ސްކޫލްތައް ހުޅުވާނީ ވައިރަހަށް ވެކްސިނެއް ލިބުނު ދުވަހަކުން: ޑުޓާޓެ

މެނީލާ (މެއި 27) - ބައެއް ގައުމުތަކުގައި ސްކޫލްތައް ހުޅުވި ނަމަވެސް ފިލިޕީންސްގެ ސްކޫލްތައް ހުޅުވައި ދަރިވަރުން ކިޔަވަން ގެންދާނީ ކޮރޯނާވައިރަހަށް ވެކްސިނެއް އުފެއްދުނު ދުވަހަކުން ކަމަށް އެ ގައުމުގެ ރައީސް ރޮޑްރިގޯ ޑުޓާޓެ ވިދާޅުވެއްޖެ އެވެ.

"ވެކްސިނެއް ނުލިބެނީސް ދަރިވަރުން ސްކޫލަށް ފޮނުވުން ވާނީ ބޮޑު މުސީބާތަކަށް،" ގައުމީ މުޚާތަބް ކުރައްވައި ޑުޓާޓެ ވިދާޅުވި އެވެ. "ދަރިވަރުން ގާތްގާތުގައި ތިބެން ޖެހޭއިރު ސްކޫލްތައް ހުޅުވަން އަޅުގަނޑު ހުއްދައެއް ނުދޭނަން. ރައްކާތެރިކަން ޔަގީން ނުވަނީސް ސްކޫލްތައް ހުޅުވުމުގެ ވާހަކަ ދެއްކުމަކީ ބޭކާރު ކަމެއް."

ފިލިޕީންސްގެ ސްކޫލްތައް މާޗް މަހު ބަންދުކުރުމުން 25 މިލިއަން ދަރިވަރުންގެ ކިޔެވުން ވަނީ މެދުކެނޑިފަ އެވެ. ސްކޫލްތައް ހުޅުވަން ކުރިން ނިންމާފައި ވަނީ އޮގަސްޓް މަހު ފަހުކޮޅު އެވެ.

"އަޅުގަނޑަކަށް ފުރަތަމަ ކަމަކީ ސްކޫލްތައް ހުޅުވުމަށް ވުރެ ވެކްސިން. ވެކްސިނެއް ލިބިއްޖެ ނަމަ އޯކޭ. އެއްވެސް ކުއްޖަކު ގްރެޖުއޭޓް ނުވިއަސް އޯކޭ،" ޑުޓާޓެ ވިދާޅުވި އެވެ.

ކޮރޯނާވައިރަހަށް އަދި މިހާތަނަށް ވެކްސިނެއް އުފެއްދިފައެއް ނުވެ އެވެ. އެންމެ އަވަހަށް ވެސް ވެކްސިނެއް ލިބޭނެ ކަމަށް ބެލެވެނީ މި އަހަރުގެ ފަހުކޮޅު ނުވަތަ އަންނަ އަހަރު އެވެ.

ފިލިޕީންސް އިން މިހާތަނަށް ވަނީ 14,669 މީހުން ކޮރޯނާވައިރަހަށް ޕޮޒިޓިވްވެ 886 މީހުން މަރުވެފަ އެވެ. ފިލިޕީންސް ވަނީ މި މަހުގެ ނިޔަލަށް ލޮކްޑައުންކޮށްފަ އެވެ.