މިސްކިތަށް ވެއްޓުނު މީހަކަށް އެހީވީ ނައިބު ރައީސާއި އެމަނިކުފާނުގެ ބޮޑީގާޑުން، ގިނަ ބައެއްގެ ތައުރީފު

މިއަދުގެ ހުކުރު ނަމާދަށް ހުއްޓައި ވެއްޓުނު މީހަކަށް ނައިބު ރައީސް ފައިސަލް ނަސީމާއި އެމަނިކުފާނުގެ ބޮޑީގާޑުންގެ ޓީމުން އެހީވުމުން ގިނަ ބަޔަކު ފައިސަލަށް ތައުރީފު ކުރަން ފަށައިފި އެވެ.

ނައިބު ރައީސް ފައިސަލް ދިރިއުޅުއްވާ، ސަރުކާރުގެ ރަސްމީ ގެކޮޅު ހިލާލީގެ ކައިރީގައި ހުންނަ ޒިޔާރަތް މިސްކިތުގައި މިއަދު ހުކުރު ނަމާދަށް ހުއްޓައި ސ. ހިތަދޫ މޫންލައިޓްވިލާ އަޝްރަފް ސައީދު 44، (އަސޯ) ވެއްޓުމުން އޭނާ ނަގައިގެން ހޮސްޕިޓަލަށް ގެންދިއުމަށް އެހީވީ އެވަގުތު އެ މިސްކިތުގައި ނައިބު ރައީސާ އެކު ތިބި އެމަނިކުފާނުގެ ބޮޑީގާޑުންގެ ޓީމުންނެވެ. ހުކުރު ނަމާދުގެ ސަލާން ދިނުމާ އެކު ކަހަލަ ގޮތަކަށް ވެއްޓުނު އަޝްރަފް ކައިރި އަށް ފުރަތަމަ ވަޑައިގެންނެވި އެއް ބޭފުޅަކީ ފައިސަލް ކަމަށް މަންޒަރު ދުށް މީހުން ބުނެ އެވެ.

ހޮސްޕިޓަލަށް ގެންދިޔަތާ ދެ ގަޑިއެއްހާއިރު ފަހުން އަޝްރަފް ވަނީ ނިޔާވެފަ އެވެ.

އަޝްރަފް ނަގައިގެން ކާރަށް އެރުވީ ވެސް ފައިސަލްގެ ބޮޑީގާޑުންނެވެ.

ސޯޝަލް މީޑިއާގައި އާންމުވެފައިވާ ފޮޓޯތަކުން ފެންނަ ގޮތުގައި އަޝްރަފަށް ބޮޑީގާޑުން އެހީވާއިރު، އެ މީހުންނަށް އިރުޝާދު ދެއްވަން ނައިބު ރައީސް ފައިސަލް ވެސް އެ މީހުން ކައިރީގައި ހުންނެވި އެވެ.

އަޝްރަފް ހޮސްޕިޓަލަށް ގެންދިޔައީ ވެސް ނައިބު ރައީސްގެ މޮޓޯ ކޭޑާ އެކު އެމަނިކުފާނުގެ ބޮޑީގާޑުން ދަތުރުކުރާ ސެކިއުރިޓީ ކާރުގަ އެވެ. ސޯޝަލް މީޑިއާގައި އެ ފޮޓޯތައް އާންމުވުމާ އެކު ގިނަ ބަޔަކު ވަނީ އެކަމަށް ތައުރީފްކޮށްފަ އެވެ.

އާންމުންގެ މީހަކު ޓްވީޓާގައި އެކަން ސިފަކުރީ މި ސަރުކާރުގައި ވެރިންނަށް ވުރެ ރައްޔިތުންނަށް އިހްތިރާމް ލިބިގެންވާ ކަން ދައްކުވައިދިން ކަމަކަށެވެ. މިސްކިތަކުން ކުޑަކުއްޖަކު ފެނުނަސް ރައީސް އިބްރާހިމް މުހައްމަދު ސޯލިހް ވެސް އެ ކުދިންނާ ވާހަކަ ދައްކަވައި، އަޅާލައްވާ ކަން އެ މީހާ ފާހަގަކޮށްފައިވެ އެވެ.

އެ މީހާ އެ އިޝާރާތް ކުރީ ދާދިފަހުން ހުކުރު މިސްކިތުން ރައީސް އިބްރާހިމް މުހައްމަދު ސޯލިހާ ބައްދަލުވި ކުޑަކުއްޖަކާ އެމަނިކުފާނު ސަމާސަ ކުރެއްވުމުން އެކަމަށެވެ. އެ ވީޑިއޯ ސޯޝަލް މީޑިއާގައި އާންމުވުމުން އެކަމަށް ވެސް ގިނަ ބަޔަކު ތައުރީފްކުރި އެވެ.

ސޯޝަލް މީޑިއާގައި ނައިބު ރައީސް ފައިސަލަށް ތާއީދުކުރާ ބައެއް މީހުން ބުނެފައި ވަނީ އެމަނިކުފާނު މިއަދު ކަންތައް ކުރެއްވި ގޮތުން އެތައް ބައެއްގެ އިހުތިރާމް ހޯއްދަވައިފި ކަމަށެވެ.

މިދިޔަ ރޯދަ މަހު ވެސް ނައިބު ރައީސް ފައިސަލް ނަސީމް ވަނީ ނަމާދު ކުރައްވަން މިސްކިތަށް ވަޑައިގެން ގިނަ ބަޔަކާ ސަލާން ކުރައްވައި ހާލު ބައްލަވައި އާންމުންގެ ލޯބި ހޯއްދަވައިފަ އެވެ. ޚާއްސަކޮށް އިސްލާމީ މަރުކަޒުގައި ދީނީ ނަސޭހަތް އަޑުއައްސަވަން އެމަނިކުފާނު ހުންނަވާކަން ފާހަގަކުރެވެ އެވެ.