަހެއް ލިބޭ ގޮތެއް ނުވި އެވެ.

ސިނަމާލެ ބްރިޖް ހުޅުވި ފަހުން ގަވައިދާ ހިލާފަށް ބާރު ސްޕީޑްގައި ދުއްވި ވެހިކަލްތަކެއް، ހުޅުމާލެ- ހުޅުލެ ލިންކް ރޯޑާއި މާލޭގެ ރިންގް ރޯޑުގައި ވެސް އެކްސިޑެންޓް ހިންގާފައިވެ އެވެ. އަދި އޭގެ ތެރެއިން ބައެއް އެކްސިޑެންޓްގައި މީހުންނަށް ސީރިއަސް ޒަހަމްތަކެއް ލިބިގެން ހޮސްޕިޓަލުގައި ފަރުވާދީފައިވެ އެވެ.

ބްރިޖާ ގުޅިފައިވާ ލިންކް ރޯޑުގައި ދުއްވޭނެ ސްޕީޑަކީ ގަޑިއަކު 25 ކިލޯ މީޓަރާއި 50 ކިލޯމީޓަރު ކަމަށް ކަނޑައަޅާފައިވީ ނަމަވެސް އެ ސްޕީޑަށްވުރެ ބާރު ސްޕީޑްގައި ގިނަ ބަޔަކު ދުއްވަ އެވެ. އަދި އެ މަގުގައި ހަރުކޮށްފައިވާ ޓްރެފިކް ލައިޓްތަކަށާއި މަގުމަތީގެ ލޭންތަކަށް ބެލުމެއް ނެތި ވެސް ދުއްވާކަން ފާހަގަކުރެވިފައިވެ އެވެ.