ނަތީޖާ ނެރެވޭނެ ކަސްރަތާ ބެހޭ އާ ހޯދުމެއް

ބަރުދަން ލުއިކޮށް، ރީތި ބައްޓަމަކަށް ހުރުމާ އެކު ފިޓްނެސް ރަނގަޅު ކުރުމަށް ވަރަށް ގިނަ މީހުން އެކި ކަސްރަތު ކުރެ އެވެ. ގިނަ ބަޔަކު އަބަދު ވެސް އެންމެ ބޮޑަށް ބޭނުންވަނީ ކުރު މުއްދަތެއްގައި ނަތީޖާ ނެރެވޭ އުކުޅެކެވެ.

އަލަށް ދިރާސާއެއްގައި ބުނާ ގޮތުން ބަރުދަން ލުއިކުރަން އެންމެ ރަނގަޅު އެއް ގޮތަކީ ހައި އިންޓެންސިޓީ އިންޓަވަލް ޓްރެއިނިން (ހީޓް) އެވެ. ހީޓްގެ ތެރޭގައި، ހިނގުމާއި މަޑު ދުވެލީގައި ދިގު ރާސްތާއަށް ދުވުމާއި ފެތުމާއި ބައިސްކަލް ދުއްވުމާއި ފަލި ޖެހުމާއި ބޮކްސިން ކަހަލަ، ހަށިގަނޑަށް އެނގުންވާ ހަރަކާތްތެރިކަން ބޮޑު ކަސްރަތުތައް ހިމެނެ އެވެ.

ބްރިޓިޝް ސްޕޯޓްސް ޖާނަލްގައި ޝާއިއުކޮށްފައިވާ ދިރާސާ ރިޕޯޓެއްގައިވާ ގޮތުން ހީޓް އަކީ ބަރުދަން ލުއި ކުރަން ވަރަށް ވެސް ރަނގަޅު ގޮތެކެވެ. އޭގައި ފާހަގަކޮށްފައިވާ ގޮތުގައި އެހެން ކަސްރަތުތައް ކުރާ މީހުންނާ ހިލާފަށް ހީޓްގައި އެކުލެވޭ ކަސްރަތު ކުރާ މީހުންގެ ބަރުދަން ލުއިކޮށް ދިނުމުގެ ފުރުސަތު 28.5 ޕަސަންޓަށް ބޮޑުކޮށްދެ އެވެ.

ނަމަވެސް ދިރާސާގައި ބުނެފައިވާ ގޮތުގައި ހީޓަކީ ކޮންމެ ކޮންމެ މީހަކަށް އެކަށީގެންވާ ކަސްރަތަކަށް ނުވެދާނެ އެވެ.

"މިއީ އިންޖަރީވުމުގެ ފުރުސަތު ފަހަރުގައި ބޮޑުވެދާނެ ކަސްރަތަކަށް ވެދާނެ. އަދި މިއީ ކާޑިއޮވަސްކިއުލާ (ހިތުގެ) ސްޓްރެސް ބޮޑުވެދާނެ ކަސްރަތަކަށް ވެދާނެ،" ދިރާސާގައި ބުންޏެވެ. "އެހެންވީމާ މުހިއްމު ކަމަކީ ތަޖުރިބާކާރެއްގެ އެހީގައި ހީޓް ތަޖުރިބާ ކުރުން."

ހީޓާ ބެހޭ ގޮތުން ސްކޮޓްލެންޑްގެ ސްޓާލިން ޔުނިވަސިޓީގެ ކަސްރަތުގެ ސައިންސާ ބެހޭ ލެކްޗަރާ ޑރ. ނިއެލްސް ވޮލާޑް ވިދާޅުވި ގޮތުގައި ހީޓުން ދެ ނަތީޖާއެއް ނެރެދޭނެ އެވެ. އެއް ކަމަކީ ކެލޮރީޒް ފަސޭހަ އިން އަންދާލަން މަގުފަހިކޮށްދީ، ކަސްރަތަށް ފަހު ހަކަތަ އިތުރުކޮށް ދިނުމާ އެކު، މެޓަބޮލިޒަމް ލެވެލް ބަރާބަރުކޮށް ދިނުމެވެ. އަނެއް ކަމަކީ ބަނޑުހައިވުން ކުޑަކޮށް ދިނުމެވެ.

"އެހެންވީމާ މިއީ އެޕެޓައިޓް ހޯމޯނަށް ވަރަށް ވެސް ރަނގަޅު އަސަރުތަކެއް ކުރުވާ ކަސްރަތެއްކަން ދިރާސާ އިން ދައްކާ،" ނިއެލްސް ވިދާޅުވި އެވެ.