އިންޑިއާގެ ގުޖުރާތުގައި ޕަބްޖީ ކުޅުން މަނާކޮށްފި

ގުޖުރާތު (މާޗް 19) - އިންޑިއާގައި މުސްލިމުންގެ އާބާދީ ބޮޑު ގުޖުރާތު ސްޓޭޓުގައި ޕަބްޖީ ގޭމް ކުޅުން މަނާކޮށްފި އެވެ.

ބެލެނިވެރިންނާއި ޓީޗަރުން ބުނަމުން ދަނީ ޕަބްޖީ އޮންލައިން ގޭމަށް ދަރިވަރުން ހިތްޖެހުމުން އެ ކުދިންގެ އަޚުލާގަށާއި ކިޔެވުމަށް ނޭދެވޭ އަސަރުކުރާ ކަމަށެވެ. ގުޖުރާތުގެ މިނިސްޓަރަކު ވިދާޅުވެފައި ވަނީ ޕަބްޖީ އަކީ "ކޮންމެ ގެއަކަށް ވަދެއުޅޭ ޖިންނިއެއް" ކަމަށެވެ. ޕަބްޖީގެ އަވައިގައި ބައެއް މީހުން ޖެހި އެ މީހުންގެ ދިރިއުޅުމުގައި ކުރެވޭ ނުކުރެވޭ ކަމެއް ނޭނގެ ހިސާބަށް ވެސް ދެ އެވެ.

ޕަބްޖީ ކުޅެގެން ގުޖުރާތުގެ ޔުނިވާސިޓީއެއްގެ 10 ދަރިވަރަކު ފުލުހުން ވަނީ ހައްޔަރުކޮށްފަ އެވެ. އިންޑިއާ ފުލުހުންގެ އޮފިޝަލަކު އިންޑިއަން އެކްސްޕްރެސް އަށް ވިދާޅުވީ ޕަބްޖީ ކުޅެން ތިބި މީހުން އެ ގޭމަށް ގޮސް ހުސްވެފައި ތިބި ވަރުން ފުލުހުން އެ މީހުންގެ ކައިރިއަށް ދިޔަކަން ވެސް ނޭނގޭ ކަމަށެވެ.

ގުޖުރާތަކީ ޕަބްޖީ ކުޅުން މަނާކުރި އިންޑިއާގެ ހަމައެކަނި ސްޓޭޓެވެ. ޕަބްޖީ ގޭމް ވަނީ ދުނިޔޭގެ އެކި ގައުމުތަކުން 100 މިލިއަން ފަހަރު ޑައުންލޯޑްކޮށްފަ އެވެ.