ދައުލަތުގެ ޕެންޝަން ފަންޑު 12 ބިލިއަނަށް އަރައިފި

ދައުލަތުގެ ޕެންޝަން ފަންޑުގައި މިހާރު 12.2 ބިލިއަން ރުފިޔާ އެބަހުރި ކަމަށް ޕެންޝަން އޮފީހުގެ ސީއީއޯ މުހައްމަދު ހުސައިން މަނިކު މިއަދު ވިދާޅުވެއްޖެ އެވެ.

ޕެރެޑައިސް އައިލެންޑް ރިސޯޓުގައި މިއަދު ފެށި ފައިނޭންސް ފޯރަމްގައި މަނިކު ވިދާޅުވީ، ޕެންޝަން ފަންޑުގައި ހުރި ފައިސާ މިދިޔަ ނުވަ އަހަރުގެ ތެރޭގައި ވަރަށް ބޮޑަށް އިތުރު ކުރެވިފައިވާ ކަމަށެވެ. އޭނާ ވިދާޅުވި ގޮތުގައި ފަންޑަށް ފައިސާ އިތުރު ކުރުމަށްޓަކައި އިންވެސްޓް ކުރާ ދާއިރާތައް އަންނަނީ ފުޅާކުރަމުންނެވެ.

ފަންޑަށް ކޮންޓްރިބިއުޝަންގެ ގޮތުގައި 6.9 ބިލިއަން ރުފިޔާ ލިބިފައިވާ އިރު ފައިދާގެ ގޮތުގައި ލިބުނު މިންވަރަކީ ދެ ބިލިއަން ރުފިޔާ އެވެ.

"ފެންޝަން ފަންޑަށް ކޮންޓްރިބިއުޓް ކުރާ މީހުންގެ 38 ޕަސެންޓަކީ 26 އަހަރާއި 35 އަހަރާއި ދެމެދުގެ މީހުން. އެހެންކަމުން މި ފަންޑުގެ ބޮޑު ބަޔަކީ ޒުވާނުން. މީގެ އިތުރުން ޕެންޝަން ފަންޑަށް ކޮންޓްރިބިއުޓް ކުރާ 80 ޕަސެންޓަކީ 45 އަހަރުން ދަށުގެ މީހުން،" މަނިކު ވިދާޅުވި އެވެ.

އެހެންވެ ޕެންޝަން ފަންޑަށް ފައިސާ ޖަމާކުރާ 80 ޕަސެންޓް މީހުންނަށް ޕެންޝަން ފައިސާ ލިބުމުގެ ކުރިން އެ ފައިސާ އިންވެސްޓްކުރުމަށް ވިއްސަކަށް އަހަރު އެބައޮތް ކަމަށް އޭނާ ވިދާޅުވި އެވެ.

މަނިކު ވިދާޅުވީ، މުސާރައިގެ ނިސްބަތުން ޕެންޝަން ފަންޑަށް ޖަމާކުރާ ވަރު އަދިވެސް ކުޑަ ކަމަށެވެ. އަދި އެކި ކުންފުނިތަކުން ލިބޭ މިންވަރު ވެސް ތަފާތު ކަމަށް އޭނާ ވިދާޅުވި އެވެ. މީގެ އެންމެ ބޮޑު ސަބަބަކީ ޕެންޝަން ދޭން ޖެހޭނީ އަސާސީ މުސާރައިގެ 14 ޕަސެންޓު ކަމަށް ވިޔަސް ބައެއް ތަންތަނުން އަސާސީ މުސާރަ ވަރަށް ބޮޑަށް ކުޑަކޮށްފައި އޮތުންކަން މަނިކު ފާހަގަކުރެއްވި އެވެ. މިކަމުގެ ސަބަބުން ކޮންޓްރިބިއުޝަން ކުޑަވާ ކަމަށް އޭނާ ވިދާޅުވި އެވެ.

ކޮންމެ މުވައްޒަފެއްގެ މުސާރައިގެ 14 ޕަސެންޓް ޕެންޝަން ފަންޑަށް ޖަމާކުރަން ޖެހެ އެވެ. އެއީ މުވައްޒަފުގެ މުސާރައިން ހަތް ޕަސެންޓް އަދި ވަޒީފާ އަދާކުރާ ތަނުން އެ މުވައްޒަފެއްގެ އަސާސީ މުސާރައިގެ ހަތް ޕަސެންޓެވެ.

ފައިނޭންސް ފޯރަމް މިއަދު ހަވީރު 4:00 އާ ހަމައަށް ކުރިޔަށް ގެންދާނެ އެވެ. ފޯރަމްގައި، ސަރުކާރާއި ފައިނޭންޝަލް ސެކްޓަރު ގުޅިގެން ޕްރައިވެޓް ސެކްޓަރު ތަރައްގީކޮށް ހަރުދަނާކުރުމާ ބެހޭ ގޮތުން މަޝްވަރާ ކުރާނެ އެވެ. އަދި އެކަން ހާސިލު ކުރުމަށްޓަކައި ކުރެވެން ހުރި ކަންތައްތަކާ ގުޅޭގޮތުން މަޝްވަރާ ކުރާނެ އެވެ.

އަމިއްލަ ވިޔަފާރިތައް ތަރައްގީކޮށް ކުރިއެރުވުމަށް އެސްއެމްއީ ބޭންކެއްގެ ބޭނުންތެރިކަމާއި، ރާއްޖޭގެ ގާނޫނުތަކާއި ގަވާއިދުތަކުގެ ތެރެއިން އެ ވިޔަފާރިތައް ކުރިއެރުވުމަށް އެންމެ އެކަށޭނަ މާހައުލެއް ހޯދައިދިނުމާ ގުޅޭގޮތުން ފުޅާ ދާއިރާއެއް ގައި ފައިނޭންސް ފޯރަމްގައި މައުލޫމާތު ބަދަލުކުރުމަށް ވެސް ވަނީ ހަމަޖެހިފަ އެވެ.