"ކޮމަންވެލްތުން ވަކިވުމަކީ ރައްޔިތުންނަށް ދިން އެންމެ ބޮޑު އަނިޔާ"

ކޮމަންވެލްތުގެ މެމްބަރު ކަމުގައި ރާއްޖެ އޮންނަތާ 34 އަހަރު ފަހުން އެ ޖަމިއްޔާ އިން ވަކިވާން ސަރުކާރުން ނިންމުމާ ގުޅިގެން އިދިކޮޅު މެމްބަރުން ރައްޔިތުން މަޖިލީހުގައި ވަރަށް ބޮޑަށް ނުރުހުން ފާޅުކޮށްފި އެވެ.

ކޮމަންވެލްތުން ވަކިވުމާ ގުޅޭ ގޮތުން މަޖިލީހުގެ މަޝްވަރާ އަށް ރައީސް ޔާމީން އެދިވަޑައިގެން މަޖިލީހަށް ފޮނުއްވި މައްސަލަ އަށް ބަހުސް ކުރެއްވި އިދިކޮޅު މެމްބަރުން ވިދާޅުވި ގޮތުގައި މިއީ ސަރުކާރުން ރައްޔިތުންނަށް ދިން އެންމެ ބޮޑު އަނިޔާ އެވެ. އަދި މިފަދަ ބޮޑެތި ނިންމުންތައް ނިންމާއިރު، ލިބިދާނެ ގެއްލުންތައް ދިރާސާކޮށް މަޝްވަރާކުރަން ޖެހޭނެ ކަމަށް އެ މެމްބަރުން ވިދާޅުވި އެވެ.

އިދިކޮޅު މެމްބަރުން ވިދާޅުވި ގޮތުގައި ކޮމަންވެލްތުން ވަކިވުމުގެ ކުރިން މަޖިލީހުގެ ބަހެއް ހޯދަން ޖެހެ އެވެ. މަޖިލީހުގެ ނިންމުމެއް ނެތި މިކަން ކުރުމަކީ ގާނޫނުއަސާސީއާ ހިލާފު ނިންމުމެއް ކަމަށާއި މި ނިންމުން އަނބުރާ ގެންގޮސް، ކޮމަންވެލްތު މެމްބަރެއްގެ ގޮތުގައި ދެމިތިބުމަށް ވެސް އެ މެމްބަރުން ގޮވާލެއްވި އެވެ.

ނަމަވެސް ސަރުކާރަށް ތާއީދު ކުރައްވާ މެމްބަރުން ވިދާޅުވީ ކޮމަންވެލްތުން ވަކިވުމަކީ ގައުމު ދެކެ ލޯބިވާ ހުރިހާ ރައްޔިތުން ތާއީދު ކުރި ކަމެއް ކަމަށެވެ. އަދި ގައުމެއްގެ ދާހިލީ ކަންކަމުގެ ތެރެއަށް އެއްވެސް ބަޔަކަށް ވަނުމުގެ ފުރުސަތު ނުދެވޭނެ ކަމަށް ވެސް އެ މެމްބަރުން ވިދާޅުވި އެވެ.

ކިނބިދޫ ދާއިރާގެ ޖުމްހޫރީ ޕާޓީގެ މެމްބަރު އަދި ކުރީގެ ކޮމިޝަނާ އޮފް ޕޮލިސް އަބްދުﷲ ރިޔާޒް ވިދާޅުވީ ސަރުކާރުގެ ނިންމުމަކީ ގައުމަށް ފައިދާ ހުރި ނިންމުމެއް ނޫން ކަމަށާއި ޖޭޕީން އެދެނީ ކޮމަންވެލްތުގެ މެމްބަރެއްގެ ގޮތުގައި ރާއްޖެ ދެމިއޮތުން ކަމަށެވެ.

"ސަރުކާރުން ކަންކަން ކުރަމުން އަންނަނީ ރަނގަޅަށް ނޫން ކަން ކޮމަންވެލްތުން އެކަންޏެއް ނޫން ބުނަނީ. ދުނިޔޭގެ ބޮޑެތި ގައުމުތަކުން ވެސް ބުނާ ވާހަކައެއް އެއީ،" ރިޔާޒް ވިދާޅުވި އެވެ.

ގައުމުގެ ސިޔާސީ މަސްރަހު ރަނގަޅު ކުރުމަށް ކޮމަންވެލްތުން ހުށަހަޅާފައި އޮތް ކަންކަން ސަރުކާރުން ވީހާ ވެސް އަވަހަކަށް ތަންފީޒު ކުރުމަށް ރިޔާޒް މިއަދު ވެސް ގޮވާލެއްވި އެވެ.

އެގޮތުން ސިޔާސީ ވާދަވެރިންނަށް ރިޔާސީ ރޭހުގައި ބައިވެރިވެވޭނެ ގޮތް ހެދުމާއި ސިޔާސީ ގޮތުން މިނިވަންކަމާ އެކު މަސައްކަތް ކުރެވޭނެ ގޮތް ހޯދައިދިނުމާއި ބިރުވެރިކަމެއް ނެތި މި ގައުމުގައި އުޅޭނެ މަގު ފަހިކޮށްދިނުމަށާއި މެމްބަރުން ފައިސާގެ ނުފޫޒުން އެއްކިބާވެވަޑައިގަތުމަށް އޭނާ ގޮވާލެއްވި އެވެ.

