ދުވާފަރުގައި ވެސް މީހެއްގެ ގަޔަށް ވަޅި ހަރައިފި

ރޭ ރ. ދުވާފަރުގައި ހިނގި ހަމަނުޖެހުމެއްގައި، މީހެއްގެ ބަނޑަށާއި ބުރަކައްޓަށް ވަޅި ހަރައި ވަރަށް ބޮޑަށް ޒަހަމްކޮށްލައިފި އެވެ.

ރޭ ވަނީ ފުވައްމުލަކުގައި ވެސް ޒުވާނެއްގެ ކަރަށް ވަޅި ހަރައިފަ އެވެ. އެނގިފައިވާ ގޮތުގައި އެ މީހާގެ ކަރަށާއި އަރިކައްޓަށް ވަޅި ހަރައި ޒަހަމްކޮށްލި ނަމަވެސް، އޭނާގެ ހާލު އެހާ ސީރިއަސްއެއް ނޫނެވެ.

ދުވާފަރު ކައުންސިލުން ބުނީ ރޭ ދަންވަރު އެކެއް ޖަހާކަންހާއިރު ހިންގި އެ މަރާމާރީގައި 21 އަހަރުގެ ޒުވާނާގެ ބަނޑުގެ ދެ ފަރާތާއި ބުރަކަށިން ވެސް ދެ ތަނަކަށް ވަޅި ހަރާފައިވާ ކަމަށެވެ.

އެ ރަށު ކައުންސިލް އިދާރާގެ ކައިރީގައި ހިންގި އެ މާރާމާރީގައި ޒަހަމްވި މީހާ އަށް ފަރުވާ ދޭން އެންމެ ފުރަތަމަ ގެންދިޔައީ ހެލްތު ސެންޓަރަށެވެ. އެކަމަކު ފަހުން، އެ އަތޮޅު އުނގޫފާރުގައި ހުންނަ ރީޖަނަލް ހޮސްޕިޓަލަށް ބަދަލުކޮށްފައިވާ ކަމަށް ކައުންސިލުން ބުންޏެވެ.

އެނގިފައިވާ ގޮތުގައި އެ ޒުވާނާގެ ހާލު ސީރިއަސް އެވެ.

ފުލުހުންގެ އިދާރާއިން ފޯނު ނުނަގާތީ، މި މައްސަލައާ ގުޅިގެން މީހަކު ހައްޔަރު ކުރި ކަމެއް އަދި ނޭނގެ އެވެ.