އަލިފާން ރޯވި ޔޮޓް އަޑިއަށް ހިނގައްޖެ

ކ. ތުލުސްދޫ ކައިރީގައި އޮންނަ ކުޑަވިލިނގިލީގެ ފަޅުތެރޭގައި އޮއްވައި ރޭ ފަތިހު އަލިފާން ރޯވި އޮސްޓްރޭލިއާގެ ޔޮޓް އަޑިއަށް ހިނގައްޖެ އެވެ.

އެމްއެންޑީއެފުން ބުނީ މިއަދު ހެނދުނު 9:30 ހާއިރު އެ ޔޮޓް އަޑިއަށް ދިޔައީ އަލިފާންގަނޑު ނިއްވުމުގެ މަސައްކަތް ސިފައިން ކުރަމުން ދަނިކޮށް ކަމަށެވެ. ސިފައިން ވަނީ އަލިފާންގަނޑު ނިއްވަން ފޯމު ވެސް ބޭނުންކޮށްފަ އެވެ.

"ވެރިޓާ" ނަމަކަށް ކިޔާ މި ޔޮޓުގައި ރޭ ފަތިހު 5:30 ވާން އުޅެނިކޮށް ރޯވިއިރު އޭގައި ތިބީ އޮސްޓްރޭލިއާގެ ތިން ފިރިހެނަކު ކަމަށް އެމްއެންޑީއެފުން ބުނެ އެވެ. ނަމަވެސް، އަލިފާން ރޯވުމާ އެކު، ކައިރީގައި އޮތް ސަފާރީ އަކަށް އެ ތިން މީހުން ބަދަލުކުރި ކަމަށް އެމްއެންޑީއެފުން ބުންޏެވެ. ފަހުން އެ މީހުން ވަނީ ތުލުސްދޫ ސިއްހީ މަރުކަޒަށް ގެންގޮސްފަ އެވެ.

"ތިން މީހުންނަށް މާ ސީރިއަސް އަނިޔާއެއް ލިބިފައިވާ ކަމުގެ މައުލޫމާތެއް ނުލިބޭ،" އެމްއެންޑީއެފްގެ ތަރުޖަމާން އިބްރާހިމް އާޒިމް ވިދާޅުވި އެވެ.

އަލިފާން ރޯވީ ސަފާރީއެއްގައި އެމްއެންޑީއެފުން ކުރިން ބުންޏަސް ފަހުން ލިބުނު މައުލޫމާތުގެ އަލީގައި އެނގުނު ގޮތުގައި އެއީ ޔޮޓެއް ކަމަށް އާޒިމް ވިދާޅުވި އެވެ.