ޒަހީނާ، ހިމާޔަތަށް ވަނީ "އަލްޖަޒީރާ" އަށް

ކުރިމަތިވި ބިރުވެރިކަމާ އެކު ރާއްޖެ ދޫކޮށް ނުދިޔަ ނަމަ، ނޫސްވެރިޔާ ޒަހީނާ ރަޝީދު ވެސް ވީހީ "ބޮޑު ކުށްވެރިއަކަށެ"ވެ. އޭރުގެ ހާލަތަށް ބަލާއިރު، ސަރުކާރު ވައްޓާލަން އުޅުމުގެ ތުހުމަތާ އެކު ބޮޑު ހުކުމެއްގައި ޖަލުގައި އޮތުން ވެސް އެކަށީގެންވެ އެވެ.

އިންސާފަށް، ހައްގަށް އަޑު އިއްވި ކޮންމެ މީހަކާ ދޭތެރޭ ދުށީ، ސަރުކާރު ވައްޓާލަން ކުރާ މަސައްކަތުގެ ބައިވެރިއެއްގެ ގޮތުގަ އެވެ. ނޫސްވެރިން ވެސް ފެއްތީ އެ ދަރަޖަ އަށެވެ. އަދަބުު ދެމުން ދިޔައީ، ގާނޫނީ އިމުން ބޭރުންނެވެ.

ރައީސް އަބްދުﷲ ޔާމީންގެ ފަސް އަހަރުގައި، ނޫސްވެރިކަމުގެ މިނިވަންކަން ނިގުޅައިގަނެ، ރާއްޖޭގެ މީޑިއާތައް އިނދަޖައްސާލި ގޮތުގެ ސޮފްހާއަކަށް، މިނިވަން ނޫހުގެ ކުރީގެ ނޫސްވެރިޔާ ޒަހީނާ ތަހައްމަލްކުރި ކަންކަން އެކަނި ވެސް ފުދެ އެވެ.

ކުރިމަތިވި ހާލަތުން، އޭނާ ހިމާޔަތް ހޯދީ، ބައިނަލްއަގުވާމީ ނިއުސް އެޖެންސީއެއް ކަމަށްވާ "އަލްޖަޒީރާ"ގެ ދޮރުން އެތެރެވެގެންނެވެ. މިހާރު އޭނާ އަކީ، ދުނިޔޭގެ އެތައް ގައުމެއްގައި، ހިންގާ އަލްޖަޒީރާގެ ނޫސްވެރިއެކެވެ. ސްރީ ލަންކާގައި، ހިނގަމުންދާ ސިޔާސީ ހަމަނުޖެހުން ކަވަރުކުރަން އުޅެފައި ހަފުތާއަކަށް ރާއްޖެ އައީ ވެރިކަން ބަދަލުވެ، ކުރީގެ ހާލަތު ބަދަލުވަމުންދާ ތަން ފެނުމުންނެވެ. އާއިލާ އާއި އެކުވެރިންނާ ބައްދަލުކުރުމަށް ފަހު އަންނަ ހޮނިހިރުދުވަހު އެނބުރި ފުރާނެ އެވެ.

"ރިލްވާންގެ ހައްގުގައި ކުރި މަސައްކަތް"

ނޫސްވެރިން ފަހަތަށް ޖައްސަން ކުރި މަސައްކަތުގެ ތެެރެއިން އެކުގައި މަސައްކަތްކުރި ނޫސްވެރިޔާ، އަހްމަދު ރިލްވާން ގެއްލުވައިލުމަކީ ޒަހީނާ އަށް ކުރިމަތިވި އެންމެ އުނދަގޫ އެއް ހާދިސާ އެވެ.

