ކަރެކްޝަންގެ އިހުމާލުން ޖަލުގައި މަރުވި މީހުންގެ އަދަދު ހޯދަން އެދިއްޖެ

މޯލްޑިވްސް ކަރެކްޝަނަލް ސާވިސްގެ އިހުމާލުން ޖަލުގައި މަރުވި މީހުންގެ އަދަދު ހޯދަން އެދިފައިވާނެ ކަމަށް، ޖަލުގެ ހާލަތު އޮޑިޓުކުރަން އުފެއްދި ކޮމިޝަނުން މިއަދު ބުނެފި އެވެ.

އެ ކޮމިޝަނުން ބޭއްވި ފުރަތަމަ ނޫސްވެރިންގެ ބައްދަލުވުމުގައި "މިހާރު"ން ކުރި ސުވާލަކަށް ޖަވާބުދެއްވަމުން ކޮމިޝަންގެ މެމްބަރު ޝަހިންދާ އިސްމާއިލް ވިދާޅުވީ ކަރެކްޝަންސްގެ އިހުމާލުން މަރުވި މީހުންގެ އަދަދާއި އެނޫން ވެސް މައުލޫމާތު ހޯދުމަށް އެ އިދާރާގައި އެދިފައިވާ ކަމަށެވެ.

ފާއިތުވި ފަސް އަހަރުގެ ތެރޭގައި ގައިދީންނަށް އެކަށީގެންވާ ފަރުވާ ނުދިނުމުގެ ސަބަބުން ޖަލުގައި މީހުން މަރުވުމާއި އެމީހުންނާ ދޭތެރޭ އިހާނެތިކޮށް ކަންތައްކުރުމުގެ ތުހުމަތު ގިނަ ބަޔަކު ކަރެކްޝަންގެ ބޮލުގައި އަޅުވަ އެވެ. އަދި ކަންބޮޑުވާ ދަރަޖައަކަށް، ޖަލުތަކުގައި، ފާއިތުވި އަހަރުތަކުގައި މީހުން މަރުވެފައިވާ ކަމަށް ވެސް ގިނަ ބަޔަކު ދެކެ އެވެ.

ޖަލުތައް އޮޑިޓްކުރުމަށް ހޯމް މިނިސްޓްރީން ހަތް މެމްބަރުންގެ ކޮމިޝަނެއް އުފެއްދީ މިދިޔަ މަހުގެ 18 ވަނަ ދުވަހެވެ. މިހާތަނަށް ބެލި ބެލުމުން ޖަލުގެ ހާލަތާ ގުޅޭ ކަންބޮޑުވުންތަކެއް އެބަހުރި ކަމަށް ޝަހިންދާ ވިދާޅުވި އެވެ. އޭގެ ތެރޭގައި ޖަލުގައި މީހުން މަރުވުން ހިމެނެ އެވެ.

"...އެންމެ ކަންބޮޑުވާ ކަންތައްތަކުގެ ތެރޭގައި މި ހުރީ ޖަލުގައި މީހުން މަރުވުން. ދެ ވަނަ ކަމަކީ ސިއްހީ ފަރުވާ ދިނުމުގައި ހުރި މައްސަލަތައް. އޭގެ އިތުރުން ޖަލުގައި މީހުންނަށް އަނިޔާކުރުމާއި ލާއިންސާނީ ގޮތްގޮތަށް މީހުންނާ ދޭތެރޭ އަމަލުކުރާ މައްސަލަތަކަކީ އަޅުގަނޑުމެން ކަންބޮޑުވާ ކަންތައްތަކެއް،" ޝަހިންދާ ވިދާޅުވި އެވެ.

އޭނާ ވިދާޅުވި ގޮތުގައި އެކަށީގެންވާ މިންވަރަށްވުރެ ގިނައިން ޖަލުތަކުގައި މީހުން އެބަ ގެންގުޅެ އެވެ. އެއީ ވަރަށް ބޮޑު މައްސަލައެއް ކަމަށާއި އެ ކަންކަމަށް ހައްލު ގެނެވޭނެ ރިކޮމެންޑޭޝަންތަކެއް ސަރުކާރަށް ހުށަހަޅާނެ ކަމަށް ވިދާޅުވި އެވެ.

ކޮމިޝަންގެ ރައީސް އަހުމަދު އަބްދުލްކަރީމް ވިދާޅުވީ ޖަލު އޮޑިޓުގެ މަސައްކަތްތައް ފަށައި ޖަލުގެ ހާލަތާ ގުޅޭ މައުލޫމާތު އެއްކުރަމުން އަންނަ ކަމަށެވެ. އެގޮތުން ދައުލަތުގެ ކަމާބެހޭ އިދާރާތަކުގެ ބޭފުޅުންނާ މިހާރު ބައްދަލުކުރައްވާފައިވާ ކަމަށް ވިދާޅުވި އެވެ.

