ކުލާހެއްގައި ދަރިވަރުންނަށް "ލަވް ފޯމިއުލާ" ފިލާވަޅު ނަގައި ދިން ޕްރޮފެސަރަކު ސަސްޕެންޑްކޮށްފި

އިންޑިއާގެ އަންހެން ކުދިން ކިޔަވާ، ސަރުކާރުގެ ކޮލެޖެއްގައި ހިސާބު ކިޔަވައިދޭ ޕްރޮފެސަރަކު ކުލާހެއްގައި ދަރިވަރުންނަށް "ލަވް ފޯމިއުލާ" ގެ ފިލާވަޅު ނަގައިދިން މައްސަލާގައި ސަސްޕެންޑްކޮށްފި އެވެ.

އިންޑިއާގެ މީޑިއާތަކުން ރިޕޯޓްކޮށްފައިވާ ގޮތުގައި މިކަމެއް ހިނގާފައި ވަނީ ހަރިއާނާ ސްޓޭޓްގަ އެވެ.

ލޯބި ހާސިލު ކުރާނެ ގޮތް ޕްރޮފެސަރު ބޯޑުގައި ލިޔެގެން އަންހެން ދަރިވަރުންނަށް ކިޔައިދިން މަންޒަރު ދަރިވަރަކު ވީޑިއޯކޮށް ޕްރިންސިޕަލަށް ދެއްކުމުން ޕްރޮފެސަރު ޗަރަން ސިންގް ސަސްޕެންޑް ކުރީ އެވެ. އޭނާ ވަނީ މި މައްސަލާގައި ފަހުން ދަރިވަރުންގެ ކިބައިން މާފަށް އެދިފަ އެވެ.

ޗަރަން ނަގައި ދިން ފިލާވަޅުގައި ބުނާ ގޮތުން ލޯބި ހާސިލު ކުރެވޭނެ ފޯމިއުލާތަކަކީ "ކްލޯޒްނެސް-އެޓްރެކްޝަން=ފްރެންޑްޝިޕްސް، ކްލޯޒްނެސް+އެޓްރެކްޝަން=ރޮމޭންޓިކް ލަވް" އަދި އެޓްރެކްޝަން-ކްލޯޒްނެސް=ކްރަޝް" އެވެ.

އޭނާ މި ފިލާވަޅު ނަގައިދޭ މަންޒަރު ފެންނަ ވީޑިއޯ ވައިރަލްވެފައިވާ އިރު، ބައެއް ދަރިވަރުން ހޭ އަޑު ވެސް ވީޑިއޯ އިން އިވެ އެވެ.