އެ ތަހުގީގުގައި ފުލުހުން އިހުމާލުވެ، މުއައްސަސާތަކުން ވެސް ކަންކަން ފޮރުވީ އެވެ. އެކަން ވީ ޒަހީނާ އަށް ވެސް ނޫސްވެރިއެއްގެ ގޮތުގައި ހުރެ، ކޮންމެ ގޮތެއް ވަރިހަމަވާން ދޫކޮށްލެވޭވަރަށް ވުރެ މާ ބޮޑު ކަމަކަށެވެ.

މަގުމައްޗަށް ވެސް ނުކުތީ އެވެ. ރިލްވާނަށް ވީ ގޮތެއް ހޯދަން މުއައްސަސާތަކުގެ ތެރެއަށް ވަދެ، އެކަމުގައި ވަމުންދިޔަ އިހުމާލުތައް ވެސް ހާވައި އާއްމުންނަށް ތިލަކުރި އެވެ.

ސިޔާސީ ވިސްނުމަކުން ނޫނެވެ؛ ޒިންމާވާ ފަރާތްތައް ޖަވާބުދާރީ ކުރުވައި، ރިލްވާނާއި އާއިލާ އަށް އިންސާފު ހޯދައި ދިނުމުގެ ގޮތުންނެވެ.

އެކަމަކު ޒަހީނާ އަށް އޮތް ނުރައްކާ ބޮޑުވާން ފެށީ އެ ހިސާބުންނެވެ. "ރިލްވާނަށް ހެދި ގޮތް ހަދާލާނެ" ކަމަށް ބުނެ ފޯނަށް މެސެޖްތައް ފޮނުވި އެވެ. އެ މަސައްކަތުގައި ބިރުން ފަސްޖެހޭވަރު ކޮށްލި އެވެ.

"މަގުމަތިން ހިނގާފައި ދާއިރު ވެސް އަބަދުވެސް ހުންނަނީ ސިހިސިހި. ބިރުވެރިކަން އޮތް މިންވަރުން ހަމަ ހީވަނީ ފަހަތުން މީހަކު އަންނަނީއޭ،" ޒަހީނާ ބުންޏެވެ.

އޭނާ ބުނީ އެ ދުވަސްވަރު، ރޭގަނޑު ބޭރަށް ނުކުތުން މަދުކުރި ކަމަށެވެ. އެކަމަކު ވެސް ރިލްވާނަށް ހައްގު ހޯދަން ކުރި މަސައްކަތް، އޭނާގެ އާއިލާ އާއި ރަހުމަތްތެރިންނާ އެކު ކުރިއަށް ގެންދިޔަ އެވެ.

ނޫސްވެރިންނަށް ދެން ކުރިމަތިކުރަމުން ދިޔަ ކަންކަމާ ދެކޮޅަށް ވެސް އަޑު އުފުލި އެވެ. އެ މަސައްކަތުގެ ތެރެއިން އެންމެ ދުވަހަކަށް ނަމަވެސް ޖަލަށް ވެސް ދާން ޖެހުނެވެ. ނޫސްވެރިކަމަށް ހުރަސްއަޅަން އަބުރުގެ ގާނޫނު ފާސްކުރަން އުޅުމާއި ނޫސްވެރިން ހައްޔަރުކޮށް ނުހައްގު ދައުވާތައް އުފުލުމާއި "ހަވީރު" ބަންދުކުރުން ފަދަ ކަންކަމާ ހިތްހަމަނުޖެހުން ފާޅުކުރަން ރައީސް އޮފީސް ކުރިމަތީގައި ބޯޑުތައް ހިފައިގެން ނޫސްވެރިން އިށީނީ އެވެ.

ޒަހީނާ ވެސް ހިމެނޭ ގޮތަށް ގިނަ ނޫސްވެރިންތަކެއް ހައްޔަރުކުރި އެވެ. ރާއްޖޭގެ ތާރީޚުގައި އެއްފަހަރާ އެހާ ގިނަ އަދަދެއްގެ ނޫސްވެރިން ހައްޔަރުކުރުމުން ސަރުކާރަށް ކުރިމަތިވި ޕްރެޝަރާ އެކު ޖެހުނީ ދޫކޮށްލާށެވެ.

