އެކްސިޑެންޓްވީ ޑިންގީގައި ލައިޓެއް ނެތުމުން؟

ބ. އަތޮޅުގައި ޑިންގީއަކާއި ލޯންޗެއް ޖެހި ނުރައްކާތެރި އެކްސިޑެންޓް ހިނގީ ޑިންގީގައި އެއްވެސް އަލިކަމެއް ނެތުމުން ކަމަށް، އެހީތެރިކަން ފޯރުކޮށްދޭން ދިޔަ ފުރަތަމަ ލޯންޗުގެ ކައްޕި މިއަދު ބުނެފި އެވެ.

ބ. ދޮންފަނު ކައިރީގައި އޮންނަ އަނގަފަރުގެ އިރުމަތީ ފަރާތުގައި މިދިޔަ ބުރާސްފަތިދުވަހުގެ ރޭ އިރާކޮޅު ހިނގި އެކްސިޑެންޓުގައި ޑިންގީގެ ފަހަތުގައި އިން އޭދަފުށީ މުސްތަރީގޭ ނަސްރުﷲ އަބްދުﷲ، 41، ވަނީ ގެއްލިފަ އެވެ. އޭނާ ހޯދަން އެމްއެންޑީއެފުން އެ ރެއިން ފެށިގެން ކުރިއަށް ގެންދާ ހާއްސަ އޮޕަރޭޝަންގައި އަދި އެއްވެސް ނިޝާނެއް ނުފެނެ އެވެ. ޑިންގީ ވީ ތަނެއް ވެސް ނޭނގެ އެވެ.

ދަރަވަންދޫން މަހަށް ނުކުތް ޑިންގީގައި، ޖެހުނީ ބ. ކަމަދޫން އޭދަފުއްޓަށް ދަތުރުކުރި އޭދަފުށީ ސޭލަމް ލޯންޗެވެ. އެކްސިޑެންޓްގައި ޑިންގީ ދެ ފަޅިވި އެވެ.

އެކްސިޑެންޓް ހިނގި ޚަބަރު ލިބުނުތާ ފަސް ވަރަކަށް މިނެޓު ތެރޭގައި އެ ސަރަހައްދަށް ދިޔައީ، ލޯންޗު ނިސްބަތްވާ ކުންފުނީގެ އެހެން ލޯންޗެކެވެ. އެ ލޯންޗްގެ ކެޕްޓަން އަހުމަދު ޒަހީން "މިހާރު" އަށް ބުނީ އެކްސިޑެންޓްވި ޑިންގީގައި ނެވިގޭޝަން އެއްވެސް ލައިޓެއް ނެތް ކަމަށް ޑިންގީ ދުއްވަން އިން މީހާ އެ ވަގުތު އެއްބަސްވި ކަމަށެވެ.

"ޑިންގީ ދުއްވާފައި ދަނިކޮށް އެކްސިޑެންޓް ވީ. އޭގައި ނެތް އެއްވެސް ނެވިގޭޝަނެއް. އަޅުގަނޑު ސުވާލު ކުރިން ޑިންގީ ދުއްވަން އިން މީހާއާ. އޭނާ ބުނީ ނެވިގޭޝަނެއް [ލައިޓެއް] ނީންނާނެއޭ،" ޒަހީން ބުންޏެވެ.

އޭނާ ބުނިގޮތުގައި އެކްސިޑެންޓް ހިނގި ތަނަށް އޭނާ ދިޔަ އިރު ޑިންގީގައި ތިބީ ދެ މީހުންނެވެ. އިތުރު މީހަކު ގެއްލިގެން އުޅޭ ކަމަށް އެ މީހުން ބުނީ ލޯންޗަށް ނެގި ފަހުން ކަމަށާއި އޭގެ އިރުކޮޅެއްގެ ތެރޭގައި ޑިންގީ އަޑިއަށް ދިޔައީ ކަމަށް ވެސް އޭނާ ބުންޏެވެ.

"އެ މީހުން އޭރު ތިބީ ސިކުނޑި ގޯސް ވެފައި. ލޯންޗަށް ނެގި ފަހުން ބުނީ ވެސް މީހަކު ގެއްލިގެންނޭ. ދެން އަޅުގަނޑު ޕޮލިހަށް ވެސް ގުޅީ،" ޒަހީން ކިޔައިދިނެވެ.

