ބޮލީވުޑްގެ ޚަބަރުތައް ކުރުކޮށް

އަންނަ މަހު ރިލީޒްކުރާ ފިލްމު "ޕަތީ ޕަތުނީ އޯރް ވޯ" ގައި ހިމެނޭ ލަވަ "އަކިޔޯން ސޭ ގޯލޭ މާރޭ" ދައްކާލައިފި އެވެ.

މުދައްސަރު އަޒީޒް ޑައިރެކްޓްކޮށްފައިވާ ފިލްމުގެ މި ލަވައިން ފެނިގެން ދަނީ ލީޑް ތަރިން ކަމަށްވާ ކާތިކް އާރިޔަން އާއި އަނަންޔާ ޕާންޑޭގެ އިތުރުން ބޫމީ ޕްޑެނޭކަރެވެ. "އަކިޔޯން ސޭ ގޯލޭ މާރޭ" އަކީ 1998 ގައި ރިލީޒްކުރި ގޯވިންދާ އާއި ރަވީނާ ޓަންޑަންގެ ކޮމެޑީ ފިލްމު "ދުލްހޭ ރާޖާ" އިން މަޝްހޫރުވި ލަވައެކެވެ.

އެ ލަވައިގެ އާ ވާޝަނެއް "ޕަތީ ޕަތުނީ އޯރް ވޯ" ގައި ހިމެނި އިރު، އެ ލަވަކިޔާފައި ވަނީ މިކާ ސިންގް އާއި ތުލްސީ ކުމާރެވެ. ތަނިޝްގް ބަގްޗީ ލަވައިގެ މިއުޒިކާ ކުޅެފައިވާ އިރު ޅެން އަތުރާފައި ވަނީ ޝައްބީރު އަހުމަދެވެ. ކުރީގެ ލަވަ ސޯނޫ ނިގާމާއި ޖަސްޕިންދަރު ނަރޫލާ ކިޔާފައިވާ އިރު، ލަވައިގެ މިއުޒިކް ހެދީ އާނަންދު-މިލިންދު އެވެ. ޅެން ހެދީ ސަމީރެވެ.

އަންނަ މަހުގެ 6 ގައި ރިލީޒްކުރާ "ޕަތީ ޕަތުނީ އޯރް ވޯ" އަކީ 1987 ގައި ހަމަ އެ ނަމުގައި ގެނެސްދިން ފިލްމުގެ ރިމެކެކެވެ.

"އާރްއާރްއާރް" ގެ ކާސްޓަށް އާ ބައެއް

އެސްއެސް ރާޖަމޯލީގެ އާ ފިލްމު "އާރްއާރްއާރް" ގެ ކާސްޓަށް އިންޑިއާ އިން ބޭރުގެ ތަރިންތަކެއް ހަމަޖައްސައި، އެ މީހުންގެ ކެރެކްޓާތަކުގެ ނަންތައް ވެސް އިއުލާންކޮށްފި އެވެ.

އެގޮތުން ފިލްމުގެ ލީޑް އެއް ބަތަލާއަކަށް ހަމަޖައްސާފައި ވަނީ އޮލީވިއާ މޮރިސް އެވެ. އޭނާ ފެނިގެންދާނީ އެންޓީއާރް ޖޫނިއާގެ ކުޅޭ ކެރެކްޓާގެ ލޯބިވެރިޔާ ޖެނިފާގެ ރޯލުންނެވެ. "އާރްއާރްއާރް" ގެ އަނެއް ބަތަލު ރާމް ޗަރަންގެ ލޯބިވެރިޔާގެ ގޮތުގައި ފެންނާނީ އާލިއާ ބަޓެވެ.

މި ފިލްމުގެ ކާސްޓަށް ނެގި ބޭރުގެ ތަރިންގެ ތެރޭގައި ދެން ހިމެނެމީ ފިލްމުގެ ނުބައިބައި ރޯލް ސްކޮޓްގެ ރޯލް ކުޅޭ ރޭ ސްޓީވެންސަން އާއި އޭނާގެ އަންހެނުން ލޭޑީ ސްކޮޓްގެ ރޯލް ކުޅޭ އެލިޒަން ޑޫޑީ އެވެ.

