ފިހާޅޮހި ރިސޯޓުގެ މޫދަށް އެރުނު ޓޫރިސްޓަކު ގެއްލިގެން ހޯދަނީ

ފިހާޅޮހި އައިލެންޑް ރިސޯޓުގެ މޫދަށް އެރި އުޅެނިކޮށް ފިރިހެން ޓޫރިސްޓެއް ގެއްލިގެން ހޯދަން މިއަދު ފަށައިފި އެވެ.

އެމްއެންޑީއެފުން ބުނީ ކ. މާފުށިން އެ ރިސޯޓަށް ގޮސް އުޅެނިކޮށް މެދު އުމުރުގެ މީހަކު ގެއްލިގެން 2:30 ހާއިރު ރިޕޯޓުކޮށްފައިވާ ކަމަށެވެ. ނަމަވެސް އެއީ ކޮން ގައުމެއްގެ މީހެއް ކަމެއް ސާފެއް ނުވެ އެވެ.

އެ ހާދިސާގެ ރިޕޯޓު ލިބުމާއެކު ކޯސްޓްގާޑުގެ ޓީމުން އެ ސަރަހައްދު ބަލާފައިވާ ކަމަށް ބުންޏެވެ. އަދި އެ މަސައްކަތުގައި ރިސޯޓުގެ ޑައިވިން ޓީމުން ވެސް ހަރަކާތްތެރިވަމުން އަންނަ ކަން ފާހަގަކުރި އެވެ.

ގެއްލިގެން އުޅޭ ޓޫރިސްޓު އެންމެފަހުން ލައިގެން ހުރީ ކަޅުކުލައިގެ ސޫޓެއްކަމަށް ސިފައިން ބުންޏެވެ.

އެ މީހާއާ ބެހޭ އެއްވެސް މައުލޫމާތެއް ލިބިއްޖެނަމަ ކޯސްޓްގާޑުގެ ހިލޭގުޅޭ ނަންބަރު 191 އަށް ގުޅުމަށް އެމްއެންޑީއެފުން އެދެ އެވެ.