ދައުލަތުން މީހުންނަށް އެހީ ދޭ އުސޫލަށް ބަދަލު ގެނެސްފި

ދައުލަތުން މީހުންނަށް އެހީގެ ގޮތުގައި ފައިސާ ދޭ އުސޫލަށް މިއަދު ބަދަލު ގެނެސްފި އެވެ.

މާލިއްޔަތު ގަވާއިދު ކުރިން އޮންނަ ގޮތުން ދައުލަތުން އެހީގެ ގޮތުގަައި މީހުންނަށް ފައިސާ ދެވޭނީ ކަމާބެހޭ ގާނޫނުގައިވާ ގޮތުގެ މަތިން އަދި އެ ދާއިރާއެއްގެ މިނިސްޓަރުގެ ހުއްދައާ އެކު ފިނޭންސް މިނިސްޓްރީން ފައިސާ ދޫކުރުމުންނެވެ.

މާލިއްޔަތު ގަވާއިދަށް ފިނޭންސް މިނިސްޓްރީން މިއަދު ގެނައި އިސްލާހުގައިވާ ގޮތުން މީހަކަށް ނުވަތަ ބަޔަކަށް ގެއްލުމެއް ކުރިމަތިވާ ހާލަތްތަކުގައި އެހީ ދޭން ސަރުކާރަށް ފެނިއްޖެ ނަމަ، އެ އެހީ ދޫކުރެވޭނީ ރައީސްގެ ހުއްދަ ލިބިގެންނެވެ. އަދި ގިނަ ބަޔަކަށް ގެއްލުންތަކެއް ކުރިމަތިވާ ހާލަތްތަކުގައި ދައުލަތުން އެ މީހުންނަށް އެހީ ދިނުމާއި އެކަމާ ބެހޭ ތަފްސީލުތައް ކަނޑައަޅާނީ ވެސް ރައީސް ކަމަށް އެ އިސްލާހުގައިވެ އެވެ.

އެހީގެ ގޮތުގައި ފައިސާ ދިނުމަށް ދައުލަތުގެ އިދާރާއަކުން ބޭނުންވާ ނަމަ، ފިނޭންސް މިނިސްޓްރީން ފައިސާ ދޫކުރުމުން އެހީ ދޫކުރެވޭ ގޮތަށް ކުރިން ގަވާއިދުގައި އޮތަސް، އެ އިސްލާހުގައިވާ ގޮތުން އެގޮތަށް ވެސް ފައިސާ ދޫކުރެވޭނީ ރައީސްގެ ހުއްދަ ލިބިގެންނެވެ.

އެ އިސްލާހުގައިވާ ގޮތުން ފިނޭންސް މިނިސްޓްރީން އެފަދަ ކަންކަމަށް ފައިސާ ދޫކުރަން ޖެހޭނީ އެ އަހަރެއްގެ ބަޖެޓުގައި އެފަދަ ކުއްލި ކަންކަމަށް ޚަރަދު ކުރަން ހުންނަ ފައިސާއިންނެވެ. އަދި އެ އަހަރެއްގެ ބަޖެޓުގެ ތެރެއިން އެކަން ހަމަނުޖެހޭ ނަމަ، ފައިސާ ދޫކުރެވޭނީ ރައްޔިތުންގެ މަޖިލީހަށް ހުށަހަޅައިގެން ސަޕްލިމެންޓްރީ ބަޖެޓެއް ފާސްކޮށްގެން ކަމަށް އެ އިސްލާހުގައިވެ އެވެ.

ދައުލަތުން އެހީގެ ގޮތުގައި ފައިސާ ދިނުމުގެ އުސޫލަށް ބަދަލު ގެނައިއިރު، ކޮވިޑް-19 އާ ގުޅިގެން ވަޒީފާ ގެއްލުނު ފަރާތްތަކާއި ވަކި މިންވަރަކަށް ވުރެ މުސާރަ ކުޑަކުރި ފަރާތްތަކަށް މާލީ އެހީ ދިނުމުގެ އުސޫލު މިއަދު ވަނީ އާންމު ކޮށްފަ އެވެ.