ޖޭޑަބްލިއު މެރިއެޓް ރިސޯޓު ހުޅުވައިފި

މެރިއެޓް އިންޓަނޭޝަލްގެ "ޖޭޑަބްލިއު މެރިއެޓް މޯލްޑިވްސް ރިސޯޓް އެންޑް ސްޕާ" މިދިޔަ ހަފުތާގައި ހުޅުވައިފި އެވެ.

ށ. ވަގަރުގައި ހުޅުވި މި ރިސޯޓުގައި 2،520 އަކަ ފޫޓުގެ 60 ވިލާ ހިމެނެ އެވެ. ބޮޑެތި އާއިލާތަކަށް އެކުގައި އުޅެވޭނެހެން ޑިޒައިންކޮށްފައިވާ މި ރިސޯޓުގެ ކޮންމެ ވިލާއެއްގައި ވެސް ޕްރައިވެޓް ޕޫލެއް އޮވެ އެވެ. އަދި ވަކިވަކި ކޮޓަރިތަކާއި ލައުންޖްތައް ވެސް ހުރެ އެވެ.

އެމެރިކާގެ ކުންފުންޏަކުން ހިންގާ މެރިއެޓް ރިސޯޓުގެ ހުރިހާ ވިލާއެއްވެސް ޑިޒައިން ކޮށްފައިވަނީ ރާއްޖޭގެ ސަގާފަތް ދައްކުވައިދޭ ގޮތަކަށެވެ. މަތިން ބަލާލުމުން ބައެއް ވިލާތައް ފެންނަނީ ދޯންޏެއްގެ ސިފައިގަ އެވެ. ބައެއް ވިލާތަކުން މާކަނައެއް ސިފަވެ އެވެ.

މި ރިސޯޓުގައި ވޯޓާ ޖިމެއްގެ އިތުރުން އޯޕަން އެއާ ޕެވީލިއަން އަކާއި މެރިއެޓްގެ ހާއްސަ ސްޕާއެއް ވެސް ހުރެ އެވެ. މި ސްޕާއިން ދުނިޔޭގެ އެންމެ ފެންވަރު ރަނގަޅު ޓްރީޓްމެންޓުތައް ލިބެން ހުންނާނެ ކަމަށް އެ ރިސޯޓުން ބުނެ އެވެ.