ރާއްޖޭގައި ބާއްވާ ސިއްހީ ދާއިރާގެ ފުރަތަމަ ފެއާ އޭޑީކޭ އިން ސްޕޮންސަކޮށްފި

ރާއްޖޭން ލިބެން ހުރި ސިއްހީ ހިދުމަތްތައް ދައްކާލަން ބާއްވާ ފުރަތަމަ ފެއާގެ މައި ސްޕޮންސަރަކަށް އޭޑީކޭ ހޮސްޕިޓަލް މިއަދު ހަމަޖައްސައިފި އެވެ.

އޭޑީކޭ ހޮސްޕިޓަލުގައި އޮތް ރަސްމިއްޔާތެއްގައި އެ ހޮސްޕިޓަލުގެ ފަރާތުން މެނޭޖިން ޑިރެކްޓަރު އަހުމަދު އަފްއާލް އެއްބަސްވުމުގައި ސޮއިކުރެއްވިއިރު، ފެއާ ބާއްވާ އެމްވީ މެޑިކަލްސް ތަމްސީލު ކުރެއްވީ އެ ކުންފުނީގެ މާކެޓިން އެންޑް ޕީއާރު މެނޭޖަރު އަބްދުލް ޖަލީލް ހުސެން އެވެ.

މި ރަސްމިިއްޔާތުގައި އަފްއާލް ވިދާޅުވި ގޮތުގައި ވަރަށް ގިނަ އަދި އެންމެ މަތީ ފަންތީގެ ސިއްހީ ހިދުމަތްތައް ރާއްޖޭން ލިބެން އެބަހުއްޓެވެ. ރާއްޖޭން ބޭރަށް މިހާރު ދާން ޖެހެނީ ވަރަށް މަދު ފަރުވާއެއް ހޯދަންކަން ފާހަގަކުރައްވައި އޭނާ ވިދާޅުވީ ރާއްޖޭން ލިބޭ ހިދުމަތްތަކުގެ މައުލޫމާތު ދެވިފައި ނެތުމުގެ ސަބަބުން ބޭސްފަރުވާ ހޯދަން ކޮންމެ ފަހަރަކު ބޭރަށް ދާންޖެހޭ ހެން އާއްމުންނަށް ހީވެފައި އޮންނަ ކަމަށެވެ.

"މިއީ ރާއްޖޭގެ ސިއްހީ ނިޒާމް އެ ގޮތަށް ކުރިއަރާފައި އޮތުމާ އެކު އާއްމުންނާ ގާތުން މި ހިދުމަތްތަކާއި ހިދުމަތްތައް ހޯދަން އަމަލުކުރަންވީ ގޮތްތަކާއި ލިބެން ހުރި ހިދުމަތްތަކާ އަދި ކިހާ ފެންވަރެއްގައިތޯ މި ހިދުމަތްތައް ރާއްޖޭގައި ލިބެން ހުރީ ދެނެގަތުމަށާ އަދި އެ ކަމަށް ހޭލުންތެރިވުމަށް ވަރަށް ބޮޑު ފުރުސަތެއް ލިބިގެންދާނެ ކަމެއް ކަމުގައި އަޅުގަނޑުމެން ގަބޫލުކުރަން،" އަފްއާލް ވިދާޅުވި އެވެ.

ބޭހާއި ސިއްހީ އާލާތްތައް އެތެރެކުރާ އޭޑީކޭގެ ކުންފުނި ކަަމަށް ވާ އޭޑީކޭ ފާމަސޫޓިކަލްސް އިން ކޯ ސްޕޮންސަރުކަން ވެސް ނަގާފައިވާ "މޯލްޑިވްސް މެޑިކަލް އެންޑް ހެލްތު އެކްސްޕޯ" ބާއްވަން ނިންމާފައި ވަނީ އަންނަ ނޮވެމްބަރު 24 އިން 26 އަށް އާޓު ގެލެރީގަ އެވެ.

އަވަށްޓެރި ގައުމުތަކުން ސިއްހީ ހިދުމަތް ހޯދަން އެހީތެރިކަން ފޯރުކޮށްދޭ އަމިއްލަ ކުންފުންޏެއް ކަމަށްވާ އެމްވީ މެޑިކަލްސް އާއި މެޑްލައިފް އޭޝިއާ ގުޅިގެން ބާއްވާ ފެއާގައި ރާއްޖޭން ލިބެން ހުރި ސިއްހީ ހިދުމަތްތަކުގެ އިތުރަށް، ބޭރުގެ ބައެއް ގައުމުތަކުން ލިބޭ ފަރުވާތަކުގެ މައުލޫމާތު ވެސް ދޭނެ އެވެ. އެ ގޮތުން، މި ފެއާގެ 21 ސްޓޯލްގެ ތެރޭގައި އިންޑިއާ އާއި ލަންކާގެ ހޮސްޕިޓަލްތައް ހިމެނޭއިރު، މެލޭޝިއާ އަދި ސިންގަޕޫރުގެ ފަރާތްތައް ވެސް ބައިވެރިކުރަން އަންނަނީ މަސައްކަތް ކުރަމުންނެވެ.

އެމްވީ މެޑިކަލްސް އިން ކުރިން ބުނެފައިވާ ގޮތުގައި ރާއްޖޭގައި މެޑިކަލް ޓޫރިޒަމް ތަރައްގީކުރުމަކީ ވެސް މި ފެއާގެ ވަރަށް ބޮޑު ބޭނުމެކެވެ.