ކޮވިޑް-19: ހުޅުމާލޭ ކަރަންޓީން ފެސިލިޓީ އަށް 40 މިލިއަން ރުފިޔާ

ކޮވިޑް-19 އަށް ފަރުވާ ދިނުމަށް ހުޅުމާލޭގައި ހަދާ މެޑިކަލް ފެސިލިޓީ އަށް 40 މިލިއަން ރުފިޔާ ހަރަދު ވާނެ ކަމަށް ނެޝެނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) އިން މިރޭ ބުނެފި އެވެ.

އެންއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައ އެ ސެންޓަރުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ ޓްރީޓޮޕް ހޮސްޕިޓަލް ކައިރީ ހަދާ އެ ފެސިލިޓީ އަށް 12 މިލިއަން ރުފިޔާ ހަރަދުވާނެ ކަމަށް ބެލެވޭއިރު އެތަނަށް ބޭނުންވާ ސިއްހީ އާލާތްތައް ހޯދުމަށް 28 މިލިއަން ރުފިޔާ ހަރަދުވާނެ ކަމަށެވެ.

އެތަނަކީ 300 އެނދުގެ ފެސިލިޓީއެއް ކަމަށާއި އޭގެ އިތުރުން ސާވިސް ބިލްޑިންއަކާއި އެކޮމެޑޭޝަން ބްލޮކެއް ހުންނާނެ ކަމަށް ވެސް މަބްރޫކް ވިދާޅުވި އެވެ.

"ސާވިސް ބިލްޑިންގެ ބޭނުމަކީ ލޯންޑްރީ އާއި ވޭސްޓް މެނޭޖްމަންޓާއި ބަދިގެޔާއި މިފަދަ ހިދުމަތްތައް ދެވޭ ތަނެއް. އެކޮމެޑޭޝަން ބްލޮކަކީ އެތަނުގައި މަސައްކަތް ކުރާ ޑޮކްޓަރުންނާއި ނަރުހުން ތިބެވޭގޮތަށް ހަދާ ތަނެއް،" މަބްރޫކް ވިދާޅުވި އެވެ.

ހުޅުމާލޭގައި އަލަށް ހަދާ ފެސިލިޓީއަކީ ވެންޓިލޭޓަރާ އެކު ފަރުވާދެވޭ ޒަމާނީ ފެންވަރުގެ ތަނެކެވެ.

ކޮވިޑް-19 އަށް ރާއްޖޭން މިހާރު ފަރުވާ ދެމުން އަންނަނީ ދަރުމަވަންތަ ހޮސްޕިޓަލާއި އއ. ވެލިދޫގަ އެވެ. ކުރިން ފަރުވާ ދޭން ބޭނުން ކުރި ފަރުކޮޅުފުށި އަލުން ހަދައި ފަރުވާ ފަށަން ވަނީ ތައްޔާރުވެފަ އެވެ.

ރާއްޖެ އިން މިހާތަނަށް ކޮވިޑް-19 ގެ 19 މީހަކު ފެނިފައިވާއިރު، އޭގެ ތެރެއިން 13 މީހަކު ވަނީ ރަނގަޅުވެފަ އެވެ. ބާކީ ހަ މީހުންގެ ތެރެއިން ހަތަރު މީހުންނަކީ ދިވެހިންނެވެ. އެއީ މުޅިން ވެސް އިނގިރޭސި ވިލާތުން ރާއްޖެ އައިސް ކަރަންޓީން ފެސިލިޓީތަކުގައި ބައިތިއްބާފައި ވަނިކޮށް، ބަލީގެ އަލާމާތް ފެނިގެން ކުރި ޓެސްޓުން ކޮވިޑް-19 އަށް ޕޮޒިޓިވްވި މީހުންނެވެ. ބާކީ ތިބި ދެ މީހުންނަކީ އެނބުރި ގައުމަށް ދިޔަ ފަހުން، ރާއްޖެ އިން ކުރި ޓެސްޓުގެ ނަތީޖާ ޕޮޒިޓިވް ޓޫރިސްޓުންނެވެ. އެއީ އިޓަލީގެ ދެ މީހުންނެވެ.