އޭ380ގެ އެންމެ ކުރު ކޮމާޝަލް ދަތުރު؛ 40 މިނެޓް

ޔޫއޭއީގެ ގައުމީ އެއާލައިން އެމިރޭޓްސް އިން ވައިގެ ދަތުރުފަތުރުގައި އަބަދުވެސް ތަފާތު ދައްކަ އެވެ. މިފަހަރު ރެކޯޑް ހެދީ ބިޔަ އެއާބަސް އޭ380 ގެ އެންމެ ކުރު ކޮމާޝަލް ދަތުރުންނެވެ.

މިދިޔަ ހޯމަ ދުވަހު ދުބާއީން އޮމާންގެ ވެރިރަށް މަސްކަޓަށް އެއާބަސް އޭ380 މަރުކާގެ ބޯޓްގައި ފެށި ދަތުރުގެ ދިގުމިނަކީ އެންމެ 40 މިނެޓެވެ. މިއީ މިވަރުގެ ބޯޓެއް ސާފުކުރަން ހޭދަކުރާ ވަގުތަށް ވުރެ ފަސް އެންމެ ފަސް މިނެޓް އިތުރު މިންވަރެކެވެ. ދަތުރުގައި ކަޑައްތު ކުރަނީ 340 ކިލޯމީޓަރެވެ.

މިދިޔަ ހޯމަ ދުވަހު ފެށި މި ދަތުރުތަކަށް، ބޮޑު ޑިމާންޑެއް ވެސް އެބަ އޮތެވެ.

ދުވާލަކު ދެ ދަތުރު ދުބާއީން މަސްކަޓް އިންޓަނޭޝަނަލް އެއާޕޯޓް (އެމްސީޓީ) އަށް ބާއްވަން މިހާރު ވަނީ ހަމަޖެހިފަ އެވެ. އަދި މި ދަތުރުތައް ރޭވިފައިވާ ގޮތަށް ބަލާއިރު އަންނަ ސެޕްޓެމްބަރު މަހާ ހަމައަށް މިހާރު ތާވަލުކޮށްފައިވާ ގޮތަށް ދަތުރުތައް ބާއްވާނެ އެވެ.

އެމިރޭޓްސްއަކީ 1993 އިން ފެށިގެން އޮމާނަށް ދަތުރު ކުރަމުން އަންނަ އެއާލައިނެކެވެ.

އެގޮތުން މިހާރު ވެސް ދުވާލަކު ތިން ދަތުރު ބޮއިން 777-300ER މަރުކާގެ ބޯޓްފަހަރުގައި ދަތުރުތައް އަންނަނީ ކުރަމުންނެވެ. މެދުއިރުމަތީގެ އެންމެ މަގުބޫލު އެއާލައިންތަކުގެ ތެރޭގައި ހިމެނޭ އެމިރޭޓްސްއަކީ މި ވަގުތު ދުނިޔޭގެ 150 އަށް ވުރެ މަންޒިލަކަށް ދަތުރު ކުރަމުން އަންނަ އެއާލައިނެކެވެ.