ސްޓީލިން ޕެރެޑައިސް: "ބޮޑު ނުރައްކަލަކަށް"

ޒަހީނާ، އަމިއްލަ ގައުމު ދޫކޮށް ދާން މަޖުބޫރުވީ، އަލްޖަޒީރާ އިން ހެދި ޑޮކިއުމެންޓްރީ "ސްޓީލިން ޕެރެޑައިސް" އެވެ.

ތަހުގީގީ އެ ޑޮކިއުމެންޓްރީ ތައްޔާރުކޮށްފައި ވަނީ ސަރުކާރުގެ ތެރޭގައި ހުރި ހިޔާނާތާއި ވައްކަމުގެ އިތުރުން ނާޖާއިޒު ގޮތުގައި ބާރުގެ ބޭނުން ކުރާކަން ހާމަވާ ގޮތަށެވެ. ނުއަގުގައި ރަށްތައް ވިއްކައިގެން ރައީސް ޔާމީން ރައްޔިތުންގެ ފައިސާ އަށް ހިޔާނާތްތެރިވެވަޑައިގަތުމާއި މިނިވަން މުއައްސަސާތަކަށް ނުފޫޒު ފޯރުއްވައިގެން ކޮންޓްރޯލްކުރެއްވުމާއި ގޭންގުތައް އޮޕަރޭޓްކުރައްވާ ކަމަށް ޑޮކިއުމެންޓްރީގައި ބުނެ އެވެ.

ރިލްވާން ގެއްލުވާލުމުގެ ތަހުގީގަށް އެމަނިކުފާނު ނުފޫޒު ފޯރުއްވި ކަމަށް ވެސް ޑޮކިއުމެންޓްރީގައި ތުހުމަތުކުރެ އެވެ. އެކި މީހުން ސައިކަލްތަކުގައި މިލިއަނުން ނަގުދު ފައިސާ ސަރުކާރުގެ އިސް ބައެއް ބޭފުޅުންނަށް ގެންގޮސްދިން ގޮތް، ސިއްރުން ނަގާފައިވާ އިންޓަވިއުތަކުގައި ސިފަކޮށްދީފައިވެ އެވެ. ސަރުކާރުން ހިންގަމުން ދިޔަ ޖަރީމާތަކުގެ ތެރެއަށް އަލްޖަޒީރާ އިން ފީނައި ޑޮކިއުމެންޓްރީއެއް ހެދުންވީ ސަރުކާރަށް ގަބޫލުކުރަން އުނދަގޫވި ކަމަކަށެވެ.

އެ ޑޮކިއުމެންޓްރީ އަށް ރާއްޖެ އިން އެހީތެރިވެދިން އެކަކީ ޒަހީނާ އެވެ.

"އެކި ގޮތްގޮތުން މިނިވަން ނޫހަށް ލިބިފައި ހުރި ހެކިތައް، އަލްޖަޒީރާ އިން ހެދި ޑޮކިއުމެންޓްރީއާ ހިއްސާކުރީ. ސަރުކާރުގެ އިސް ވެރިން ހިމެނޭ ކޮރަޕްޝަންގެ އެ އަމަލުތައް މިނިވަން ނޫހުން ހާމަކޮށްފި ނަމަ، ދެން އަމަލުކުރާނެ ގޮތް ވެސް އެނގޭތީ،" ޒަހީނާ ބުންޏެވެ.

މިނިވަން ނޫހުގައި ކުރިން މަސައްކަތް ކުރި ވިލް ޖޯޑަންގެ އެ ޑޮކިއުމެންޓްރީ އާއްމުކުރިޔަ ނުދޭން، ކުރެވުނު ކަމެއް ސަރުކާރުން ކުރި އެވެ. ބިރު ދެއްކުމުގެ ގޮތުން، މިނިވަން ނޫހުގެ އޮފީސް ވެސް ބަލައި ފާސްކުރި އެވެ.

