ދ. ޖުޑީޝަލް ދާއިރާގެ އިސް މެޖިސްޓްރޭޓް ސަސްޕެންޑްކޮށްފި

ދ. ޖުޑީޝަލް ދާއިރާގެ އިސް މެޖިސްޓްރޭޓް އަބްދުއްރައްޒާގު މުހައްމަދުގެ ސުލޫކީ މައްސަލައެއް ބަލަން ނިންމައި، އޭނާ ސަސްޕެންޑްކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީން މިއަދު ނެރުނު ބަޔާނެއްގައިވަނީ ދ. ކުޑަހުވަދޫ ކޯޓުން ބަލަމުންދާ މައްސަލައެއްގައި އިސް މެޖިސްޓްރޭޓް އަބްދުއްރައްޒާގް ހުށަހެޅުއްވި އެއްބަސްވުމެއްގައިވާ ސޮޔަކީ ފޯޖް ކޮށްފައިވާ ސޮޔެއް ކަމަށް ތުހުމަތު ކުރެވޭ މައްސަލަ ބަލަމުންދާ ކަމަށް ފުލުހުން އެ ކޮމިޝަނަށް އަންގާފައިވާ ކަމަށެވެ.

އެހެންވެ، އެ މައްސަލާގައި އަބްދުއްރައްޒާގްގެ ސުލޫކީ މައްސަލައެއް ބަލަން ނިންމައި، މިއަދުން ފެށިގެން އޭނާ ފަނޑިޔާރު ކަމުން ސަސްޕެންޑް ކުރަން އެ ކޮމިޝަންގެ މިއަދުގެ ޖަލްސާއިން ނިންމާފައިވާ ކަމަށް އެ ބަޔާނުގައިވެ އެވެ.

އެހެން ބައެއް މެޖިސްޓްރޭޓުންނާއި ފަނޑިޔާރުންތަކެއްގެ މައްސަލަތައް ވެސް ޖޭއެސްސީން އަންނަނީ ބަލަމުންނެވެ. އޭގެ ތެރެއިން ބައެއް ފަނޑިޔާރުން ސަސްޕެންޑް ކޮށްފައިވާއިރު، ބައެއް ފަނޑިޔާރުން މީގެކުރިން ވަނީ ރައްޔިތުންގެ މަޖިލީހަށް ހުށަހަޅައިގެން މަގާމުން ވެސް ވަކިކޮށްފަ އެވެ.