އަހަރު ނިންމައިލާނީ "ސިމްބާ" ގެ ކާމިޔާބީން

ހިންދީ ސިނަމާގެ ފާގަތިކަން މި އަހަރު ނިންމައިލާނީ ހުކުރު ދުވަހު ރިލީޒް ކުރި ރޯހިތު ޝެޓީގެ ފިލްމު "ސިމްބާ" ކާމިޔާބީން ކަމަށް ބުނެ މި ފިލްމަށް ކްރިޓިކުން ވަރަށް ބޮޑަށް ތައުރީއުކޮށްފި އެވެ.

މާސް އޯޑިއަންސް ގަބޫލުވާ ހުރިހާ ރަހައެއް ހެޔަވަރުކޮށްގެން ގެނެސް ދިން ފިލްމުގެ ފުރަތަމަ ޝޯއަކާ އެކު ބެލުންތެރިން ވެސް "ސިމްބާ" ގެ ޖާދޫގައި ޖެހިފައިވާ އިރު، މި ފިލްމަށް ގިނަ ކްރިޓިކުން ވަނީ ހަތަރު ތަރީގެ ރޭޓިންއެއް ދީފަ އެވެ.

ކަރަން ޖޯހަރު ޕްރޮޑިއުސްކޮށް ރަންވީރު ސިންގް އާއި އާއި ސާރާ އަލީ ހާން ލީޑް ރޯލަށް ލައިގެން ގެނެސް ދިން ފިލްމާ ބެހޭ ގޮތުން މަޝްހޫރު ކްރިޓިކް ތަރަން އަދާޝް ބުނީ މި ފިލްމަކީ ބޮކްސް އޮފީހުގައި ވަރަށް ހިނގާނެ ފިލްމެއް ކަމަށާއި ކާމިޔާބު ގިނަ ފިލްމުތަކެއް ފެނިގެން ދިޔަ 2018 ނިންމައިލަން ވެސް "ސިމްބާ" އަކީ އެއް ނަމްބަރުގެ ފިކްމެއް ކަަމަށެވެ.

ފިލްމަށް ތައުރީފު ކުރަމުން އޭނާ ބުނި ގޮތުގައި ރޯހިތު ވަނީ ޑައިރެކްޓަރެއްގެ ގޮތުގައި އަނެއްކާ ވެސް އޭނާގެ ކުޅަދާނަކަން ދައްކާލައިފަ އެވެ. އަދި "ސިމްބާ" އަކީ 2015 ގައި ރިލީޒް ކުރި ތެލެގޫ ފިލްމު "ޓެމްޕާ" އަސްލަކަށް ބަލައިގެން ހެދި ފިލްމެއް ނަމަވެސް، ހިންދީ އޯޑިއަންސަށް "ސިމްބާ" ގެނެސް ދީފައި އޮތީ ދެ ފިލްމު އަޅާނުކިޔޭނެހާ ތަފާތުކޮށް ކަމަށް ބުންޏެވެ. އެގޮތުން "ސިމްބާ" ގެ ހާދިސާތައް މާ ބޮޑަށް ވެސް ޝައުގުވެރިކޮށް ދީފައިވާ ކަމަށް ބުންޏެވެ.

މި ފިލްމުގެ ސްކްރީންޕްލޭ ލިޔެފައި ވަނީ ރޯހިތުގެ އެންމެ ކާމިޔާބު އެއް ފިލްމު ކަމަށްވާ 2013 ގެ "ޗެންނައި އެކްސްޕްރެސް" އާއި މިދިޔަ އަހަރު ރިލީޒް ކުރި ހޮރޯ ކޮމެޑީ "ގޯލްމާލް އެގެއިން" ގެ ސްކްރީން ރައިޓަރު ޔޫނުސް ސަޖަވާލް އެވެ. އަދި އޯޑިއަންސް ސިނަމާތަކުގައި ތުނބުން ފުމެމުން ފޯރި ނަގާ މީގެ ކެޗީ ޑައިލޮގްތައް ލިޔެފައި ވަނީ ފަރުހާދު ސަމްޖީ އެވެ.

ތަރަން ބުނީ "ސިމްބާ" ގެ އިންޓަވަލް ކުރި ވަރަށް މަޖާ ކަމަށާއި މިއީ ބެލުންތެރިން ހީހީ ހަލާކު ވެސް ވާނެ ފިލްމެއް ކަމަށެވެ. އަދި ދެވަނަ ހާފު ސީރިއަސްވެގެން ދިޔަ އިރު، މި ފިލްމުގެ ޝައުގުވެރި އެއް ބަޔަކީ ފިލްމުގެ ނިމުން ކަމަށް ތަރަން ބުންޏެވެ.

"ސިމްބާ" ގައި ކިޔައި ދެނީ ލާނެއް ކޮރަޕްޓް ފުލުހެއްގެ ވާހަކަ އެވެ.

މި ފިލްމަށް ޑައިރެކްޓަރެއްގެ ގޮތުން ރޯހިތުކޮށްފައިވާ މަސައްކަތްތައް ފާހަގަ ކުރަމުން ތަރަން އޭނާ ސިފަކޮށްފައި ވަނީ 1970 އާއި 1980 ގެ އަހަރުތަކުގައި "އަމަރު އަކްބަރު އެންތަނީ" އާއި "ނަސީބު"، "ކޫލީ" އަދި "ދަރަން ވީރު" ފަދަ ފިލްމުތައް ގެނެސް ދިން ޑައިރެކްޓަރު މަންމޯހަން ސިންގްގެ ގޮތުގަ އެވެ.

