އެމެރިކާގެ ހަނގުރާމަ މަތީ ބޯޓެއް ގުދަނެއްގެ މައްޗަށް ވެއްޓިއްޖެ

ލޮސް އެންޖަލްސް (މެއި 18) - އެމެރިކާގެ އެފް-16 ގެ ހަނގުރާމަ މަތީ ބޯޓެއް ލޮސް އެންޖަލްސްގެ ބޭރުގައިވާ ވައިގެ މަރުކަޒެއްގެ ކައިރީގައިވާ ގުދަނެއްގެ މައްޗަށް ވެއްޓިއްޖެ އެވެ.

ބޯޓު ވެއްޓުމުގެ ކރިން ބޯޓުގެ ޕައިލެޓް ވަނީ ވައި ކުޑައިގައި ފުންމާލައިފަ އެވެ. ބޯޓު ވެއްޓުމުން ރޯވި އަލިފާން ވެސް ވަނީ ގުދަނުގައިވާ އަލިފާން ނިއްވާ ނިޒާމުން ނިއްވާލައިފަ އެވެ.

އެމެރިކާގެ އެއާ ފޯސް އިން ބުނެފައި ވަނީ އެ ހާދިސާގައި ބިންމަތިން ފަސް މީހުން ޒަޚަމްވި ކަމަށެވެ. ބޯޓު ވެއްޓުނު މަންޒަރުގެ ވީޑިއޯއެއް ގުދަނުގައި މަސައްކަތް ކުރާ މީހަކު ވަނީ އޭނާގެ ފޯނުން ނަގައިފަ އެވެ. ފޭސްބުކުގައި އޭނާ ބުނެފައި ވަނީ "އަހަރެމެންގެ އިމާރާތުގައި އަސްކަރީ މަތިންދާ ބޯޓެއް އެބައޮތް" ކަމަށެވެ. އަދި ގުދަނުގެ ފުރާޅުން ބައެއް ވެއްޓި، ފާރުތައް ހަލާކުވެފައިވާ ކަމަށް އޭނާ ބުނެފައިވެ އެވެ.

މި ހާދިސާ ހިނގާފައި ވަނީ މާޗް އެއާ ރިޒާވް ބޭސްއާ ކައިރީގަ އެވެ.

އެއާ ފޯސް ރިޒާވް އިން ބުނެފައި ވަނީ ވެއްޓުނު ބޯޓު އުޅުނީ ނޯތު އެމެރިކަން އެއަރޯސްޕޭސް ޑިފެންސް ކޮމާންޑުގެ ޓްރޭނިން މިޝަނެއްގައި ކަމަށެވެ.