މުސްއަބްގެ ސަސްޕެންޝަން ފަސްވަނަ ފަހަރަށް އިތުރުކޮށްފި

އިސްލާމިކް މިނިސްޓްރީގެ ޕާމަނަންޓް ސެކްރެޓަރީ މުސްއަބް އަބްދުﷲގެ ސަސްޕެންޝަން ފަސް ވަނަ ފަހަރަށް އިތުރުކޮށްފި އެވެ.

ސިވިލް ސާވިސް ކޮމިޝަން (ސީއެސްސީ) އިން ބަލަމުންދާ މައްސަލައަކާ ގުޅިގެން މުސްއަބް އެންމެ ފުރަތަމަ ސަސްޕެންޑުކުރީ މިދިޔަ މެއި 29 ވަނަ ދުވަހެވެ. އެއަށްފަހު ތިން މަސް ވަންދެން، އޭނާގެ ސަސްޕެންޝަނަށް 30 ދުވަސް އިތުރުކުރި އެވެ.

އެންމެ ފަހުން އިތުރުކުރި 30 ދުވަސް ހަމަވުމުން ސީއެސްސީން އޭނާގެ ސަސްޕެންޝަނަށް މިދިޔަ މަހުގެ 25 ވަނަ ދުވަހު 15 ދުވަސް އިތުރުކުރި އެވެ. އެ މުއްދަތު މާދަމާ ހަމަވާތީ، އެ ކޮމިޝަނުން އިއްޔެ ވަނީ އިތުރު 15 ދުވަސް ދީފަ އެވެ.

ސީއެސްސީގެ ގަވާއިދު ބުނާގޮތުން މުވައްޒަފަކު ސަސްޕެންޑުކޮށް މުސާރަ ލިބޭގޮތަށް ބެހެއްޓޭނީ 30 ދުވަހެވެ. މުސާރަ ނުލިބޭ ގޮތަށް އިތުރު 60 ދުވަސް ބެހެއްޓޭނެ ކަމަށް ބުނެ އެވެ. އެނގިފައިވާ ގޮތުގައި މުސްއަބް ސަސްޕެންޑުކުރީ އިސްތިސްނާ ހާލަތުގަ އެވެ.

އިސްލާމިކް މިނިސްޓްރީގެ މުވައްޒަފަކު މުސާރައިން ވައްކަންކުރި ކަމުގެ ތުހުމަތުކޮށް ކުރީގެ އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު މިދިޔަ ނޮވެމްބަރު މަހު އޭސީސީއަށް މައްސަލައެއް ހުށަހެޅި އެވެ. އޭނާ އެ މައްސަލަ ހުށަހެޅީ އެކަމުގައި މުސްއަބްގެ ބައިވެރިވުން ވެސް އޮތްކަމަށް ތުހުމަތުކުރާނީ އެކަން ބެލުމަށެވެ. ނަމަަވެސް މައްސަލަ ބެލުމަށްފަހު އެ ކޮމިޝަނުން ނިންމާފައިވަނީ އެ ތުހުމަތުގައި މުސްއަބްގެ އެއްވެސް ބައިވެރިވުމެއް ނެތް ކަމަށެވެ. އަދި އެކަން އޭސީސީގެ ވެބްސައިޓުގައި އާއްމުކޮށް ޝާއިއުކޮށްފައި ވެސް ވެ އެވެ.

އެއަށްފަހު މުސްއަބަށާއި އިސްލާމިކް މިނިސްޓްރީއަށް ވައްކަމުގެ ތުހުމަތުކޮށް މީހަކު ކުރި ޓްވީޓަކަށް އޭނާ ވަނީ، އޭސީސީން މައްސަލަ ނިންމިގޮތުގެ ރިޕޯޓުން ތަންކޮޅެއް ސްކްރީންޝޮޓް ނަގައި އެ މީހާއަށް ޖަވާބު ދެއްވައިފަ އެވެ. އެ ޓްވިޓާ ގުޅިގެން މީހަކު ވަނީ ސީއެސްސީއަށް މައްސަލަ ހުށަހަޅައިފަ އެވެ.

އެހެންވެ ސީއެސްސީން އެކަން ބެލީ ދައުލަތުގެ ސިއްރު ޑޮކިއުމެންޓެއް ހާމަކުރި ކަމަށް ބުނެ އެވެ.