ގެއެއްގެ މަތިން ވީލްޗެއާ ފުރޮޅެއް ވެއްޓި ކުއްޖަކަށް އަނިޔާވެއްޖެ

މ. ޝޭޑީ ރެސްޓްގެ ފުރަތަމަ ބުރިން، ވީލްޗެއާގެ ފުރޮޅެއް ވެއްޓި މަގުމަތިން ދިޔަ ކުއްޖެއްގެ ބޮލުގައި ޖެހި އަނިޔާވެއްޖެ އެވެ.

ފުލުހުން ބުނިގޮތުގައި 14 އަހަރުގެ ކުއްޖާގެ ބޮލުގައި ފުރޮޅުން ޖެހުމުގެ ސަބަބުން ބޯ ވަނީ ވަރަށް ބޮޑަށް ދުޅަވެފަ އެވެ.

މީހަކު މިއަދު ކުރި ޓްވީޓެއްގައި، ގެއެއްގެ މަތިން "ދަގަނޑު ހޮޅިއެއް" ވެއްޓި ކުއްޖެއްގެ ބޮލުގައި ޖެހުނު ކަމަށް ވެސް ބުނެފައިވެ އެވެ. ނަމަވެސް މިއީ ފުލުހުންނަށް ރިޕޯޓްކުރި ހާދިސާ ކަމެއް ޔަގީނެއް ނޫނެވެ. އެ ޓްވީޓްގައި ބުނެފައި ވަނީ ގެއިން ފޭބި މީހަކު "އެއީ ގަސްތުގައި ކުރި ކަމެއް ނޫން" ކަމަށް ބުނެފައިވާ ކަމަށެވެ.

މި ފަހަކަށް އައިސް މި ފަދަ ހާދިސާތައް ވަނީ ގިނަވެފަ އެވެ. އެގޮތުން މިދިޔަ ހަފުތާގައި ހުޅުމާލޭގައި ހަދަމުން އިމާރާތަކުން ގަލެއް ވެއްޓި، ބަންގްލަދޭޝް މީހަކު މަރުވެފައިވާއިރު ގެއެއްގެ މަތިން ކަޓިންބޯޑެއް އަދި އެހެން ގެއަކުން، ތިރިއަށް ބާލަމުން ދިޔަ ކުނިކޮތަޅެއް ވެއްޓި މީހަކަށް އަނިޔާވެފައި ވެ އެވެ.

މާލޭގައި، ޑަބްލިއު ކޮންސްޓްރަކްޝަނުން ހަދަމުން ދިޔަ އިމާރާތަކުން ވެއްޓުނު ސިމެންތި ބަސްތާއަކުން ޖެހި ލިބުނު ޒަހަމްތަކަށް ފަރުވާ ދެނިކޮށް ބަންގްލަދޭޝްގެ ކުޑަ އަންހެންކުއްޖަކު ވެސް މިދިޔަ އަހަރުގެ ޑިސެމްބަރު މަހު ވަނީ މަރުވެފަ އެވެ. ބަންގްލަދޭޝްގެ ދެ ޑޮކްޓަރެއްގެ ތިބި ދެ ކުދިންގެ ތެރެއިން ދޮށީ ކުއްޖާ ރައިޝަން ޖިއާން މިދިޔަ އަހަރުގެ ޑިސެމްބަރު 16 ގައި މަރުވީ މ. ނަލަހިޔާ މަންޒިލްގެ ފަސް ވަނަ ބުރިން ވެއްޓުނު ސިމެންތި ބަސްތާއަކުން ޖެހި ލިބުނު ޒަހަމްތަކަށް، އައިޖީއެމްއެޗުގެ އައިސީޔޫގައި ފަރުވާދެމުން ދަނިކޮށެވެ.

ސަރުކާރުން ވަނީ އިމާރާތްކުރުމުގައި ގެންގުޅެންޖެހޭ ސަލާމަތީ މިންގަނޑުތަކާ ގުޅޭ ގަވައިދެއް ހަދައިފަ އެވެ.

އިމާރާތްކުރުމުގައި ގެންގުޅެންޖެހޭ ސަލާމަތީ ފިޔަވަޅުތަކުގެ އެންމެ ދަށް މިންގަނޑު ކަނޑައަޅާ މި ގަވައިދުގައި އިމާރާތްކުރުމުގެ މަސައްކަތްކުރާ މީހުންގެ ސަލާމަތީ އަދި ސިއްހީ ކަންކަމާ ގުޅޭ ގޮތުން އަމަލުކުރަންޖެހޭ ގޮތާއި މަސައްކަތް ކުރުވާ ފަރާތުން، މަސައްކަތް ކުރާ ތަން ބަލަހައްޓަން ސައިޓް އިންސްޕެކްޓަރުން އައްޔަނުކުރުން ލާޒިމްކުރެ އެވެ. އަދި ފަސް މިލިއަން ރުފިޔާއަށްވުރެ ބޮޑު މަޝްރޫއެއް ނަމަ، މަސައްކަތްތެރިންނާއި ވަށައިގެން އުޅޭ މީހުންނަށް ވެސް ލިބިދާނެ ގެއްލުމަކަށް ބަދަލު ދިނުމަށް އިންޝުއަރެންސް ނެގުމަށް ވެސް އެ ގަވައިދުން ލާޒިމް ކުރެ އެވެ.