"ވަރަށް ބާރަށް ނަސްރުއަށް ގޮވައި ވެސް ހެދިން. އެގޮތަށް 35 ވަރަކަށް މިނެޓު މަސައްކަތް ކުރިން ފެނޭތޯ ވެސް."

ނަސްރުﷲއާ އެކު އެ ޑިންގީގައި މަހަށް ނުކުތީ އޭނާގެ އަންހެނުންގެ ދެ ބޭބެ ކަމަށްވާ އަބްދުއް ސަމީއު އާއި މުހައްމަދު ނަޒީފެވެ. މީގެ ތެރެއިން ނަޒީފަކީ ދަރަވަންދޫ ކައުންސިލްގެ ޒިންމާދާރު ވެރިޔާ އެވެ.

އެމްއެންޑީއެފުން ހާމަކުރި ޑިންގީގެ ފޮޓޯ އިން ވެސް ނެވިގޭޝަން އެއްވެސް ލައިޓެއް ހަރުކޮށްފައި ހުރި ތަނެއް ނުފެނެ އެވެ. އޭގައި ރަޖިސްޓަރީ ނަންބަރެއް ވެސް ނެތެވެ. އެކަމަކު އެއީ ކޮން އިރަަކު ނަގާފައިވާ ފޮޓޯއެއްކަން ނޭނގޭތީ، އެއީ ރަޖިސްޓްރީނުކޮށް ދުއްވާ އުޅަނދެއްކަން ނުވަތަ ނޫންކަން ކަށަވަރެއް ނުވެ އެވެ.

އެކަމަކު ޑިންގީ ދުއްވަން އިން މީހާއާ ހަވާލާދީ ދަރަވަންދޫ ކައުންސިލުން އިއްޔެ ބުނީ ޑިންގީގައި ލައިޓެއް ހަރުކޮށްފައި ހުރި ކަމަށެވެ. އަދި ޑިންގީގައި ތިބި މީހުންނަށް ލޯންޗް ފެނުނީ 50 ވަރަކަށް ފޫޓް ކައިރިން ކަމަށާއި އެ ވަގުތު ޑިންގީ އަނބުރާލަން މަސައްކަތް ކުރި ކަމަށް ވެސް އެ މީހުންނާ ހަވާލާދީ ކައުންސިލުން ބުނެފައިވެ އެވެ.

ސަމީއު އާއި ނަޒީފަށް ލިބުނު އަނިޔާތަކަށް ދަރަވަންދޫ ސިއްހީ މަރުކަޒުގައި ފަރުވާ ދިނުމަށް ފަހު މިހާރު ވަނީ ދޫކޮށްލައިފަަ އެވެ.

އެކްސިޑެންޓްގައި ލޯންޗުގެ ކަައްޕި މުހައްމަދު މުސްތަފާގެ ވާތު ލޮލުގެ ތިރިން ކަށިތަކެއް ބިނދިގެން، އައިޖީއެމްއެޗުގައި އަންނަނީ ފަރުވާދެމުންނެވެ. އަދި އޭނާއާ އެކު ދަތުރުކުރި ބަންގްލަދޭޝްގެ ފަޅުވެރިޔާގެ ވާތު ކަންފަތުން ބައެއް ވަކިވި އެވެ. އެތަން ފެހުމަށް ފަހު، ފަރުވާދޭން ބާއްވާފައި އޮތީ އޭދަފުށީ ހޮސްޕިޓަލްގަ އެވެ.

ޒަހީން ބުނީ ޑިންގީގައި ތިބި މީހުން އޭނާގެ ލޯންޗަށް ނެގުމަށް ފަހު، އެކްސިޑެންޓްވި ލޯންޗް ދަރަވަންދުއަށް ފޮނުވާލީ ކަމަށެވެ. އެގޮތަށް ކަންތައްކުރީ ލޯންޗް ދިޔަވަނީ ކަމަށް ބެލެވޭތީ ކަމަށް ވެސް އޭނާ ބުންޏެވެ.