ބަރުދަން ލުއިކުރަން ފިނިފެންމާ ސައި

ބަރުދަން ލުއިކުރަން ތަފާތު އެކި ކަހަލަ ކަންކަން ކުރުމަކީ ވަރަށް އާންމު ކަމެކެވެ. މިއާ އެކު، ޑައިޓަށް ގެންނަ އެކި ބަދަލުތަކަކީ ވެސް ބަރުދަން ލުއިކޮށް، ހިކެން ބޭނުންވާ މީހުން އާންމުކޮށް ކުރާ ކަމެކެވެ. އެގޮތުން އެކި ބާވަތުގެ ސައި، މިސާލަކަށް ގްރީން ޓީ އާއި ރީނދޫ ސައި ކަހަލަ ބާވަތްތަކަކީ ވެސް ބަރުދަން ލުއިކުރަން ބައެއް މީހުން އާންމުކޮށް ބޭނުންކުރާ އެއްޗިއްސެވެ.

މި ލިސްޓަށް ރޯޒް ޕެޓަލް ޓީ ނުވަތަ ފިނިފެންމާ ސައި ކިހިނެއް ވާނެ ހެއްޔެވެ؟ ސިއްހީ ތަޖުރިބާކާރުން ބުނާގޮތުގައި ފިނިފެންމަލުގެ ފިޔަ އަކީ ސިއްހީ އެތައް ފައިދާތަކެއް އެކުލެވިގެންވާ އެއްޗެކެވެ. އެއީ ތެދެއްކަން ގަބޫލުކުރަން ޖެހޭ އެއް ސަބަބަކީ ރީތިވާން ބޭނުންކުރާ ވަރަށް ގިނަ އުފެއްދުންތަކަށް ވެސް ފިނިފެންމާ ބޭނުން ކުރާތީ އެވެ.

އެހެންވެ، ފިނިފެންމާ ސަޔަކީ ވެސް ސިއްހަތަށް ވަރަށް ފައިދާ ހުރި އެއްޗެކެވެ. ހާއްސަކޮށް ހިކެން ބޭނުންވާ މީހުންނަށް މިއީ ރަނގަޅު ހޮވުމަކަށް ވެދާނެ އެވެ. ފިނިފެންމާ ސައި ބާޒާރުން ހޯދާކަށް ވެސް މިހާރު މާ އުނދަގޫ ކަމަކަށް ނުވާނެ އެވެ. ފިނިފެންމާ ގަސްތައް ގެންގުޅޭ ނަމަ އަމިއްލަ އަށް ވެސް ފިނިފެންމަލުން ސައި ތައްޔާރު ކޮށްލެވިދާނެ އެވެ.

އޭގެ ކުރިން މިއިން ލިބިދޭ ބައެއް ސިއްހީ ފައިދާތަކަށް ބަލައިލަމާ ހިނގާށެވެ.

ދިރާސާތައް ދައްކާ ގޮތުގައި ފިނިފެންމަލުގެ ފިޔަ އަކީ އިންފްލަމޭޝަނާ ދެކޮޅަށް މަސައްކަތް ކުރާ ގިނަ މާއްދާތަކެއް އެކުލެވިގެންވާ އެއްޗެކެވެ. އަދި އިންފްލެމޭޝަނާއި ބަރުދަން އިތުރުވާ ވެސް ގުޅިފައިވާ ކަމަށް ދައްކާތީ ބަރުދަން ލުއިކުރަން ފިނިފެންމާ ސަޔަކީ ރަނގަޅު ހޮވުމަކަށް ވާނެ އެވެ.

މިއާ އެކު، ފިނިފެންމާ ސައި ކޮންމެ ދުވަހަކު ބޭނުން ކުރުމަކީ ބަނޑުހައިވުން ވެސް ކުޑަކޮކޮށްދޭނެ އެއްޗެކެވެ. އޭގެ ނަތީޖާ އަކީ ސިއްހަތަށް ރަނގަޅު ނޫން ފާޑުފާޑުގެ ކެއުންތަކާއި ބުއިންތަކާ ދުރުކޮށްދީ، ބަރުދަން ލުއިކޮށްދޭން އެހީވުމެވެ.

ފިނިފެންމާ ސަޔަކީ ހަޖަމު ކުރުމުގެ ނިޒާމަށް ދިމާވާ އެކި ކަހަލަ މައްސަލަތަކުން ވެސް ރައްކާތެރިކޮށްދޭން އެހީ އެކެވެ. އަދި މިއީ ބަނޑު ހަރުވުމާއި ބޭރަށް ހިންގުން ފަދަ ކަންކަމަށް ވެސް ރަނގަޅު ބުއިމެކެވެ. ފިނިފެންމާ ސަޔަކީ ދިފާއީ ނިޒާމު ވެސް ވަރުގަދަ ކޮށްދޭ އެއްޗަކަށް ވާއިރު، ހަށިގަނޑުގައި އުފެދޭ އެކި ކަހަލަ އިންފެކްޝަންތަކުން ރައްކާތެރިވާން ވެސް މި ސައި މުހިއްމު ދައުރެއް އަދާކޮށްދޭނެ އެވެ.

ފިނިފެންމާ ސައި ދެ ގޮތަކަށް ތައްޔާރު ކޮށްލެވިދާނެ އެވެ. އެއީ ހިއްކައިގެންނާއި ތާޒާކޮށެވެ. ދެ ގޮތެއް ބޭނުން ކުރިޔަސް، ސައި ތައްޔާރު ކުރާނީ ހަމަ އެއްގޮތަކަށެވެ.

މިސާލަކަށް ތާޒާ ފިނިފެންމަލުން ސައި ތައްޔާރުކުރާ ނަމަ އެއްވެސް ބާވަތެއްގެ ޕެސްޓިސައިޓެއް ނެތް ފިނިފެންމާ ހޯދާފައި ރީތިކޮށް ދޮވެލައި ފިޔަތައް ވަކިކޮށްލާށެވެ. މަދުވެގެން ދެ ޖޯޑުގެ ފިޔަ ރަނގަޅު ވާނެ އެވެ. ދެން ފެނުގައި ފަސް ވަރަކަށް މިނިޓަށް ކައްކާށެވެ. އެ އަށް ފަހު ފުރާނާލައިގެން ބޯލާނީ އެވެ. ރަހަ އިތުރަށް ރަނގަޅުކޮށްލަން ބޭނުން ނަމަ މާމުއި ވެސް އެޅިދާނެ އެވެ.