އޭނާ ވިދާޅުވި ގޮތުގައި ޖަލުތައް އޮޑިޓްކުރަން ހޯމް މިނިސްޓްރީން އުފެއްދި ކޮމިޝަނަށް ދީފައިވަނީ 75 ދުވަހުގެ މުއްދަތެވެ. އެ މުއްދަތުގެ ތެރޭގައި ހަތް މެމްބަރުން ހިމެނިވަޑައިގަންނަވާ ކޮމިޝަނުން ރިޕޯޓު ނިންމައި ހޯމް މިނިސްޓަރު އިމްރާން އަބްދުﷲ އަށް ހުށަހަޅުއްވަން ޖެހޭ ކަމަށް ވިދާޅުވި އެވެ. އެހެންވެ ޖަލު އޮޑިޓް ހެދުމަށް ބާކީ އޮތީ ދެ މަހެވެ.

"ގައިދީންނަށް ނުވަތަ ބަންދު މީހުންނަށް ލިބޭ އަސާސީ ހިދުމަތްތަކާއި އެމީހުންގެ ކެއުންބުއިމާއި އެތަނުގެ ސާފުތާހިރުކަމާއި އަދި އެތަނުގެ ޖާގައިގެ ދަތިކަމާއި އެތަނުގެ އިމާރާތްތަކާއި އެމީހުންގެ ދިރިއުޅުމުގެ ހުރިހާ ކަމެއް، އެތަނުގައި ހަމަޖެހިފައި އޮތީ ކޮން ގޮތަކަށްތޯއާ، ސިއްހީ ފަރުވާ ދިނުމުގެ ކަންތައްތައް އިންތިޒާމުވެފައި ހުރި ގޮތާ. މި ހުރިހާ ކަމެއް އަޅުގަނޑުމެން [ޖަލަށް] ޒިޔާރަތްކުރުމަށްފަހު ޒިޔާރަތުގެ ތެރެއިން ކުރިއަށްގެންދާނެ،" އަހުމަދު ވިދާޅުވި އެވެ.

އޮޑިޓްގައި، ޖަލުގެ އަސާސީ މިންގަނޑުތަކާއި ގައިދީންނަށް އެންމެ ދަށްވެގެން ހުންނަންޖެހޭ ކަމަށް ބައިނަލްއަގުވާމީ ގޮތުން ފާހަގަކުރާ މިންގަނޑުތަކަށް ރާއްޖޭގެ ޖަލުތައް ހުރިތޯ ބަލާނެ ކަމަށް ވެސް ވިދާޅުވި އެވެ. އެއަށްވުރެ ދަށްވެއްޖެ ނަމަ އެއީ ލާއިންސާނީ އަމަލެއްކަން އަހުމަދު ފާހަގަކުރެއްވި އެވެ.

މީހުން ބަންދުކުރާ ނިޒާމާއި ޖަލުގައި މީހުން މަރުވުމާއި ސިއްހީ ފަރުވާ ނުލިބި ލަސްވުމުގެ މައްސަލަ އާއި ފަރުވާ ދިނުމުގައި ހުރި ގޮންޖެހުންތައް ބަލާނެ ކަމަށް ވެސް ވިދާޅުވި އެވެ. އެ ކަންތައްތަކުގެ އިތުރުން ޖަލުގެ އޮފިސަރުންނަށް ދިމާވާ ގޮންޖެހުންތައް ބަލާނެ ކަމަށް ވިދާޅުވި އެވެ.

އަހުމަދު ވިދާޅުވި ގޮތުގައި ވަރަށް ކުދިކުދި ކުށުގައި ވެސް މީހުން ޖަލަށް ލަ އެވެ. އޭގެ ބަދަލުގައި ޖަލަށް ކޮންމެހެން ގެންދަން ނުޖެހޭ މީހުން ޖަލަށް ނުގެންގޮސް ދެވޭނެ އެހެން އަދަބުތަކެއް ހޯދުމަށް ރިކޮމެންޑް ކުރާނެ ކަމަށް ވިދާޅުވި އެވެ.

"...ކުދި ކުދި ކުށުގައި ޖަލަށް ލާ މީހުން އެނބުރި ނިކުންނައިރު ވެސް ހުރިހާ އެންމެން އެއްތަނެއްގައި ތިބެން ޖެހުމުގެ ސަބަބުން ވާ ގޮތަކީ އެމީހުން ނިކުންނަނީ ބޮޑެތި ކުށްވެރިންނަށް ބަދަލުވެގެން. އޮޑިޓުގައި އެކަން އަޅުގަނޑުމެން ވަރަށް ބަލާނަން، ބަލާފައި ގާނޫނުތަކުގައި ތަންދޭ މިންވަރަކުން ޖަލަށް ކޮންމެހެން ގެންދަން ނުޖެހޭ މީހުން ޖަލަށް ނުގެންގޮސް އެމީހުންނަށް ދެވޭނެ ކޮންމެ ވެސް އެހެން އަދަބެއް ހޯދުމަށް މީގައި ރިކޮމެންޑް ކުރާނަން،" އަހުމަދު ވިދާޅުވި އެވެ.