"ވުލްވްރިން" ގެ އާ ފިލްމް ތަފާތު ވާނެ: ހިއު ޖެކްމަން

"އެކްސް- މެން" ގެ ސީރީޒްތަކުގައި ހިއު ޖެކްމަން ވުލްވްރިންގެ ރޯލުން ފެނިގެންދާ ފިލްމުތައް ބެލުންތެރިންގެ މެދުގައި ވަރަށް މަގުބޫލެވެ. މީގެ ތިން ވަނަ ފިލްމް ކުރިއަށް އޮތް އިރު، އެ ފިލްމް ވަރަށް ތަފާތު ވާނެ ކަމަށް ޖެކްމަން ބުނެފި އެވެ.

އޭނާ ބުނީ ކުރީގެ ދެ ފިލްމާ ހިލާފަށް "ވުލްވްރިން 3" މާ ބޮޑަށް ވެސް ތަފާތު ވާނެ ކަމަށެވެ. އަދި މި މަހުގެ ތެރޭގައި ފިލްމްގެ ޓްރެއިލާ ބެލުންތެރިންނަށް ދައްކާލާނެ ކަމަށާއި އޭރުން އެކަން ޔަގީން ވާނެ ކަމަށް އޮސްޓްރޭލިއާ އަށް އުފަން އެކްޓަރު ބުންޏެވެ.

"ވުލްވްރިން 3" ގެ ޝޫޓިން ނިންމާލައި، ފިލްމް މިހާރު އޮތީ އެޑިޓިން ޓޭބަލްގަ އެވެ.

"ޝޫޓިން އެއްކޮށް ނިމިއްޖެ. ޑައިރެކްޓަރު ޖިމް މެންގޮލްޑް މިހާރު އުޅެނީ އެޑިޓިންގެ ކަންތަކާ ވަރަށް ބިޒީކޮށް،" ޖެކްމަން، 47، ބުންޏެވެ.

އޭނާ ބުނީ ފިލްމާ ބެހޭ ގިނަ މައުލޫމާތުތައް ބެލުންތެރިންނަށް ދޭން ބޭނުންވާ ކަމަށެވެ.

"އެހެން ނަމަވެސް މި ވަގުތަށް ބުނެވެން އޮތީ މީގެ ކުރީގެ ފިލްމުތަކާ މި ފަހަރުގެ ފިލްމް މާ ބޮޑަށް ވެސް ތަފާތު ވާނޭ. ފިލްމް ތަފާތު ކުރަން ގިނަ މަސައްކަތްތަކެއް މި ފަހަރު ކުރެވިފައި ހުންނާނެ،" ވުލްވްރިންގެ ފަހު ފިލްމާ ބެހޭ ގޮތުން ޖެކްމަން ބުންޏެވެ.

އަންނަ އަހަރުގެ މާޗް ތިނެއްގައި ރިލީޒް ކުރާ "ވުލްވްރިން 3" ގެ ކާސްޓުންގެ ތެރޭގައި ޕެޓްރިކް ސްޓެވާޓް، ރިޗަޑް އީ ގްރާންޓް، ސްޓެފެން މާޝަންޓް، ބޮއިޑް ހޮލްބްރޫކް، އަދި އެލިޒަބަތު ރޮޑްރިގޭޒް ފާހަގަކޮށްލެވެ އެވެ.