މިސްކިތަށް ވެއްޓުނު މީހާ އަށް ފަރުވާ ދެނިކޮށް ނިޔާވެއްޖެ

މިއަދުގެ ހުކުރު ނަމާދަށް ހުއްޓާ ވެއްޓިގެން ހޮސްޕިޓަލަށް ގެންދިޔަ މީހާ ފަރުވާ ދެމުން ދަނިކޮށް އައިޖީއެމްއެޗުގައި މީގެ އިރުކޮޅެއް ކުރިން ނިޔާވެއްޖެ އެވެ.

ޒިޔާރަތް މިސްކިތުގައި ހުކުރު ނަމާދަށް ހުއްޓާ ވެއްޓުނީ ސ. ހިތަދޫ މޫންލައިޓްވިލާ އަޝްރަފް ސައީދު 44، (އަސޯ) އެވެ. އޭނާ ވެއްޓުމުން ހޮސްޕިޓަލަށް ގެންދިއުމުގައި އެހީވީ އެވަގުތު މިސްކިތުގައި އިންނެވި ނައިބު ރައީސް ފައިސަލް ނަސީމާއި އެމަނިކުފާނުގެ ބޮޑީގާޑުންނެވެ.

ނައިބު ރައީސް ފައިސަލް ވަނީ ފަހުން އައިޖީއެމްއެޗަށް ވަޑައިގެންފަ އެވެ.

އައިޖީއެމްއެޗްގެ މީޑިއާ އޮފިޝަލް ވިދާޅުވީ އަޝްރަފަށް ފަރުވާ ދެމުން ދަނިކޮށް ނިޔާވެފައިވާ ކަމަށެވެ. އެކަމަކު ނިޔާވި ސަބަބު އަދި ސާފުނުވާ ކަމަށް އޮފިޝަލް ވިދާޅުވި އެވެ.

އަޝްރަފްގެ އާއިލާގެ ފަރާތުން ވާހަކަ ދެއްކި މީހަކު "މިހާރު" އަށް ބުނީ އަޝްރަފް އަނބުރައިގަނެގެން ވެއްޓުނީ ބްލަޑް ޕްރެޝަރު މަތިވެގެން ކަމަށް ބެލެވޭ ކަމަށެވެ. އޭނާގެ ހިތުގެ އެއްވެސް މައްސަލައެއް ނުހުންނަ ކަމަށް އާއިލާ އިން ވާހަކަ ދެއްކި މީހާ ބުންޏެވެ.

"އެކަމަކު، އަޝްރަފްގެ ހަކުރު ވަރަށް މަތިވާނެ،" އޭނާ ބުންޏެވެ.

އަޝްރަފް މިސްކިތަށް ވެއްޓުމުން ހޮސްޕިޓަލަށް ގެންދިޔައީ ނައިބު ރައީސްގެ ބޮޑީގާޑުން ދަތުރުކުރާ ކާރުގަ އެވެ.

އާއިލާ އިން ވާހަކަ ދެއްކި މީހާ ބުނީ އަޝްރަފު ކާރުގައި ހޮސްޕިޓަލަށް ގެންދިޔައިރު ވެސް ހުރީ ރަނގަޅަށް ކަމަށާއި ޑޮކްޓަރަށް ދައްކަން ވަނީ ވެސް މީހެއްގެ އެހީތެރިކަމަކާ ނުލައި ހިނގާފައި ކަމަށެވެ. އޭނާ އިތުރަށް ގޯސްވީ، އާންމު ޕްރޮސީޖާގެ ތެރެއިން ޑޮކްޓަރަށް ދައްކައި ޓެސްޓުތައް ވެސް ހެދުމަށް ފަހު، ރިޕޯޓު ޑޮކްޓަރަށް ދައްކަން ތައްޔާރުވެފައި ވަނިކޮށް ކަމަށް އާއިލާ އިން ބުންޏެވެ.

"ޑޮކްޓަރަށް ރިޕޯޓު ދެއްކެންދެން ގޮނޑީގައި އިށީނދެގެން ހުއްޓާ ކުއްލި އަކަށް ކޮލެޕްސްވީ. ގޮނޑި އަށް ދެމުނީ. ދެން އަވަހަށް ގޮސް ސީޕީއާރު ދޭން އުޅުނީ،" އާއިލާ އިން ވާހަކަ ދެއްކި މީހާ ކިޔައިދިނެވެ.

އައިޓީ ދާއިރާގައި މަސައްކަތް ކުރާ އަޝްރަފްގެ އަންބަކާއި ދެ ކުދިން ދުނިޔޭގައި އެބަ ތިއްބެވެ. އޭނާގެ މައްޗަށް ކަށުނަމާދު ކުރުން އޮންނާނީ މިރޭގެ ފަތިސް ނަމާދަށް ފަހު އާ ސަހަރާ މިސްކިތުގަ އެވެ.

އަޝްރަފް ވަނީ ރައްޔިތުންގެ މަޖިލިސް ކަހަލަ ދައުލަތުގެ ބޮޑެތި ބައެއް ތަންތަނުގެ ނެޓްވޯކިން އާއި އައިޓީ ދާއިރާގެ ބައެއް އެހެން ކަންކަމުގައި ވެސް މަސައްކަތްކޮށްފަ އެވެ. އޭނާއަކީ އެ ދާއިރާ އިން ރާއްޖޭގައި ފާހަގަކޮށްލެވޭ ތަޖުރިބާކާރެކެވެ.

އަޝްރަފަކީ 1980 ގެ އަހަރުތަކުގައި ރައްޔިތުންގެ މަޖިލިހުގައި އައްޑު އަތޮޅު ތަމްސީލް ކުރެއްވި މުހައްމަދު ސައީދުގެ ބޭފުޅެކެވެ. މީގެ އިތުރުން އަޝްރަފަކީ ކުރީގެ ހެލްތު މިނިސްޓަރު ޑރ. މަރިޔަމް ޝަކީލާގެ އެއްބަފާ ކޮއްކޮއެކެވެ.

މިހާރު އަވަހާރަވެފައިވާ މުހައްމަދު ސައީދަކީ އިނގިރޭސިން އައްޑޫގައި އުޅުނު ދުވަސްވަރު ދިވެހިންގެ ތެރެއިން އެ މީހުންނާ އެކު މަސައްކަތް ކުރި އެންމެ އިސް ބޭފުޅާ ވެސް މެ އެވެ. އަދި އައްޑޫގައި ޓޫރިޒަމް އާލާކުރެވޭތޯ ވެސް ސައީދު ގިނަ މަސައްކަތްތަކެއް ކުރެއްވި އެވެ.