އޭރު އޮތީ، އަބުރު ރައްކާތެރި ކުރުމުގެ ގާނޫނު ފާސްކޮށްގެން އެތައް ފިޔަވަޅެއް އެޅުމުގެ މަގުމަތީގަ އެވެ. ކޮންމެ ރެއަކު މިނިސްޓަރުންނާއި މަޖިލިސް މެމްބަރުން ޓީވީތަކުގައި ދެއްކީ ޑޮކިއުމެންޓްރީގެ ވާހަކަ އެވެ.

"ސަރުކާރުން މީހެއްގެ ފަހަތުން އުޅެންޏާ ވަރަށް އުނދަގޫވާނެ ސަލާމަތްވާން. މިސާލަކަށް ހައްޔަރުކުރަން އުޅެންޏާ، ކަމެއްގެ ތެރޭގައި ބައްދަން އުޅެންޏާ ވަރަށް އުނދަގޫ ކަމަކަށް އޭރު އޮތީ ވެފައި އެކަމަކުން ރެކެން. ޑޮކިއުމެންޓްރީއާ ގުޅުވައިގެން ޓީވީތަކަށް އަރާ ބިރު ވެސް ދައްކަމުން އޭރު ދިޔައީ. އެހެންވެ ކުޑަ ދުވަސްކޮޅަކަށް ބޭރަށް ދިޔައީ،" ޒަހީނާ ބުންޏެވެ.

ޑޮކިއުމެންޓްރީ އާއްމުކުރިއިރު ޒަހީނާ ހުރީ ރާއްޖެ އިން ބޭރުގަ އެވެ. ބޭރު ދުނިޔޭގައި ސަރުކާރު ފަޟީހަތްވި ޑޮކިއުމެންޓްރީ އަށް ފަހު ރާއްޖެ ނުދިޔައީ، ޒަހީނާ ބުނިގޮތުގައި، ކޮންމެ ފަދަ ކަމެއް ވެސް ވެދާނެ ކަމުގެ ބިރު އޮތުމުންނެވެ. އެ ޑޮކިއުމެންޓްރީއާ ގުޅިގެން ތަހުގީގު ފަށައި، ކުރީގެ އޮޑިޓަ ޖެނެރަލް ނިޔާޒް އިބްރާހީމް ވެސް ހައްޔަރުކުރަން ދިޔައީ ގޮވަމުންނެވެ.

ޒަހީނާ ބުނިގޮތުގައި ރިލްވާނަށް ހައްގު ހޯދަން މަސައްކަތް ކުރި، ޔާމީން ރަޝީދު، އަނިޔާވެރި ގޮތަކަށް މަރާލުން ވެސް ވީ ވަރަށް ދެރަވި ކަމަކަށެވެ.

ރާއްޖޭގައި ފުރޮޅެމުން ދިޔަ ކަންކަމާ ދުރުގައި ހުންނަން ޖެހުމަކީ ނޫސްވެރިއެއްގެ ގޮތުން ޒަހީނާ ފަސޭހަ ކަމެއް ނޫނެވެ. އެހެންވެ، ބޭރުގައި ހުރެގެން ވެސް ބައެއް މަސައްކަތްތައް ކުރި އެވެ.

ރާއްޖޭގެ ބައެއް މައްސަލަތަކާ މެދު ލިއުނެވެ. ރާއްޖޭގެ ފަޅުރަށްތައް ނުއަގުގައި ކުއްޔަށް ދިން މީހުންނާއި އަގުތަކާއި އެ ޑީލްތައް ހިންގި ގޮތާ ގުޅޭ ގޮތުން، އޮގަނައިޒް ކްރައިމް އެންޑް ކޮރަޕްޝަން ރިޕޯޓިން ޕްރޮޖެކްޓް (އޯސީސީޕީއާރު)ން ހިންގި ތަހުގީގުގައި ވެސް ބައިވެރިވެ އެކަން ހާމަކުރުމުގައި ވެސް އެހީވި އެވެ.