އުނގޫފާރު ދާއިރާގެ ޕީޕީއެމް މެމްބަރު ޖައުފަރު ދާއޫދު ވިދާޅުވީ ތައުލީމީ ގޮތުން ވަރަށް ދަށް ފެންވަރެއްގައި އޮއްވާ ކޮމަންވެލްތާ އެކު ގުޅިގެން މަސައްކަތް ކުރުމުން ކޮމަންވެލްތުގެ ގައުމުތަކުގެ އެހީތެރިކަމާ އެކު ރައްޔިތުންނަށް ބޮޑެތި ކުރިއެރުންތަކެއް ލިބުނު ކަމަށެވެ.

ނަމަވެސް ކޮމަންވެލްތުގެ ބައެއް ގައުމުތަކުން ފަހަކަށް އައިސް މަސައްކަތް ކުރީ ކުރިއެރުންތައް ހުއްޓުވާލައި ސިޔާސީ މަސްރަހު ހަލަބޮލިކުރުމަށް ކަމަށް އޭނާ ތުހުމަތު ކުރެއްވި އެވެ. އެހެންވެ، ކޮމަންވެލްތުން ވަކިވުމަކީ ސަރުކާރުން އެޅި ވަރަށް މުހިންމު ފިޔަވަޅެއް ކަމަށް އޭނާ ވިދާޅުވި އެވެ.

"ކުދި ގައުމެއް ވިޔަސް، ބޮޑު ގައުމެއްވިޔަސް ރައްޔިތުންގެ ހައްގުތަކެއް އޮންނައިރު އެ ހައްގުތައް ލިބިގަންނަން ޖެހޭ. އެކަމަކު ފަހަކަށް އައިސް މަސައްކަތް ކުރީ ސިޔާސީ މަސްރަހު ހަލަބޮލި ކުރަން، ރާއްޖެ އަށް ދަތި ކުރުމަށް މަސައްކަތް ކުރާ ބަޔަކު ކޮމަންވެލްތަކީ އެ މީހުންގެ ޕްލެޓްފޯމަށް ހެދި،" ޖައުފަރު ވިދާޅުވި އެވެ.

މަރަދޫ ދާއިރާގެ އެމްޑީޕީ މެމްބަރު އިބްރާހިމް ޝަރީފު ވިދާޅުވީ ކޮމަންވެލްތުގެ މަގްސަދުތައް ތަފާތުވެފައިވާއިރު، އެ ޖަމާއަތުން އަދުލު އިންސާފުގެ ދާއިރާ ހަރުދަނާ ކުރުމަށާއި ޑިމޮކްރަސީގެ ބިންގާ ވަރުގަދަކޮށް ހިމާޔަތް ކުރުމުގެ މަސައްކަތަކީ އެ ޖަމާއަތުން އިސްކަން ދޭ ކަންކަން ކަމަށެވެ.

ކޮމަންވެލްތުން ވަކިވުމުގެ ކުރިން މަޝްވަރާގެ ރިވެތި އުސޫލު އިސްކުރަން ޖެހޭ ކަމަށާއި މިއިން ކޮންމެ ނިންމުމަކުން ލިބޭނެ ގެއްލުމާއި ފައިދާއަށް ރިއާޔަތް ކުރަން ޖެހޭ ކަމަށް އޭނާ ވިދާޅުވި އެވެ. އޭނާ ވިދާޅުވި ގޮތުގައި ކަންކަން އިސްލާހު ކުރުމުގެ ބަދަލުގައި ކޮމަންވެލްތުން ވަކިވުމަކީ ރަނގަޅު ގޮތެއް ނޫނެވެ.

"މަޖިލީހުން މިކަމާ ވިސްނައި، އިދިކޮޅު ފަރާތްތަކުގެ ބަހެއް ވެސް ހޯދަން ޖެހޭ،" ޝަރީފް ވިދާޅުވި އެވެ.

ސަރުކާރަށް ތާއީދު ކުރައްވާ މެމްބަރުން ވިދާޅުވީ ކޮމަންވެލްތުން ރާއްޖެއާ މެދު ކަންކަން ކުރަމުން ދަނީ އެއްވެސް ހަމައަކުން ނޫން ކަމަށެވެ. އެހެންވެ ކޮމަންވެލްތުން ވަކިވާން ނިންމި ނިންމުމަކީ ރައީސް އަބްދުﷲ ޔާމީން ނިންމެވި ހަރުދަނާ ނިންމެވުމެއްގެ ގޮތުގައި އެ މެމްބަރުން ސިފަކުރެއްވި އެވެ.

ސަރުކާރުން ބުނެފައިވަނީ ކޮމަންވެލްތުން ވަކިވާން ނިންމުމަކީ އުނދަގޫ ކަމެއް ކަމަށާއި އެކަމަކު އެކަން ކުރަންޖެހުނީ ރާއްޖޭގެ މަސައްކަތްތައް ކޮމަންވެލްތުން ބަލައިނުގަތުމުން ކަމަށެވެ. އަދި ކޮމަންވެލްތުން ރާއްޖޭގެ ކަންކަމާ ބެހި، ބޭއިންސާފުން ފިޔަވަޅު އަޅަމުން ދިއުމަކީ ކޮމަންވެލްތުން ވަކިވާން ނިންމަން ޖެހުނު ސަބަބެއް ކަމަށް ސަރުކާރުން ބުނެއެވެ.