އައިއެސްއާ ގުޅުނު ކުއްޖާ އެމެރިކާ އަށް ނުވެއްދި މައްސަލަ ކޯޓަށް

އަލަބާމާ (ފެބްރުއަރީ 23) - އިސްލާމިކް ސްޓޭޓް (އައިއެސް) އާ ގުޅުމަށް އެމެރިކާ ދޫކޮށް ދިޔަ އަލަބާމާގެ ކޮލެޖް ދަރިވަރު ހުދާ މުސާނާ އެމެރިކާ އަށް ދެން ނުވައްދާނެ ކަމަށް ރައީސް ޑޮނަލްޑް ޓްރަމްޕް ވިދާޅުވުމުން އެ ކުއްޖާގެ ބައްޕަ އެ މައްސަަލަ ކޯޓަށް ވައްދައިފި އެވެ.

އުމުރުން މިހާރު 24 އަހަރުގެ މުސާނާ އުޅެ ބޮޑުވީ އަލަބާމާގަ އެވެ. އޭނާގެ އުމުރުން 20 އަހަރުގައި ތުރުކީ އަށް ދިޔައީ މައިންބަފައިންނަށް އޮޅުވާލައިގެންނެވެ. އަދި އޭގެ ފަހުން ވަނީ ސީރިއާ އަށް ގޮސް އައިއެސްއާ ގުޅިފަ އެވެ. އޭނާގެ ޕާސްޕޯޓް އަންދާލާ މަންޒަރުތަކެއް ވަނީ ޓްވީޓާގައި އާއްމުކޮށްފަ އެވެ. އޭގެ ފަހުން އޭނާ ވަނީ އެމެރިކާ މީހުން މެރުމަށް ވެސް ގޮވާލައިފަ އެވެ. އޭނާ ތުރުކީ އަށް ދިޔައީ ޓިއުޝަން ފައިސާ އެއްކޮށްގެން ޓިކެޓް ގަނެގެންނެވެ.

އަށާރަ މަހުގެ ކުޑަ ކުއްޖަކު އޮތް މުސާނާ ދަނީ އެނބުރި އެމެރިކާ އަށް ދިއުމަށް މަސައްކަތް ކުރަމުންނެވެ. އޭނާ މިހާރު ހުރީ ކުރުދީންގެ ރެފިއުޖީ ކޭމްޕެއްގަ އެވެ.

މުސާނާގެ ބައްޕަ އަހުމަދު އަލީ ހުށަހެޅި މައްސަލާގައި ވަނީ ސީރިއާ އަށް ގޮސް އައިއެސްއާ ގުޅުނީތީ މުސާނާގެ މައްޗަށް ކޮށްފާނެ ދައުވާއަކުން ރެކެން އޭނާ މަސައްކަތް ނުކުރާނެ ކަމަށް ބުނެފަ އެވެ. އެކަމަކު އޭނާ ހުށަހަޅާފައި ވަނީ މުސާނާ އަށާއި އޭނާގެ 18 މަހުގެ ދަރިފުޅަށް އެމެރިކާގެ ރައްވެހިކަން ދީ އެމެރިކާ އަށް ވަދެވޭނެ ގޮތެއް ހަމަޖައްސައިދިނުމަށެވެ.

މުސާނާ ވަނީ އޭނާ އަށް ކުރެވުނު ކަންތަކާ މެދު ދެރަވެ އަދި ދިރިއުޅުން މުޅިން ހަލާކުގެ ތެރެއަށް ވައްޓާލި ކަމަށް އެއްބަސްވެ އެކަމަށް މައާފަށް އެދިފަ އެވެ. ނަމަވެސް އޭނާގެ ދަރިފުޅުގެ ކުރިމަގު ހަލާކުކޮށްލަން ބޭނުން ނުވާ ކަމަށް ވަނީ ބުނެފަ އެވެ.

ޚާރިޖީ ވަޒީރު މައިކް ޕޮމްޕެއޯ ބުދަ ދުވަހު ވިދާޅުވެފައި ވަނީ މުސާނާ އަށް އެމެރިކާގެ ޕާސްޕޯޓް ނުވަތަ ވިސާ ދޭން ޖެހޭ ގާނޫނީ އެއްވެސް ހަމައެއް ނެތް ކަމަށެވެ. ޕޮމްޕެއޯ ވިދާޅުވީ މުސާނާގެ ބައްޕަ އަކީ އދ. އަށް ކަނޑައަޅާފައި ހުރި ޔަމަނުގެ ޑިޕްލޮމެޓެއް ކަމަށެވެ. އެމެރިކާގެ ގާނޫނު އޮންނަ ގޮތުން ޑިޕްލޮމެޓުންގެ ދަރިންނަށް ލިބޭ ކުދިންނަށް އެމެރިކާގެ ރައްވެހިކަން ނުލިބޭނެ އެވެ.

އެކަމަކު އެ އާއިލާ އިން ބުނަނީ މުސާނާ އަކީ އެމެރިކާގެ ރައްވެއްސެއް ކަމަށް ބަލައިގަނެ ސްޓޭޓް ޑިޕާޓްމަންޓުން 2004 ވަނަ އަހަރު އެމެރިކާގެ ޕާސްޕޯޓް ވެސް ދީފައިވާ ކަމަށެވެ.

އައިއެސްއާ ގުޅެން ދިޔަ އިނގިރޭސި ވިލާތަށް އުފަން އަންހެން ކުއްޖާ ޝަމީމާ ބޭގަމް އަށް ވެސް ވަނީ މިފަދަ މައްސަލައެއް ދިމާވެ އިނގިރޭސި ރައްވެހިކަން އޭނާގެ ކިބައިން ނަގައިފަ އެވެ.