ބޭރުގައި އުނދަގޫ، އާ ތަޖުރިބާއެއް

މިނިވަން ނޫހުގެ އެޑިޓަރުގެ މަގާމުން އިސްތިއުފާ ދިނީ، ދުރުގައި ހުރެގެން ނިއުސްރޫމް ހިންގަން އުނދަގޫ ކަމުންނެވެ.

"އެހެން ގައުމުތަކާ އަޅާބަލާއިރު، ކުރު މުއްދަތެއްގެ ތެރޭގައި ވަރަށް ގިނަ ކަންކަން އެއްފަހަރާ ރާއްޖޭގައި ހިނގައި ދިޔައީ. މިސާލަކަށް އެތައް ބަޔަކު ޖަލަށް ލާފައި ވަނިކޮށް، ފެބުރުއަރީ 1 ގައި ސުޕްރީމް ކޯޓުން ނެރުނު އަމުރު. ނޫސްވެރިންނަށް އެ ހުރިހާ ކަންކަމަކީ ވެސް ހަމަ ޝައުގުވެރި، ލިޔަން ބޭނުންވާނެ ކަންކަން،" ޒަހީނާ ބުންޏެވެ.

"މިސާލަކަށް، އެންމެން ބަލަން ތިބޭއިރު ގޯސްކޮށް ކަންކަން ކުރަނީ. ގާނޫނުގައި ވަކި ގޮތަކަށް އޮއްވައި އެއާ ޚިލާފުވަނީ. އެކަމަކު ވެރިން ބުނަނީ ރަނގަޅޭ. މިކަހަލަ ކޮންމެ ކަމަކީ ރާއްޖޭގެ ނޫސްވެރިންނަށް ކަަވަރުކުރަން ލިބޭ."

ޒަހީނާ ބުނިގޮތުގައި އަލްޖަޒީރާ އިން ލިބުނު ފުރުސަތުގެ ބޭނުން ހިފައި އެތަނުގައި މަސައްކަތް ކުރިއަސް އަމިއްލަ ގައުމުގައި ހުރެ ނޫސްވެރިކަން ކުރިއިރު ލިބުނު ހިތްހަމަޖެހުމެއް ނުލިބެ އެވެ. އެކަމަކު، ރާއްޖޭގައި ހިނގަމުންދާ ހާދިސާތަކާ މެދު ބޭރުގެ ނޫސްވެރިންނަށް އޮންނަ ޝައުގެއްގެ ބޮޑުކަމުން، ކަންކަން އޮޅުންފިލުވައި ހަދާތީ އުފާވާ ކަމަށް ބުންޏެވެ.

"އަލްޖަޒީރާގެ ފުރަތަމަ ދުވަސްކޮޅު ވެސް ރާއްޖޭގައި ހުރެގެން މިކުރާ މަސައްކަތުން އުފަލާއި ހިތްހަމަޖެހުން ހޯދަން އުނދަގޫވީ. ރާއްޖޭގައި އަސްލު، ނޫސްވެރިން ލިޔާ އެއްޗެހިން ވަރަށް ބޮޑެތި ތަފާތުތަކެއް ފެނޭ. ކުރާ މަސައްކަތުގެ މަންފާ، ނުވަތަ ފައިދާ ރައްޔިތުންނަށް ކުރޭ،" ޒަހީނާ ބުންޏެވެ.

"ކުރިމަތިކުރާ ހުރަސްތަކާ އެކު ވެސް ރާއްޖޭގެ ނޫސްވެރިން ވަރަށް ގަދަ."

"ރާއްޖެ ވަރަށް މިސްވޭ. އެކަމަކު މިވަގުތު އަލްޖަޒީރާގައި މި މަޑުކޮށްލަނީ ތަފާތު ތަޖުރިބާއެއް ކޮށްލަން،" ޒަހީނާ ބުންޏެވެ.