އޭދަފުށީ ހިތްގައިމު މިސްކިތުގެ ބާނީ އަވަހާރަވެއްޖެ

ރާއްޖޭގައި މިހާރު ހުރި އެންމެ ރީތި އެއް މިސްކިތުގެ ބާނީ ބ. އޭދަފުށީ، ޑޭޒީވިލާ، މުހައްމަދު އަލީ މިއަދު އަވަހާރަވެއްޖެ އެވެ.

މި އަހަރުގެ މާޗު 20 ވަނަ ދުވަހު އޭދަފުށީގައި ހުޅުވި "މަސްޖިދުލް މުހައްމަދު އަލީ" ގެ ބާނީ މުހައްމަދު އަލީ އުމުރުން 91 އަހަރުގައި އަވަހާރަވީ އިންޑިއާގެ ޗެންނާއީގައި ފަރުވާދެމުން އަންނަނިކޮށެވެ.

އުމުރުން ދުވަސްވެ، ބަލިވެ އުޅުއްވާތާ އެތައް ދުވަހެއް ވެފައިވާ މުހައްމަދު އަލީ ޗެންނާއީ އަށް ގެންދިޔައީ އިތުރަށް ހާލު ގޯސްވެގެން މީގެ ދުވަސްތަކެއް ކުރިންނެވެ.

މުހައްމަދު އަލީ އެންމެ ބޮޑަށް ބޭނުންވި ކަމަކީ އޭނާ މި ދުނިޔެ އިން ވަކިވުމުގެ ކުރިން އަމިއްލަ ރަށުގައި މިސްކިތެއް ބިނާކޮށްދެއްވުމެވެ. މީގެ ހަތަރު އަހަރު ކުރިން އެ މިސްކިތުގެ އަމަލީ މަސައްކަތްތައް މުހައްމަދު އަލީގެ ބޭފުޅުންގެ އެހީތެރިކަމާ އެކު ނިންމައި ހުޅުވީ މީގެ 8 މަސް ކުރިން މި އަހަރުގެ މާޗު މަހުގެ 20 ވަނަ ދުވަހު އެވެ.

އެ ރަސްމިއްޔާތުގައި ވެސް ފުރޮޅުލީ ގޮނޑިއެއްގައި އިންނަވައިގެން މުހައްމަދު އަލީ ބައިވެރިވެވަޑައިގެންނެވި އެވެ. އެ ދުވަހުގެ ރޯދަވީއްލަން ވަރަށް ކައިރިވެފައި ވަނިކޮށް، އެ ޗާލު މިސްކިތް ހުޅުވި ވަގުތު ވެސް އޭނާގެ މޫނުމަތިން ފެނުނީ އުފާވެރިކަމުގެ "ކަރުނަ" އެވެ. ރަސްމިއްޔާތަށް ދިޔަ މީހުންނާއި އާއިލާގެ މެމްބަރުންނާ ސަލާން ކުރައްވައި މިސްކިތުގެ ތެރޭގައި ގުރޫޕް ފޮޓޯތައް ނެންގެވި އެވެ.

މުހައްމަދު އަލީއަކީ އޭދަފުށީގައި މަޝްހޫރު ވިޔަފާރިވެރިއެކެވެ. އޭނާ އެންމެ ހަރަކާތްތެރި ދުވަސްވަރު އަމިއްލަ މަސްދޯނިފަހަރާއި މުދާ އުފުލާ ދޯނިފަހަރު ގެންގުޅުއްވި އެވެ. ބ. އަތޮޅުގައި ފަޅުރަށްރަށް ބެލެހެއްޓެވުމުގެ އިތުރުން ގޭގައި ފިހާރައެއް ހިންގަވައި އަދި ބަކަރި ގެންގުޅުއްވި އެވެ. މުހައްމަދު އަލީ ގެންގުޅުއްވި ފެރީތައް މިހާރު ވަނީ އެމްޓީސީސީ އަށް ކުއްޔަށް ދޫކޮށްލައިފަ އެވެ.

މުހައްމަދު އަލީ އަވަހާރަވުމުގެ ކުރިން މުޅި ރާއްޖެ އަށް ދޫކޮށްލެއްވި މިސްކިތް ވެފައި ވަނީ މުޅިން ތަފާތު ކޮންސެޕްޓަކަށް އިމާރާތް ކުރި މިސްކިތަށެވެ. އޭދަފުއްޓަށް ނުދާ މީހަކު ނަމަ ފޮޓޯއަކުން އެ މިސްކިތް ފެނުނަސް ހައިރާންވާހާ ރީއްޗެވެ. އޭދަފުއްޓަށް ޒިޔާރަތް ކުރާ މީހުން އެ މިސްކިތް ނުބަލައި ނުވަތަ ފޯނަށް މަންޒަރު ރައްކާ ނުކޮށް މިހާރު އެ ރަށުން ނުފައިބަ އެވެ. މުޅި އޭދަފުށީގެ ލޭންޑްމާކެއްގެ ގޮތުގައި ފެންނަން މިހާރު ހުރީ މުހައްމަދު އަލީގެ ހަންދާންތަކެވެ.

މުހައްމަދު އަލީގެ ބޭފުޅުންގެ ތެރެއިން އެންމެ މަޝްހޫރު އެއްބޭފުޅަކީ މެޑްޓެކްގެ އެއް ހިއްސާދާރު މުބާހު ރަފީއު އެވެ. މުބާހުއާ އެކު 13 ބޭފުޅުން މުހައްމަދު އަލީ އަށް ލިބިވަޑައިގަތެވެ.

މުހައްމަދު އަލީގެ އަމިއްލަ ހަރަދުގައި އިމާރާތްކޮށް، އޭނާގެ ނަން ދީފައިވާ 1،200 އެއްހާ މީހުންގެ ޖާގައިގެ މިސްކިތް ހުޅުއްވައި ދެއްވީ އެ އާއިލާއާ އަބަދުވެސް ގާތް ގުޅުމެއް ބާއްވަމުން ގެންދަވާ ވިލާ ކޮލެޖުގެ ރެކްޓަ ޑރ. އަހުމަަދު އަންވަރެވެ.

އެ ރަސްމިއްޔާތުގައި އޭނާ ވިދާޅުވީ، އެއީ ދުނިޔޭގައި ވެސް މިސްކިތްތަކުގެ ފަންނުވެރިކަމާއި ފަރުމާތައް ފެންނަ ވަރަށް ހިތްގައިމު މިސްކިތެއް ކަމަށެވެ.

މަސްޖިދުލް މުހައްމަދު އަލީ އިމާރާތް ކުރުމުގައި އަސްލަކަށް ބަލާފައި ވަނީ އޮމާން، އުޒްބަކިސްތާން، ދުބާއީ، ސައޫދީ އަރަބިއްޔާ އަދި ތުރުކީގެ މިސްކިތްތަކެވެ. އެ ގައުމުތަކަށް މުހައްމަދު އަލީގެ ބައެއް ބޭފުޅުން ވަޑައިގެންް އަމިއްލަ އަށް އެ މިސްކިތްތައް ބެއްލެވި އެވެ. ހާއްސަކޮށް ތުރުކީގެ މިސްކިތްތަކުގައި ހުންނަ ޑިޒައިން މަސްޖިދުލް މުހައްމަދު އަލީ އިން ފެންނަން ހުއްޓެވެ.

މިސްކިތުން އެންމެ ބޮޑަށް އަޅައިގަންނަނީ ފާރިސީ ސްޓައިލްގެ ޗާލު ޑިޒައިންތަކެވެ.