ސަބްސިޑީ ކަނޑާލީ ސަރުކާރު ހިންގަން ނޭނގިގެން: އެމްޑީޕީ

ޒަމާނުއްސުރެ ރާއްޖޭގައި ދެމުން އައި ކާޑު ސަބްސިޑީ ކަނޑާލަން ޖެހުނީ ސަރުކާރެއް ހިންގަން ނޭނގިގެން ކަމަށް އެމްޑީޕީން މިއަދު ބުނެފި އެވެ.

ސަރުކާރުން ދެމުން އައި ކާޑުގެ ސަބްސިޑީ ހަމައެކަނި ފަގީރުންނަށް ދޭ ގޮތަށް ނިންމި މައްސަލަ، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ރައްޔިތުންގެ މަޖިލިހުގެ ކޮމިޓީން ބަލައިދިނުމަށް އެދި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމާއި މާފަންނު ހުުޅަނގު ދާއިރާގެ މެމްބަރު މުހައްމަދު ފަލާހާއި މަރަދޫ ދާއިރާގެ މެމްބަރު އިބްރާހިމްް ޝަރީފް (މަވޯޓާ ޝަރީފް) ވަނީ މަޖިލިހަށް މިއަދު ސިޓީއެއް ފޮނުއްވައިފަ އެވެ.

އެމްޑީޕީގެ އޮފީހުގައި ބޭއްވި ނޫސްވެެރިންގެ ބައްދަލުވުުމުގައި އެ ޕާޓީން ވަނީ، ސަބްސިޑީ ދޭ އުސޫލަށް ބަދަލު ގެނައި މައްސަލަ ކުށްވެރިކޮށް ކުރިއެކޭ އެއްގޮތަށް ސަބްސިޑީ ދިނުން ރުޖޫއަ ކޮށްދިނުމަށް ގޮވާލައިފަ އެވެ.

މަރަދޫ ދާއިރާގެ މެމްބަރު ޝަރީފު ވިދާޅުވީ ސަބްސިޑީ ދިނުން ފަދަ ކަމެއް ކުއްލިއަކަށް ހުއްޓާލުމުން އެކަމުގެ ގެއްލުން ރައްޔިތުންނަށް ވަރަށް ބޮޑަށް ކުރާނެ ކަަމަށާއި އޭގެ ސަބަބުން ރައްޔިތުންނަށް ނުއުފުއްލެވޭ ބޮޑު ތަކުލީފެއް ކުރިމަތވެދާނެ ކަމަށެވެ.

އޭނާ ވިދާޅުވި ގޮތުގައި ބަނދަރު ހެދުމާއި ތަރައްގީގެ މަޝްރޫއުތަކަށް ވުރެ ރައްޔިތުން ބަނޑުފުރާނެ މުއްތިކޮށްގެން، އުފާވެރި ދިރިއުޅުމެއް ލިބުން މާ މުހިއްމެވެ. އަދި އެކަންތައްތަކަށް ހައްލު ހޯދުމަށް ގިނައިން އާމްދަނީ ލިބޭ މީހުންގެ އަތުން އިންކަމް ޓެކްސް ނެގުން މާ މުހިއްމު ކަމަށް ވެސް ޝަރީފު ވިދާޅުވި އެވެ.

"ރައްޔިތުންނާ ގުޅުންހުރި މައްސަލަތަކުގައި ކަންތައްތައް ނިންމާއިރު ރައްޔިތުންގެ ހިޔާލު ހޯދަންޖެހޭނެ،" ޝަރީފް ވިދާޅުވި އެވެ.

ފަލާހު ވެސް ވިދާޅުވީ ސަބްސިޑީ ކަނޑާލައި އެކަމަށް އެދުމަށް ފޯމެއް ހުށަހަޅަންޖެހުމަކީ ސަލާން ޖެހުމުގެ ސަގާފަތެއް ގެންގުޅޭކަން ހާމަވާ ކަމެއް ކަމަށެވެ.

ސަރުކާރުގެ އެކި މުއައްސަސާތަކުން ހިންގާފައިވާ ކޮރަޕްޝަންގެ އަމަލުތަކުގެ ސަބަބުން ދައުލަތުގެ ބަޖެޓަށާއި ރައްޔިތުންނަށް އަސަރުކުރާނެ ކަމަށް ފަލާހު ވިދާޅުވި އެވެ.

