ލޮނުފެނަކީ ކޮވިޑް-19 އަށް ފަރުވާއެއްތޯ ދިރާސާކުރަނީ

އާދައިގެ އަރިދަފުސް ރޯގާ ޖެހުމުން ގޭގައި ފަރުވާކުރުމަށް ހަދާ ލޮނުފެނުން ކޮވިޑް-19 އަށް ފަރުވާ ކުރެވިދާނެތޯ ބެލުމަށް ސްކޮޓްލެންޑުގެ އެޑިންބާގްގެ ރިސާޗަރުން މަސައްކަތް ފަށައިފި އެވެ.

މީގެ ކުރިން ހަދާފައިވާ ދިރާސާއަކުން ބެލެވިފައިވާ ގޮތުގައި، އާދައިގެ އަރިދަފުސް ރޯގާ ޖެހުމުން ލޮނުފެނުން ކަރާއި ނޭފަތް ދޮވުމުން ބަލީގެ އަލާމާތްތައް ކުޑަވެ އެވެ. އަދި މި ފެނުން ކަރާއި ނޭފަތުގެ އެތެރެ ދޮންނަ ނަމަ ބަލި ރަނގަޅުވުން ވެސް އަވަސްވާކަން ވެސް އެނގިފައިވެ އެވެ. ނޭފަތް ދޮވުން ކަމަށް ބަލާފައި ވަނީ ނޭސަލް އިރިގޭޝަން ނުވަތަ އެއް ނޭފަތުން ފޮނުވާލާ ލޮނުފެން އަނެއް ނޭފަތުން ނުކުންނަ ގޮތަށް ދޮވުމަށެވެ.

ކޮރޯނާވައިރަހުން ޖެހޭ ކޮވިޑް-19 އަށް ވެސް މިގޮތަށް ފަރުވާ ދެވިދާނެތޯ ބެލުމުގެ މަސައްކަތް އެޑިންބާގް ޔުނިވާސިޓީގެ ސައިންސްވެރިން މިހާރު ވަނީ ފަށައިފަ އެވެ.

ސައިންސްވެރިން މިހާރު އަންނަނީ ކޮވިޑް-19 ގެ އަލާމާތްތައް ހުރި ނުވަތަ އެ ބަލި ޖެހިފައިވާކަން ކަށަވަރުވެފައިވާ މީހުން ދިރާސާގައި ބައިވެރިކުރަމުންނެވެ.

އަރިދަފުސް ރޯގާ ޖެހުމުން ލޮނުފެނުން ކަރާއި ނޭފަތް ދޮވުމުން ބަލީގެ އަލާމާތްތައް ކުޑަވެ، އަވަހަށް ރަނގަޅުވާ ކަމަށް ދެއްކި "އެޑިންބާގް އެންޑް ލޮތިއަންސް ވައިރަލް އިންޓަވެންޝަން ސްޓަޑީ" ގައި ސައިންސްވެރިން ވަނީ އާންމު އަރިދަފުސް ރޯގާ ޖެހިފައި ތިބި ބައެއްގެ ތެރެއިން އެއް ބަޔަކު، އުނދަގޫވާ ނަމަ ކަރާއި ނޭފަތް ލޮނުފެނުން ދޮންނަން ބުނެފަ އެވެ. އަނެއް ގްރޫޕްގެ މީހުން އާންމު އެހެން ފަރުވާތައް ހޯދަން ބުންޏެވެ.

ކުރީގެ ނަތީޖާ އަކީ ކޮބާ؟

މި ދިރާސާގައި ބައިވެރިކުރި މީހުން ދެ ހަފުތާ ވަންދެން، އެ މީހުން ރޯގާ އަށް ފަރުވާ ހޯދަމުން ދިޔަ ގޮތް ލިޔެފައި ބެހެއްޓި އެވެ. އަދި މި މުއްދަތުގެ ތެރޭގައި ނޭފަތުން އަމިއްލަ އަށް ސާމްޕަލް ނަގާފައި ބެހެއްޓި އެވެ.

ދިރާސާ ޓީމުން އޭރު ބުނެފައިވާ ގޮތުގައި ނޭފަތާއި ކަރު ލޮނުފެނުން ދޮވުނު މީހުންގެ ބަލި މާ އަވަހަށް ރަނގަޅުވި އެވެ. އަދި އެ މީހުންގެ ފަރާތުން އެހެން މީހުންނަށް ރޯގާ ޖެހުމުގެ ފުރުސަތު ވެސް ކުޑަވި އެވެ. މީގެ އިތުރުން ރޯގާގެ ވައިރަސް އެ މީހުންގެ ހަށިގަނޑުން ފިލައިގެން ދިޔުން ވެސް އަވަހެވެ. އަދި އިތުރު ބޭހެއް ބޭނުންކުރަން ޖެހުނު މީހުން ވެސް މި ގްރޫޕްގެ ތެރޭގައި މަދެވެ.

ކޮވިޑް-19 އާ ދެކޮޅަށް މި ފަރުވާ ބޭނުންކުރެވިދާނެތޯ ބެލުމާ ބެހޭ ގޮތުން ޔުނިވަސިޓީގެ ޕްރޮފެސަރު އަޒީޒް ޝައިޚް ވިދާޅުވީ މިއީ ހަމައެކަނި ލޮނުން ދޭ ފަރުވާއެއް ކަމަށް ވާތީ، މިގޮތަށް ކޮވިޑް-19 އަށް ވެސް ފަރުވާ ކުރެވޭކަން ޔަގީންކުރެވިއްޖެ ނަމަ މިއީ އަގު ހެޔޮ އަދި ފަސޭހައިން ދެވޭނެ ފަރުވާއަކަށް ވާނެ ކަމަށެވެ. -- ބީބީސީ