ގިނަ ކްރިޓިމުން "ސިމްބާ" އަށް ތައުރީފު އޮއްސާލާފައިވާ އިރު، ރަންވީރު ދައްކުވައި ދިން އެކްޓިން އަށް ވެސް ސާބަސް ދީފައިވެ އެވެ. އަދި އޭނާ ފުލުހެއްގެ ރޯލް ވަރަށް ވެސް ފުރިހަމަ އަށް ދައްކުވައި ދީ ބެލުންތެރިންގެ ހިތްތަކުން ޖޯގަ ހޯދާފައިވާ ކަމަށް ބުންޏެވެ.

ބަތަލާ ސާރާގެ ރޯލް ވަރަށް ކުރު ނަމަވެސް، އޭނާގެ ދެވަނަ ފިލްމުން ވެސް މޮޅު އެކްޓިންއެއް ދައްކުވައި ދީފައިވާ ކަމަށް ކްރިޓިކުން ބުންޏެވެ.

މަޝްހޫރު ކްރިޓިކް ކޯމަލް ނަހަޓާ ބުނީ "ސިމްބާ" އަކީ އޭގެ ވަށައިގެން "ބްލޮކްބަސްޓާ" ލިޔެވިފައި އޮތް ފިލްމެއް ކަމަށާއި މި ފިލްމު ނުބަލައި ބެލުންތެރިން އެއްގޮތަކަށް ވެސް ދޫކޮށެއް ނުލާނެ އެވެ.

ފިލްމުގެ ފުރިހަމަކަމުގެ ވާހަކަ ކްރިޓިކުން އިތުރަށް ފާހަގަ ކުރީ "ސިމްބާ" ގެ ހުރިހާ އެކްޓަރުންގެ އެކްޓިން ވެސް މޮޅުކަން ފާހަގަކޮށް، ސިނަމޮޓޯގްރަފީ އާއި އެކްޝަންތަކާއި މިއުޒިކަށް ވެސް ސަނާ ކިޔަމުންނެވެ. އެގޮތުން ފިލްމުގެ ލަވަތަކުގެ ތެރެއިން "އާކް މާރޭ" އާއި ޓައިޓްލް ލަވަ "އާލާ ރެ އާލާ" އަކީ މިހާރު ވެސް ޗާޓްތަކުގައި ރަސްކަން ކުރަމުން އަންނަ މަގުބޫލު ލަވަތައްކަން ފާހަގަކޮށްފައިވެ އެވެ. އަދި ފިލްމުގެ ބެކް ސްކޯ ވެސް ފިލްމުގެ ތީމާ ވަރަށް ގުޅޭ ކަމަށާއި ފިލްމުގެ ތެރެއަށް ބެލުންތެރިން ގެންގޮސް ދިނުމުގައި އެއީ ބޮޑު ހިއްސާއެއް ކަމަށް ބުންޏެވެ.

"ސިމްބާ" އަށް ބެލުންތެރިން އިތުރު ކުރުމަށްޓަކައި ވަނީ ވަރަށް ހާއްސަ ފެނިލުންތަކެއް ވެސް ހިމަނައިފަ އެވެ. އެގޮތުން އަޖޭ ދޭވްގަން އާއި އަކްޝޭ ކުމާރުގެ ހާއްސަ ފެނިލުންތަކެއް ހިމެނެ އެވެ. އަދި ރޯހިތުގެ ކާމިޔާބު ފްރެންޗައިޒް "ގޯމްމާލް" ގެ ކާސްޓުންތަކެއް ވެސް "އާކް މާރޭ" ލަވައިން ދައްކާލާފައިވެ އެވެ.

ޖުމްލަ 80 ކްރޯޑް ރުޕީސްގެ ބަޖެޓަކުން ހަދާފައިވާ "ސިމްބާ" 100 ކްރޯޑްގެ އާމްދަނީއެއް ވެސް ހޯދާނެ ކަމަށާއި މިއީ މި އަހަރު އެންމެ ކާމިޔާބު އެއް ފިލްމަށް ވާނެ ކަމަށް ގިނަ ކްރިޓިކުން އިއްތިފާގުވެފައިވެ އެވެ.

މީގެ ހަފުތާއެއް ކުރިން ރިލީޒް ކުރި ޝާހްރުކް ހާންގެ އުންމީދީ، ބޮޑު ބަޖެޓް ފިލްމު "ޒީރޯ" ބޮކްސް އޮފީހުގައި ބޮޑު ތަނުން ފްލޮޕްވެފައިވާ އިރު، އިންޑިއާ އާއި އިންޑިއާ އިން ބޭރުގެ މާކެޓްތަކުގައި ދައްކައިގެން މި ފިލްމަށް މިހާތަނަށް ލިބިފައި ވަނީ 139.39 ކްރޯޑް ރުޕީސް އެވެ.

"ސިމްބާ" ރިލީޒް ކުރުމާ އެކު، "ޒީރޯ" ގެ ވިޔަފާރި އިތުރަށް ދަށްވެ، މި ފިލްމު ބަލަން ދެން ސިނަމާތަކަށް ވަންނަ މީހުން އެކީއެކަށް ހުއްޓޭނެ ކަމަށް ފިލްމީ ހަބަރުތައް ދިރާސާ ކުރާ މީހުން ބުންޏެވެ.