ބާ ފެން މީޓަރުތައް އެއް އަހަރުގެ ތެރޭގައި ބަދަލުކުރަނީ

މާލެ ސަރަަހައްދުގައި ފެނުގެ ހިދުމަތް ދޭން ބަހައްްޓާފައިވާ މީޓަރުތަކުގެ ތެރެއިން ބާވެ ހަޑިވެފައިވާ މީޓަރުތައް ބަދަލުކުރަން ފަށާފައިވާ ކަމަށާއި އެ ފަދަ މީޓަރުތައް ބަދަލުކުރަން ފަށާފައިވާ ކަމަށް އެމްޑަބްލިއުއެސްސީން ބުނެފި އެވެ.

މިއަދު ބޭއްވި ނޫސްކޮންފަރެންސެއްގައި އެމްޑަބްލިއުއެސްސީގެ މެނޭޖިން ޑައިރެކްޓަރު އާދަމް އާޒިމް ވިދާޅުވީ މީޓަރުތައް ބަދަލު ކުރުމަކީ ގަވައިދުން ހިނގަމުން ދާން ޖެހޭ ކަމެއް ކަމަށާއި އެހެން ނަމަވެސް މީޓަރުތައް ބަދަލުނުކުރާތާ އަހަރުތަކެއް ވެފައިވާ ކަމަށެވެ.

"ހުރިހާ ހަޑިކޮށް ހުރި މީޓަރުތަކާއި ދުވަސްވެފައި ހުރި މީޓަރުތައް ބަދަލުކޮށް، އެ މީޓަރުތަކަކީ ވެސް މީހުންނަށް ބަލައިލަން ކެރޭ ކަހަލަ މީޓަރުތަކަކަށް ބަދަލުކުރަން ނިންމާފައި އެ ޕްރޮގްރާމް ފެށިގެން ކުރިއަށް ދަނީ،" އާޒިމް ވިދާޅުވި އެވެ.

އާޒިމް ވިދާޅުވީ މީޓަރުތައް ބަދަލުކުރުމުގެ މަސައްކަތް އަހަރެއްހާ ދުވަހުގެ ތެރޭގައި ނިމޭނެ ކަމަށެވެ.

ފެން މީޓަރުތައް ބާވެ، ހަޑިވެފައި ހުރުމުން ފެން ކުންފުނީގެ އިތުރުން ކަސްޓަމަރުންނަށް ވެސް ގެއްލުންތައްވާ ކަމަށް ވެސް އޭނާ ވިދާޅުވި އެވެ. އެހެންވެ ފެން މީޓަރުތައް ރީތިކޮށް ބެލެހެއްޓުމަށް އޭނާ ކަސްޓަމަރުންނަށް އިލްތިމާސް ކުރެއްވި އެވެ.

"ކަސްޓަމަރުންނަށް ވެސް މީގެ ސަބަބުން ގެއްލުމެއް ލިބިދާނެ. އެމްޑަބްލިއުއެސްސީ އަށް ވެސް ގެއްލުމެއް ލިބިދާނެ. އެހެންވީމާ ދެ ފަރާތުން ގުޅިގެން ކަންތައް ކުރީމާ އަޅުގަނޑަށް ހީވަނީ ރަނގަޅު ހިދުމަތެއް ދެވި އެންމެންނަށް ފައިދާ ވާނީ މިކަމުގައި،" އާޒިމް ވިދާޅުވި އެވެ.

މީޓަރުތައް ހަޑިވެ ހަލާކުވުމުގެ އިތުރުން މީޓަރުތައް ރައްކާތެރިކުރުމަށް ކުރާ ބައެއް ކަންތައްތަކުން ވެސް މައްސަލަތަކާ ކުރިމަތިވާކަން އޭނާ ފާހަގަ ކުރެއްވި އެވެ. އެގޮތުން ފެނުގެ ހިދުމަތަށް ދިމާވާ މައްސަލައެއް ހައްލުކުރަން އުޅޭ އިރު މީޓަރާ ކައިރި ނުވެވޭ ގޮތަށް ހުންނަ ކަމަށް ވިދާޅުވި އެވެ.

ބާވެފައިވާ މީޓަރުތައް ބަދަލުުކުރުމުގެ އިތުރުން އުސް އިމާރާތްތަކަށް އެކަށީގެންވާ ޕްރެޝަރެއްގައި ފެން ނުލިބޭ މައްސަަލަ ހައްލު ކުރުމަށް ޓަކައި ފެނުގެ ވިއުގަ ބަދަލުކުރުމުގެ މަސައްކަތް ވެސް ފެން ކުންފުނިން އަންނަނީ ކުރަމުންނެވެ. ތިން ފޭހަގަށް ބަހާލައިގެން ކުރިއަށް ގެންދާ އެ މަސައްކަތްތަށް ގާތްގަނޑަކަށް 24 މިލިޔަން ރުފިޔާ ހަރަދުވާނެ ކަމަށް ، އެ މަސައްކަތް ފެށި އިރު އެ ކުންފުނިން ބުންޏެވެ.