ނަސްރުﷲ ކަނޑަށް ވެއްޓުނީ ލޯންޗުން ޖެހުމުން ކަމަށް ބެލެވޭ: ކައުންސިލް

ކަނޑުމަތީގައި މިދިޔަ ބުރާސްފަތިދުވަހުގެ ރޭ ހިނގި އެކްސިޑެންޓުގައި ނަސްރުﷲ އަބްދުﷲ، 41، ކަނޑަށް ވެއްޓުނީ ލޯންޗުން އޭނާގެ ގައިގައި ޖެހުމުން ކަމަށް ބެލެވޭ ކަމަށް ބ. ދަރަވަންދޫ ކައުންސިލުން މިއަދު ބުނެފި އެވެ.

ބ. ދޮންފަނު ކައިރީގައި، އެ އެކްސިޑެންޓު ހިނގީ ދަރަވަންދޫން މަހަށް ނުކުތް ކުޑަ ޑިންގީ އާއި އެ އަތޮޅު އޭދަފުށިން ދަރަވަންދު އަށް ދަތުރުކުރި ލޯންޗެއް ޖެހިގެންނެވެ. ގެއްލިގެން ހޯދަމުން އަންނަ އޭދަފުށީ މުސްތަރީގޭ ނަސްރުﷲ އިނީ ޑިންގީގަ އެވެ.

ޑިންގީގައި ދެން ތިބީ އޭނާގެ އަންހެނުންގެ ދެ ބޭބެ ކަމަށްވާ އަބްދުއް ސަމީއު އާއި ދަރަވަންދޫ ކައުންސިލްގެ ޒިންމާދާރުވެރިޔާ މުހައްމަދު ނަޒީފެވެ. ލޯންޗްގައި ތިބީ ކެޕްޓަނާއި ކުރޫ އެކެވެ. އެކްސިޑެންޓްގައި އެ އެންމެނަށް ވެސް އެކިވަރުގެ ގެއްލުންތައް ލިބުނެވެ. އެންމެ ސީރިއަސް އަނިޔާއެއް ވި ލޯންޗުގެ ކެޕްޓަން މާލެ ގެނެސް އައިޖީއެމްއެޗުގައި އަންނަނީ ފަރުވާދެމުންނެވެ.

ޑިންގީގައި ތިބި މީހުންނާ ހަވާލާދީ ދަރަވަންދޫ ކައުންސިލްގެ ނައިބު ރައީސް އަލީ ޝަފީގު މިއަދު ވިދާޅުވީ ލޯންޗެއް އަންނަ ކަން އެ މީހުންނަށް އެނގުނީ 50 ފޫޓަށް ކައިރިވެފައި ވަނިކޮށް ކަމަށެވެ.

"ފަންސާސް ފޫޓަކީ އެހާ ބާރަށް ދުއްވާފައި ދާއިރު ވަރަށް ކައިރި. ފެނުނީ އެހާ ކައިރި ވެފައި ވަނިކޮށް ކަމަށް ވަނީ. ޑިންގީ ދުއްވަން އިން ސާމީ މަސައްކަތް ކުރި ކަމަށް ވަނީ އަނބުރާލަން ވެސް. އެކަމަކު އެހާ ކައިރި ވީމަ އެކަން ނުކުރެވުނީ ކަމަށް ބުނަނީ،" އަލީ ވިދާޅުވި އެވެ.

އަލީ ވިދާޅުވި ގޮތުގައި ލޯންޗުން ޖެހުނީ ޑިންގީގެ ފަހަތުގަ އެވެ. އޭރު ނަސްރުﷲ އިނީ ޑިންގީގެ ފަހަތުގައި ކަމަށް އޭގައި ތިބި މީހުންނާ ހަވާލާދީ އަލީ ވިދާޅުވި އެވެ.

"އެ މީހުންގެ ވާހަކައިން ހީވަނީ ލޯންޗު ނަސްރު ގައިގައި ޖެހުނީއޭ. ޖެހި ކަމެއް ވިއްޔޭ. އެކަމަކު އަޅުގަނޑުމެން ވެސް އުއްމީދުކުރަނީ ނަސްރު ހެޔޮ ހާލުގައި ހުއްޓާ ފެންނާނެ ކަމަށް،" އަލީ ވިދާޅުވި އެވެ.

އޭނާ ވިދާޅުވި ގޮތުގައި އެކްސިޑެންޓުގައި ނަސްރުﷲ ކަނޑަށް ވެއްޓުނު ފަހުން އެންމެ ފަހަރަކު ވެސް ނުފެންނަ ކަމަށް ޑިންގީގައި ތިބި މީހުން ބުނެ އެވެ.

ވައިގެ މަގުންނާއި ރޮބެޓް ބޭނުންކޮށްގެން ސިފައިން އަންނަނީ ނަސްރުﷲ ހޯދަމުންނެވެ. އެކަމަކު މިހާތަނަށް އޭނާގެ އެއްވެސް ޚަބަރެއް ނުވެ އެވެ.

އެކްސިޑެންޓު ހިނގިތާ ގިނަ އިރުތަކެއް ނުވެ ޑިންގީ ވަނީ ދެ ފަޅިވެ އަޑިއަށް ގޮސްފަ އެވެ.

އެކްސިޑެންޓް ހިނގުމާ އެކު ލޯންޗްގެ ކެޕްޓަން އެ ކުންފުނީގެ އެހެން ލޯންޗަކަށް ގުޅި ކަމަށާއި މީހުން ސަލާމަތް ކުރީ އޭރު ދަރަވަންދޫގައި އޮތް އެ ލޯންޗުން ކަމަށް ވެސް އަލީ ވިދާޅުވި އެވެ.

އޭނާ ވިދާޅުވި ގޮތުގައި ހާދިސާ ހިނގިއިރު ލޯންޗާއި ޑިންގީގައި ވެސް ނެވިގޭޝަން ލައިޓް ދިއްލާފައިވެ އެވެ. ނަމަވެސް އެ ސަރަހައްދަކީ ގިނަ ރިސޯޓްތަކެއް އޮންނަ ސަރަހައްދަކަށް ވުމުން އަލި ފާހަގަ ކުރަން ދަތިތަކަކާ ކުރިމަތިވާ ކަމަށް ވިދާޅުވި އެވެ.