ޑޮނަލްޑް ޓްރަމްޕްގެ ފަތިފުށާ ބެހޭ ފޮތެއް އާއިލާގެ މެމްބަރަކު ނެރެނީ

އެމެރިކާގެ ރިއާސީ އިންތިހާބު ވެސް ބޯމަތިވެ، ރައީސް ޑޮނަލްޑް ޓްރަމްޕް ދެ ވަނަ ދައުރަކަށް ވާދަކުރައްވާ އިރު ކުރިމަތީގައި ހުރި މައްސަލަތައް ވަރަށް ގިނަ އެވެ. އެއްކޮޅުން މުޅި އެމެރިކާގައި ކަޅު ނަސްލުގެ މީހުންގެ ހައްގުތައް ހިމާޔަރްކުރަން ގޮވައިލާ އަޑުގަދަ ވަނީ އެވެ. އަދި އެފަދަ މީހުންނާ ދެކޮޅަށް ޓްރަމްޕް ދައްކަވާ ވާހަކަތައް ވެސް ހޫނުވެ، އޭނާއާ ދެކޮޅަށް ނުކުންނަ މީހުން ވެސް ގިނަވަނީ އެވެ.

އަނެއްކޮޅުން ޓްރަމްޕްގެ ވެރިކަމާއި އާއިލީ ދިރިއުޅުމާ ބެހޭ ގޮތުން ލިޔެފައިވާ ފޮތްތަކެއް މި ދަނޑިވަޅުގައި ނެރެން އޮތީ ތައްޔާރަށެވެ. މީގެ ތެރެއިން އެއް ފޮތަކީ އެ ފޮތެއް ރިލީޒްކުރުން ހުއްޓުވުމަށް މިހާރު ކޯޓާ ހިސާބަށް ގޮސްފައިވާ އަދި އެމެރިކާގެ ކުރީގެ ނޭޝަނަލް ސެކިއުރިޓީ އެޑްވައިޒަރު ޖޯން ބޯލްޓަން ވައިޓް ހައުސްގައި ހޭދަކުރެއްވި މުއްދަތުގައި ކަންކަން ހިނގާފައިވާ ގޮތުގެ މައްޗަށް އޭނާ ލިޔުއްވި "ދަ ރޫމް ވެއާ އިޓް ހެޕެންޑް" އެވެ. މި ފޮތް ނެރެން ހަމަޖެހިފައި ވަނީ އަންނަ މަހުގެ 23 ގަ އެވެ.

މި ފޮތުގެ އިތުރަށް އަންނަ މަހުގެ 28 ގައި ނެރެން އޮތް ފޮތަކީ ޕަބްލިޝިން ހައުސް ސައިމަން އެންޑް ޝޫސްޓާގެ ތައްގަނޑުގައި ނެރޭ، ޓްރަމްޕްގެ އަސްލު ފަތިފުށް އެނގިގެންދާނެ ފޮތެކެވެ.

އެއީ އޭނާ އަށް ބޮޑުބޭބެ ކިޔާ އަންހެނެއް ކަމަށްވާ މޭރީ ޓްރަމްޕްގެ "ޓޫ މަޗް އެންޑް ނެވަ އިނަފް: ހައު މައި ފެމިލީ ކްރިއޭޓެޑް ވޯލްޑްސް މޯސްޓް ޑޭންޖަރަސް މޭން" އެވެ.

މި ފޮތް ލިޔުނު މޭރީ ޓްރަމްޕް، 55، އަކީ، ޓްރަމްޕްގެ ދޮށީ ބޭބެ ފްރެޑް ޓްރަމްޕް ޖޫނިއާގެ ދަރިއެކެވެ. ފްރެޑް ވަނީ 1981 ގައި މަރުވެފަ އެވެ. ޓްރަމްޕާއި އޭނާގެ އާއިލާގެ ތެރޭގައި ބޮޑެތި މައްސަލަތައް ހުރި ވާހަކަ އާއި އާއިލާގެ މީހުންނާ ދޭތެރޭ ޓްރަމްޕް ކަންތައް ކޮށްފައިވާ ގޮތް މޭރީގެ ފޮތުން އިތުރަށް ސާފުވެގެން ދާނެ އެވެ.

ފްރެޑްގެ މަރުވި ފަހުން ވެސް ޓްރަމްޕާއި އާއިލާގެ އެހެން މީހުންނާ ދެމެދު 20 އަހަރު ވަންދެން ގާނޫނީ ގޮތުން ވެސް އެތަކެއް ކޯޅުންތަކެއް ހިނގާފައިވެ އެވެ. ކްލިނިނަލް ސައިކޮލޮޖިސްޓެއް ކަމަށްވާ މޭރީގެ ފޮތަށް ނަން ދީފައިވާ ގޮތުން ވެސް އެކަން ވަރަށް ބޮޑަށް ދޭހަވެ އެވެ.

ބޮޑުބޭބެގެ ފަތިފުށާ ބެހޭ އެތައް ވާހަކައެއް ކިޔައިދޭނެ މޭރީގެ ފޮތް އެމެޒޯންގައި ނެރެން ގާތްވަމުން އަންނަ އިރު، މި ފޮތާ ދެކޮޅަށް ވެސް ޓްރަމްޕް ވާހަކަ ދައްކާފައިވެ އެވެ. އޭނާ ވިދާޅުވީ އެ މީހުންގެ އާއިލާ އަކީ އަބަދު ވެސް ވަރަށް ގުޅުން ބަދަހި އާއިލާއެއް ކަމަށާއި މޭރީގެ ފޮތަކީ އެ އާއިލާގެ މޫނުމަތި ހަރާބުކޮށްލާނެ އެއްޗެއް ކަމަށެވެ.

މަސްރަހު ދިރާސާކުރާ މީހުން ބުނާގޮތުގައި އެއްގޮތުން ބަލާ އިރު، ބޯލްޓަންގެ "ދަ ރޫމް ވެއާ އިޓް ހެޕެންޑް" އަށް ވުރެ މޭރީގެ "ޓޫ މަޗް އެންޑް ނެވަ އިނަފް: ހައު މައި ފެމިލީ ކްރިއޭޓެޑް ވޯލްޑްސް މޯސްޓް ޑޭންޖަރަސް މޭން" އިން ޓްރަމްޕަށް ލިބޭ ގެއްލުން ބޮޑުވާނެ އެވެ.