ސުއޫދުގެ ވާހަކަތަކަށް ފަހު، ސީޕީ ވިދާޅުވަނީ އާއްމުންގެ އިތުބާރު ހޯދަން ގިނަ ކަންކަން ކުރަންޖެހޭ ކަމަށް

ގޮތް ނޭނގޭ މަރުތަކާއި ގެއްލިފައިވާ މީހުންގެ މައްސަލަތައް ބަލަން އުފައްދާފައިވާ ރިޔާސީ ކޮމިޝަނުން އިއްޔެ ހާމަކުރި މައުލޫމާތުތަކާ އެކު، އާންމުންގެ އިތުބާރު ހޯދަން ގިނަ ކަންކަން ކުރަންޖެހޭ ކަމަށް ޕޮލިސް ކޮމިޝަނަރު މުހައްމަދު ހަމީދު ރޭ ވިދާޅުވެއްޖެ އެވެ.

ވަގަށް ނަގާފައިވާ ނޫސްވެރިޔާ ރިލްވާން އަހުމަދުގެ މައްސަލަައާ ގުޅިގެން އިއްޔެ ބޭއްވި ނޫސްވެރިންގެ ބައްދަލުވުމުގައި، އެފަދަ މައްސަލަތައް ތަހުގީގުކުރަން އުފައްދާފައިވާ ކޮމިޝަންގެ ރައީސް ހުސްނުއް ސުއޫދު ވިދާޅުވީ، ރިލްވާން އުޅޭ އެޕާޓްމަންޓް ކައިރިން ވަގަށް ނަގައިގެން ގެންގޮސް ރިލްވާން އެންމެ ފުރަތަމަ އެރުވީ ޑިންގީއަކަށެވެ. ޑިންގީގައި ގެންގޮސް ކަނޑުމަތިން އެހެން އުޅަނދަކަށް އަރުވައި އޭނާ މަރާލާފައިވާ ކަމަށް ވިދާޅުވި އެވެ.

ނަމަވެސް ލިބިފައިވާ ހެކި ބަހުގައި ފުށުއެރުންތަކެއް ހުރުމުން މިކަން އަދި ކަށަވަރުކުރަންޖެހޭ ކަމަށް ވިދާޅުވި އެވެ. ސުއޫދު ވިދާޅުވީ ރިލްވާން އެރުވި އުޅަނދުގެ ވެރިފަރާތް ވެސް ހޯދިފައިވާ ކަމަށެވެ.

ސުއޫދުގެ ވާހަކައިގައި ވަނީ ފުލުހުން މިހާތަނަށް ކޮށްފައިވާ ބައެއް ތަހުގީގުތަކާ ގުޅުން ހުރި އަދި ފުލުހުން ޖަވާބުދާރީވާން ޖެހޭ ފަދަ ގިނަ ވާހަކަތަކެއް ހާމަކުރައްވައިފަ އެވެ. އޭގެ ތެރޭގައި ފުލުހުން މިހާތަނަށް ހާމަނުކުރާ ބައެއް ބޮޑެތި މައްސަލަތަކުގެ ވާހަކަތައް ވެސް ހިމެނެ އެވެ.

ރިލްވާން ވަގަށް ނެގިތާ މިދިޔަ އޮގަސްޓް 8 ވަނަ ދުވަހު ފަސް އަހަރު ވިއިރު، އިއްޔެއާ ހަމައަށް އޭނާއަށް ވީ ގޮތެއް އަދި އެ މައްސަލައިގެ ތަފްސީލެއް ނުލިބެ އެވެ. ފުލުހުން ވެސް މީގެ ކުރިން ބުނެފައިވަނީ ރިލްވާނު ވަގަށް ނަގައިގެން ރަތް ކާރަކަށް އަރުވައިގެން ގެންދިޔަ ކަމެވެ. އެކަމަކު ފަހުން ވީ ގޮތެއް ނޭނގެ އެވެ. އެ މައްސަލަ ތަހުގީގުކުރުމުގައި ފުލުހުން އޭރު އިހުމާލުވެފައިވާކަމުގެ ތުހުމަތު އާއިލާއިން ކުރި އެވެ.

އިނގިރޭސި ވިލާތުގެ ފުލުހުންނާއި ޓެރަރިޒަމާ ދެކޮޅަށް މަސައްކަތްކުރާ ފަރާތްތަކާ އެކު، އެ ގައުމުގައި ބޭއްވެވި ބައްދަލުވުންތަކަށް ފަހު، ސީޕީ ހަ،ީދު ކުރެއްވި ޓްވީޓެއްގައި ވިދާޅުވީ ރިޔާސީ ކޮމިޝަނުން ހާމަކުރި މައުލޫމާތުތަކާ ގުޅިގެން ބަޔާނެއް ނެރޭނެ ކަމަށެވެ. އަދި އާއްމުންގެ އިތުބާރު ހޯދުމަށް ގިނަ މަސައްކަތްތަކެއް ކުރަންޖެހޭ ކަމަށް ވިދާޅުވި އެވެ.

ރިލްވާނަށް ނުރައްކަލެއް އޮތް ކަމަށް ބުނެ އެޕްރީލް 24، 2014 އިން ޖޫން 22، 2014 އަށް ފުލުހުންގެ އިންޓެލިޖެންސުން އޭނާ އަށް ފާރަލި އެވެ. ނަމަވެސް އެ ވާހަކަތަކުގައި ފުށުއެރުންތަކެއް އެބަހުރި ކަމަށް ސުއޫދު ވިދާޅުވި އެވެ.

ރިލްވާންގެ މައްސަލަ އަނބުރާލުމަށް ރައީސަކަށް އޭރު ހުންނެވި އަބްދުﷲ ޔާމީން މަސައްކަތްކުރެއްވި ކަމުގެ ހެކި ލިބިފައިވާ ކަމަށާއި ފަންޑިތަ ހަދާ މީހަކު ބޭނުންކޮށްގެން ފާލު ބަލައި އެ މައްސަލައިގެ ފޯކަސް އަނބުރާލަން މަސައްކަތްކުރި ކަމަށް ވިދާޅުވި އެވެ. އެގޮތުން ވާރޭގެ ތެރޭގައި، މާފަންނު ގެއަކުން ވިލިނގިއްޔަށް ފުލުހުން ފޮނުވާފައިވާ ކަމަށް ވިދާޅުވި އެވެ.

ރިލްވާން ގެއްލުނު ފަހުން އިންޓެލްގައި މަސައްކަތްކުރި ދެ މީހަކު، ކޮންޓްރޯލާ އޮފް އިމިގްރޭޝަނަކަށް އޭރު ހުންނެވި ހަސަން އަލީ ކައިރިއަށް ގޮސް ރިލްވާންގެ ޕާސްޕޯޓު ކޮޕީއެއް ހޯދަން ބޭނުންވާ ކަމަށާއި އެކަން ކުރަން ބޭނުންވަނީ ރިލްވާން ސީރިއާއަށް ގޮސް މަރުވެފައިވާކަން ދެއްކުމަށާއި އަދި ރިލްވާނާ ގުޅޭގޮތުން ދައްކަމުންދިޔަ ވާހަކަތައް ހުއްޓުމަށް ކަމަށް ސުއޫދު ވިދާޅުވި އެވެ.