"ރައްޔިތުންނާ ގުޅޭ ސަބްސިޑީތައް ކަނޑާލައި އެއްޗެހީގެ އަގު ބޮޑުކުރަނީ އަޅުގަނޑު ދަންނަވާނީ ސަރުކާރެއް ހިންގަން ނޭނގިގެންނޭ. ސަރުކާރެއް ހިންގާނެ ގޮތް ނޭނގޭ. އެ ސަބްސިޑީތައް ހުއްޓާލައިގެން ލިބޭ ރުފިޔާއިން ތަނެއް އިމާރާތްކޮށް ނޫނީ ސިޔާސީ މަގާމުތައް މި އިތުރުކުރަނީ. މިއީ ނުފޯރާ ފޮތިން ފޫގަޅަން ހަދައިގެން ވާ ގޮތް،" ފަލާހު ވިދާޅުވި އެވެ.

ރޮޒެއިނާ ވިދާޅުވީ ދައުލަތުގެ ބަޖެޓުގައި ވަކި ކަމަކަށް ވަކި ވަރެއް ކަނޑައަޅާފައި އޮއްވައި އެހެން ކަމަކަށް އެ ފައިސާއިން ހަރަދު ނުކުރެވޭނެ ކަމަށެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަހުމަދު ޒުހޫރު ވިދާޅުވީ ކާޑުގެ ސަބްސިޑީ ކަނޑާލައިގެން ލިބޭ ފައިސާ ބޭނުން ކުރާނީ ބަނދަރު ހެދުމާއި ތަރައްގީގެ މަޝްރޫއުތަކަށް ކަމަށެވެ. އެއީ، ރޮޒެއިނާ ވިދާޅުވި ގޮތުގައި، ގާނޫނުއަސާސީއާ ހިލާފު ނިންމުމެކެވެ.

ސަބްސިޑީ ފަދަ ރައްޔިތުންނާ ސީދާ ގުޅޭ ކަންކަމުގައި މަޖިލިހުގެ މެމްބަރުންގެ ހިޔާލު ހޯދަންޖެހޭނެ ކަމަށް ވެސް ރޮޒެއިނާ ވިދާޅުވި އެވެ. އަދި ޓެކްސްތައް ނެގުން އިތުރުވަމުން ދިޔަކަމުގައި ވިޔަސް އެކަމުގެ ފައިދާ ރައްޔިތުންނަށް ކުރަމުން ނުދާ ކަމަށާއި އޭގެ ބަދަލުގައި ސަބްސިޑީތައް ކަނޑާލަމުންދާކަން ރޮޒެއިނާ ވިދާޅުވި އެވެ.

އޭނާ ވިދާޅުވީ މާޒީގައި ކަންތައް ވެފައިވާ ގޮތަށް ބަލާއިރު އިންތިހާބަކާ ކައިރިކޮށް، ސަބްސިޑީ ދޭން ފެށުމަކީ ވެސް ގާތް ކަމެކެވެ.

ކާޑުގެ ސަބްސިޑީ މި މަހުގެ އެއްވަނަ ދުވަހުން ފެށިގެން ފަގީރުންނަށް އެކަނި ދިނުމަށް ސަރުކާރުން ނިންމައި އެކަމަށް އެދި ފޯމް ހުށަހެޅުމުގެ ފުރުސަތު ވަނީ ހުޅުވާލައިފަ އެވެ. އެއާއެކު ކާޑުގެ ބާވަތްތަކުގެ އަގު ވަނީ އަތްނުފޯރާ ފަށަށް އަގުބޮޑުވެފަ އެވެ.

މާލޭގައި ކުރިން 3.98ރ. އަށް ލިބުނު ހަނޑޫ ކިލޯއެއް މިހާރު ގަންނަން ލިބޭނީ 7.96ރ. އަށެވެ. ކުރިން ހަތަރު ރުފިޔާ އަށް ވިއްކި ހަކުރު ކިލޯގެ އަގު ދެ ގުނަވެ އަށް ރުފިޔާ އަށް ވަނީ އަރައިފަ އެވެ. ފުށް ކިލޯއެއްގެ އަގު ވަނީ 2.96ރ. އިން 5.96ރ. އަށް ބޮޑުވެފަ އެވެ. މި އަގުތަކަށް ވުރެ ރާއްޖޭގެ އެހެން ސަރަހައްދުތަކުގައި ކާޑުގެ ބާވަތްތަކުގެ އަގު ބޮޑުވާނެ އެވެ.

ކާޑުގެ ސަބްސިޑީ ކަނޑާލަން ޖެހުނީ، ސަރުކާރުން ބުނެފައިވާ ގޮތުގައި، ރާއްޖެ އަށް ބޭރުގެ ފަރާތްތަކުން މާލީ އެހީ ހޯދަން އުނދަގޫވެފައި ވާތީ އެވެ.