އިންޑިއާގެ ޖެޓް ވައްޓާލި ޕާކިސްތާނުގެ ޕައިލެޓުންނާ ބެހޭ މައުލޫމާތު ހާމަކޮށްފި

އިސްލާމްއާބާދު (މާޗް 7) - އިންޑިއާގެ ހަނގުރާމަ މަތީ ދެ ޖެޓް ވައްޓާލި ޕައިލެޓުންނާ ބެހޭ މައުލޫމާތު ޕާކިސްތާނުން ފުރަތަމަ ފަހަރަށް ހާމަކޮށްފި އެވެ.

ޕާކިސްތާނުން މިދިޔަ މަހު 27 ވަނަ ދުވަހު ހަމަލާދީ ވައްޓާލީ އިންޑިއާގެ މިރާޖް 2000 މަރުކާގެ ދެ ބޯޓެވެ. މީގެ ތެރޭން ޕާކިސްތާނުގެ ސަރަހައްދަށް ވައި ކުޑައިގައި ފޭބި ޕައިލެޓް ވިންގް ކޮމާންޑަރު އަބިނާންދަން ވާތަމަން ޕާކިސްތާނުން ހައްޔަރު ކުރި ނަމަވެސް ފަހުން ވަނީ އިންޑިއާއާ ހަވާލުކޮށްފަ އެވެ.

ޕާކިސްތާނުގެ ފޮރިން މިނިސްޓަރު ޝާހު މަހްމޫދު ގުރައިޝީ ވިދާޅުވީ ޕާކިސްތާން އެއާ ފޯސް (ޕީއޭއެފް) އިން ހަމަލާދީ އިންޑިއާގެ ދެ ޖެޓް ވައްޓާލި ކަމަށެވެ. އޭނާ ވިދާޅުވީ އިންޑިއާގެ ދެ ޖެޓް ވައްޓާލީ ސްކޮޑްރޮން ލީޑަރު ހަސަން ސިއްދީގީ އާއި ވިންގް ކޮމާންޑަރު ނައުމާން އަލީ ޚާން ކަމަށެވެ.

ކަރާޗީ އަށް ނިސްބަތްވާ ސިއްދީގީ ދުއްވީ އެފް-16 ގެ ޖެޓް ޕާކިސްތާނުގައި ޖެއްސުމާ އެކު އޭނާ އަށް ވަނީ ބަތަލެއްގެ ދަރަޖައިގައި މަރުހަބާ ކިޔައިފަ އެވެ. ސޯޝަލް މީޑިއާގައި ދައުރުވަމުން ދިޔަ ވީޑިއޯއަކުން ފެންނަ ގޮތުގައި ސިއްދީގީގެ ބޯޓު ޖެއްސުމާ އެކު ޕީއޭއެފްގެ އޮފިޝަލުން ވަނީ އޭނާގެ ބޯޓު ފަށާލައިފަ އެވެ.

އިންޑިއާ އާއި ޕާކިސްތާނުގެ މަސްރަހު ގޯސްވީ ފެބްރުއަރީ 14 ވަނަ ދުވަހު ޖައިޝީ މުހައްމަދު ކިޔާ ޖަމާއަތަކުން ކަޝްމީރުގައި ހަމަލާދީ އިންޑިއާގެ 42 ޕެރަމިލިޓަރީ ފުލުހުން މަރާލުމާ ގުޅިގެންނެވެ. އޭގެ 12 ދުވަސް ފަހުން އިންޑިއާ ސިފައިން ވަނީ ޖައިޝީ މުހައްމަދުގެ މައި ކޭމްޕަށް ބޮން އަޅައިފަ އެވެ. ޕާކިސްތާނުން ހަމަލާދީ އިންޑިއާގެ ބޯޓުތައް ވައްޓާލީ އެ ގައުމުގެ ސަރަހައްދަށް ވަނުމުންނެވެ.