ލިލީ އެފްއެންބީ އިން ޑެލިވަރީގެ ހިދުމަތްދެނީ

މާލެ ލޮކްޑައުންގެ ހާލަތުގައި އޮތް ނަމަވެސް، ލިލީ އިންޓަނޭޝަނަލްގެ ލިލީ އެފްއެންބީތަކުން ޑެލިވަރީގެ ހިދުމަތްތައް ދެމުން އަންނަ ކަމަށް އެ ކުންފުނިން ބުނެފި އެވެ.

ލިލީ އިންޓަނޭޝަނަލް އިން ބުނީ ކޮވިޑް-19 މާލެއަށް ފެތުރި، ލޮކްޑައުން ހާލަތުގައި އޮތުމުގެ ސަބަބުން އެންމެ ޒަރޫރީ ބޭނުމަކަށްވެފައިވަނީ ދުވަހުން ދުވަހަށް ހޯދަންޖެހޭ ކާބޯތަކެތި ހޯދުން ކަމަށްވާ އިރު މިތަކެތި ފޯރުކޮށްދިނުމުގެ ގޮތުން ލިލީ އެފްއެންބީ އިން ޑެލިވަރީގެ ހިދުމަތްތައް ކެނޑިނޭޅި ދެމުން އަންނަ ކަަމަށެވެ.

ލިލީ އިންޓަނޭޝަނަލްގެ އެއްވެސް މުވައްޒަފަކު މިހާތަނަށް ކޮވިޑް-19 އަށް ޕޮޒިޓިވްވެފައެއް ނުވެ އެވެ. ޕޮޒިޓިވްވެފައި ވަނީ ލިލީ އެންޓަޕްރައިޒްގެ މުވައްޒަފުންނެވެ. މިއީ ތަފާތު ދެ ކުންފުންޏެކެވެ. އެހެންކަމުން އަދިވެސް އާންމުންނަށް މިކަމުގައި އޮޅުންތަކެއް ހުރުމުން މިކަމަށް ސަމާލުވުމަށް ލިލީ އިންޓަނޭޝަނަލް އިން އެދެ އެވެ. އަދި މި ހާލަތުގައި ދޮގު މައުލޫމާތު ފަތުރައި ކުންފުނިން ދެމުން އަންނަ ހިދުމަތްތަކަށް ހުރަސް ނޭޅުމަށް ވެސް އެެ ކުންފުނިން އެދެ އެވެ.

ރާއްޖޭގައި ފުޅާ ދާއިރާއެއްގައި ކާބޯތަކެތި އެތެރެ ކުރާ ލިލީ އިންޓަނޭޝަނަލް އިން ބުނީ، މި ދަތި ހާލަތުގައި ހާއްސަކޮށް ރޯދަ މަހަށްވާތީ، އެ ކުންފުނިން މަސައްކަތް ކުރަނީ ޒިންމާދާރު ކަމާ އެކު، ރައްކާތެރިކަމުގެ ފިޔަވަޅުތައް ވަރުގަދަކޮށް އާންމުންނަށް ބޭނުންވާ ތަކެތި ފޯރުކޮށްދިނުމަށް ކަމަށެވެ.

އެގޮތުން ކޮންމެ ދުވަހަކު ވެސް އެތައް ސަތޭކަ އޯޑަރެއް ކުދި ވިޔަފާރިތަކަށާއި އާންމުންނަށް ފޯރުކޮށްދޭ ކަމަށް އެ ކުންފުނިން ބުނެ އެވެ. ޑެލިވަރީގެ ހިދުމަތް ދިނުމުގައި ލިލީ އިންޓަނޭޝަނަލްގެ ގިނަ މުވައްޒަފުންތަކެއް ހަރަކާތްތެރިވެ އެވެ.

އެ ކުންފުނިން ބުނީ، ތަކެތި ފޯރުކޮށްދެމުން އަންނަ އިރު، ބައެއް ކުދި ވިޔަފާރިތަކުން ހަމަ އަގަށް ވުރެ ބޮޑު އަގުގައި ތަކެތި ވިއްކަމުންދާ ކަން ފާހަގަކުރެވޭ ކަމަށެވެ. އެހެންކަމުން މިގޮތަށް ކަންކަން ނުކުރުމަށް ވެސް އެ ކުންފުނިން އެދެ އެވެ.

ތަކެއްޗާއި ކެޕޭސިޓީ ހުރި މިންވަރަކުން އެ ކުންފުނިން ތަކެތި ޑެލިވަރީ ކުރުމުގައި ދެމި ތިބޭނެ ކަމުގެ ޔަގީންކަން ލިލީ އިންޓަނޭޝަނަލް އިން ދެ އެވެ.