އަންނަ އަހަރުގެ ޖުލައި 30 ގައި ރިލީޒްކުރަން ތާވަލުކޮށްފައިވާ "އާރްއާރްއާރް" ގެ ކާސްޓުންގެ ތެރޭގައި އަޖޭ ދޭވްގަން ވެސް ހިމެނެ އެވެ. މި ފިލްމަކީ "ބާހްބަލީ" ގެ ދެ ފިލްމަށް ފަހު ރާޖަމޯލީ ގެނެސްދޭ ފުރަތަމަ ފިލްމެވެ.

"އާރްއާރްއާރް" ގައި ކިޔައިދޭނީ 1920 ހިނގާ ހިޔާލީ ހަނގުރާމައެއްގެ ވާހަކަ އެވެ.

"މާސްޓަ ޝެފް އިންޑިއާ 6" އަންނަ މަހު 7 ގައި

ސްޓާ ޕްލަސް އިން ގެނެސްދޭން ތައްޔާރުވަމުން އަންނަ ކައްކާ ޝޯ "މާސްޓަ ޝެފް އިންޑިއާ" ގެ ހަ ވަނަ ސީޒަން އަންނަ މަހުގެ 7 ގައި ދައްކަން ފަށާ ގޮތަށް ނިންމައިފި އެވެ.

މި ފަހަރު ޝޯގެ ޖަޖުންގެ ގޮތުގައި ފެނިގެންދާނީ ސެލެބްރިޓީ ޝެފުން ކަމަށްވާ ވިކާސް ކަންނާ އާއި ރަންވީރު ބްރާރްގެ އިތުރުން ވިނީތު ބާޓިއާ އެވެ. "މާސްޓަ ޝެފް އިންޑިއާ" ކާމިޔާބުކުރާ މީހަކަށް 10،000،000 ރުޕީސް (140,065 ޑޮލަރު) އާ އެކު ކައްކާ ފޮތެއް ނެރުމުގެ ފުރުސަތާއި އަމިއްލަ ކައްކާ ޝޯއެއް ތައްޔާރުކުރުމުގެ ފުރުސަތު ވެސް ލިބެ އެވެ.

މި ޝޯ އިންޑިއާގައި 2010 ގައި ދައްކަން ފެށި އިރު، ފަސް ވަނަ ސީޒަން ގެނެސްދިނީ 2016 ގަ އެވެ. އެ ފަހަރު ޝޯ ކާމިޔާބުކުރީ ކިރުތީ ބުޓީކާ އެވެ.

ރިޝީ އާއި ނީޓޫ އަލުން ފިލްމަކަށް

ކެރިއަރުގެ ކުރީކޮޅުގައި އެކީގައި ފިލްމުތަކެއް ކުޅެފައިވާ ބޮލީވުޑްގެ ދެމަފިރިން ކަމަށްވާ ރިޝީ ކަޕޫރާއި ނީޓޫ ސިންގް އަލުން އެކީގައި ފިލްމެއް ކުޅެން ސޮއިކޮށްފި އެވެ.

މި ދެ ތަރިން އެންމެ ފަހުން އެކީގައި ފެނިފައި ވަނީ ދަރިފުޅު ރަންބީރު ކަޕޫރް 2013 ގައި ކުޅުނު "ބޭޝަރަމް" އިންނެވެ. ރިޝީ އާއި ނީޓޫ އެންމެ ފުރަތަމަ އެކީގައި ކުޅުނު ފިލްމަކީ ކައިވެނިކުރުމުގެ ކުރިން 1974 ގައި ކުޅުނު "ޒެހްރީލާ އިންސާން" އެވެ.

ދެމަފިރިން އަލަށް ސޮއިކުރި ފިލްމަކީ 2015 ގައި ރިލީޒްކުރި ބެންގާލީ ފިލްމު "ބޭލާ ސެޝޭ" އެވެ. ޝިބޯޕްރަސާދު މުކަރްޖީ އާއި ނަންދިތާ ރޯއި ޑައިރެކްޓްކުރި އެ ފިލްމުގައި ކިޔައި ދެނީ 50 އަހަރުވީ ކައިވެންޏަށް ހަތަރު ދަރިން ލިބިފައި ވަނިކޮށް ވަކިވާ ދެމަފިރިއެއްގެ ވާހަކަ އެވެ.

"ބޭލާ ސެޝޭ" ގެ ހިންދީ ރިމެކް ޕްރޮޑިއުސްކުރަނީ ރިލަޔަންސް އެންޓަޓައިންމަންޓުންނެވެ. ނަމަވެސް ފިލްމުގެ ޑައިރެކްޓަރަކީ ކާކު ކަމެއް އަދި ނޭނގެ އެވެ.